ഇനിയൊരു പ്രണയത്തിനില്ലെന്ന് നടി ഹന്‍സിക. വ്യക്തിജീവിതത്തില്‍ പരാജയങ്ങളാണ് താരത്തെ ഇതിന് പ്രേരിപ്പിച്ചത്. പ്രത്യേകിച്ച് ചിമ്പുവുമായുള്ള പ്രണയം. ദീര്‍ഘനാളത്തെ പ്രണയത്തിനും ഒരുമിച്ചുള്ള ജീവിതത്തിനും ശേഷം ചിമ്പു കൈവെടിഞ്ഞതോടെ താരം ആകെ തളര്‍ന്ന് പോയിരുന്നു. നടി ഖുശ്ബു മാത്രമാണ് അന്ന് ആശ്വാസമായി കൂടെ നിന്നത്. അവരുമായി അടുത്തില്ലായിരുന്നെങ്കില്‍ ഒരു പക്ഷെ, ആത്മഹത്യയ്ക്ക് പോലും ശ്രമിച്ചിരുന്നേനേ എന്ന് താരം പറയുന്നു. അതിലൊന്നും തളരാതെ പ്രൊഫഷണല്‍ ലൈഫിനാണ് ഇപ്പോള്‍ ഏറെ ശ്രദ്ധ നല്‍കുന്നത്.
ഈ ലോകത്ത് ഹന്‍സികയ്ക്ക് ഏറെ ഇഷ്ടം അമ്മയെയാണ്. അമ്മ പറയുന്നതുമാത്രമേ ചെയ്യൂ എന്ന തീരുമാനത്തിലുമാണ് താരം. 32 കുട്ടികളെയാണ് ഹന്‍സിക ദത്തെടുത്തിരിക്കുന്നത്. അവരുടെ സന്തോഷത്തില്‍ പങ്കുകൊണ്ട് അവരോടൊപ്പം ദീപാവലി ആഘോഷിക്കാനാണ് പ്ലാന്‍. ചിമ്പു അകന്ന ശേഷം ഇടവേളകളെല്ലാം ഈ കുട്ടികള്‍ക്കൊപ്പമാണ് ഹന്‍സിക ചെലവഴിക്കുന്നത്. ചെന്നൈയിലെ അനാഥാലയത്തിലാണ് ഈ കുട്ടികള്‍ കഴിയുന്നത്. അവരുടെ വിദ്യാഭ്യാസത്തിനാണ് കൂടുതല്‍ പ്രാധാന്യം നല്‍കുന്നത്. അടുത്ത അഞ്ച് വര്‍ഷത്തേക്ക് വിവാഹത്തെ കുറിച്ച് ചിന്തിക്കുന്നേയില്ലെന്നാണ് താരം പറയുന്നത്.
വിവാഹം അമ്മയുടെ ഇഷ്ടപ്രകാരമായിരിക്കും. അതും അമ്മ കണ്ടെത്തുന്ന വരനെ മാത്രം. ഇനി ഒരു പ്രേമം ഇല്ലത്രെ! കരിയറില്‍ കൂടുതല്‍ ശ്രദ്ധിക്കാനാണ് ആഗ്രഹം. എന്നാല്‍ തമിഴില്‍ കീര്‍ത്തി സുരേഷ് താരമായി മാറിയതോടെ ഹന്‍സിക ഉള്‍പ്പെടെയുള്ള പല യുവനടിമാര്‍ക്കും അവസരങ്ങള്‍ കുറഞ്ഞിട്ടുണ്ട്. ശ്രീയാശരണ്‍, എമ്മി ജാക്‌സണ്‍ എന്നിവരും ഈ പ്രതിസന്ധിയിലാണ്. ഖുശ്ബുവുമായുള്ള ബന്ധം വഴി അവരുടെ ഭര്‍ത്താവ് സുന്ദര്‍ സംവിധാനം ചെയ്ത സിനിമകളില്‍ നായികയായി. അതുപോലെയുള്ള ബന്ധങ്ങളാണ് തന്റെ കരുത്തെന്ന് താരം പറഞ്ഞു.