ഫോണിലൂടെ ഡോക്ടറോട് രോഗവിവരം പറയാം, ഇമെയിലിലൂടെയോ വാട്‌സ്ആപ്പിലൂടെയോ ഡോക്ടര്‍ മരുന്ന് കുറിപ്പടി നല്‍കും... ഇഹെല്‍ത്ത് പദ്ധതിയുമായി ആരോഗ്യവകുപ്പ്
ഡോക്ടറോട് ഫോണില്‍ രോഗവിവരം പറയാം. ഇമെയിലിലൂടെയോ വാട്‌സ്ആപ്പിലൂടെയോ ഡോക്ടര്‍ മരുന്ന് കുറിപ്പടി നല്‍കും... ഇഹെല്‍ത്ത് പദ്ധതിയുമായി ആരോഗ്യവകുപ്പ്. പദ്ധതി നിലവില്‍ വന്നാല്‍ ടെലികണ്‍സള്‍ട്ടേഷനും ഇലക്ട്രോണിക് പ്രിസ്‌ക്രിപ്ഷനും എല്ലാ ആശുപത്രികളിലും വരും. മെഡിക്കല്‍ സ്‌റ്റോറില്‍നിന്നും ഫാര്‍മസികളില്‍ നിന്നും ആന്റിബയോട്ടിക് അടക്കമുള്ള മരുന്ന് വാങ്ങാന്‍ ഡോക്ടര്‍മാര്‍ക്ക് വാട്‌സ്ആപ് വഴിയോ ഇ മെയില്‍ വഴിയോ കുറിപ്പടി നല്‍കാന്‍ ആരോഗ്യവകുപ്പ് അനുമതി നല്‍കി. ഇത്തരം ഇലക്ട്രോണിക് പ്രിസ്‌ക്രിപ്ഷനെ അംഗീകൃത കുറിപ്പടികളായി അംഗീകരിച്ച് ആരോഗ്യവകുപ്പ് ഉത്തരവിട്ടു. ഡോക്ടര്‍ പറയുന്ന മരുന്നിന്റെ പേരുമായി കടകളില്‍ എത്തുന്നത് നിയന്ത്രിക്കാനാണ് ഇ പ്രിസ്‌ക്രിപ്ഷന് അംഗീകാരം നല്‍കാന്‍ തീരുമാനിച്ചത്.
ഇ മെയില്‍ വഴിയോ ടെലിഫോണിലൂടെയോ കുറിപ്പടി നല്‍കുന്ന ഡോക്ടര്‍മാര്‍ സ്വന്തം ഇമെയില്‍ വിലാസവും ടെലിഫോണ്‍ നമ്പറും സൂചിപ്പിച്ച് കടയുമായും ഫാര്‍മസിയുമായും കരാര്‍ ഉണ്ടാക്കണം. കരാറില്‍ പറയുന്ന ഇമെയില്‍ വിലാസത്തില്‍നിന്നോ ഫോണ്‍ നമ്പറില്‍നിന്നോ ആവശ്യപ്പെടുന്ന മരുന്ന് ഡോക്ടര്‍ നിര്‍ദേശിക്കുന്ന രോഗിക്ക് നല്‍കാം. കരാറുണ്ടാക്കാത്ത ഫാര്‍മസികളിലേക്ക് വാട്‌സ്ആപ് വഴിയേ കുറിപ്പടി നല്‍കാനാവൂ.
അതാകട്ടെ, രജിസ്റ്റര്‍ നമ്പറുള്ള ലെറ്റര്‍ പാഡില്‍ സ്വന്തം കൈപ്പടയില്‍ കുറിപ്പടി എഴുതി സ്‌കാന്‍ ചെയ്ത് രോഗിയുടെ വാട്‌സ്ആപ്പിലേക്ക് അയക്കണം. ഇതിനെ അംഗീകൃത കുറിപ്പടിയായി കണക്കാക്കാമെന്നാണ് ആരോഗ്യവകുപ്പ് നിര്‍ദേശം. സര്‍ക്കാര്‍സ്വകാര്യ ഡോക്ടര്‍മാര്‍ക്ക് ഇത്തരത്തില്‍ ഇലക്ട്രോണിക് കുറിപ്പടി ഉപയോഗിക്കാന്‍ അനുമതി നല്‍കിയിട്ടുണ്ട്.
അതേസമയം, മനോരോഗചികിത്സയടക്കമുള്ളവക്ക് ഉപയോഗിക്കുന്ന ഷെഡ്യൂള്‍ എക്‌സ് വിഭാഗത്തില്‍പെട്ട മരുന്നുകള്‍ക്ക് ഈ സംവിധാനം ബാധകമല്ല. ഡ്രഗ്‌സ് കണ്‍ട്രോളറുടെ കൂടി നിര്‍ദേശം കണക്കിലെടുത്താണ് പുതിയ വ്യവസ്ഥ അംഗീകരിച്ചത്. വിദേശങ്ങളിലുള്ളപോലെ, രോഗിക്ക് ഫോണില്‍ ഡോക്ടറുമായി രോഗവിവരം സംസാരിക്കുകയും ചെയ്യാം.
https://www.facebook.com/Malayalivartha
