വെനസ്വേലയിലേക്ക് എണ്ണ കൊണ്ടുപോയ ഇറാന്റെ കപ്പലുകള്‍ യുഎസ് ഭരണകൂടം പിടിച്ചെടുത്തു. യുഎസ് ഉദ്യോഗസ്ഥരെ ഉദ്ധരിച്ച് വോള്‍സ്ട്രീറ്റ് ജേര്‍ണലാണ് വാര്‍ത്ത റിപ്പോര്‍ട്ട് ചെയ്തത്. ട്രംപ് ഭരണകൂടത്തിന്റെ ഉപരോധം മറികടന്ന് എണ്ണ കൊണ്ടുപോകയായിരുന്നു. ആദ്യമായാണ് ഇറാന്റെ എണ്ണക്കപ്പലുകള്‍ അമേരിക്ക പിടിച്ചെടുക്കുന്നത്.

യുഎസ് പ്രോസിക്യൂട്ടര്‍മാര്‍ വെനസ്വേലയിലേക്ക് എണ്ണ കടത്താന്‍ ശ്രമിച്ച നാലു കപ്പലുകള്‍ പിടിച്ചെടുക്കണമെന്നു കാട്ടി കഴിഞ്ഞ മാസം കേസ് ഫയല്‍ ചെയ്തിരുന്നു. ഉപരോധം പ്രഖ്യാപിച്ചെങ്കിലും ആദ്യമായാണ് യുഎസ് ഇത്തരത്തില്‍ കപ്പല്‍ പിടിച്ചെടുക്കുന്നത്. ഈ നടപടിയോടെ യുഎസിന്റെ എതിര്‍ചേരിയില്‍ നില്‍ക്കുന്ന രണ്ട് രാജ്യങ്ങള്‍ക്കുമേല്‍ സാമ്പത്തിക സമ്മര്‍ദ്ദമാണ് ട്രംപ് ഭരണകൂടം കൊണ്ടുവന്നിരിക്കുന്നത്.

യുഎസ് ഉപരോധം ഏര്‍പ്പെടുത്തിയത് ആണവ പദ്ധതി, ബാലിസ്റ്റിക് മിസൈലുകള്‍ തുടങ്ങി മധ്യപൂര്‍വേഷ്യയിലെ ഇറാന്റെ സ്വാധീനം വരെയുള്ള കാരണങ്ങള്‍ നിരത്തിയാണ്. എന്നാല്‍ തങ്ങളുടെ ആണവ പദ്ധതി സമാധാന കാര്യങ്ങള്‍ക്കുവേണ്ടിയാണ് എന്ന നിലപാടാണ് ഇറാന്റേത്. ഇത്തരത്തില്‍ ഉപരോധം ഏര്‍പ്പെടുത്തിയിട്ടുള്ള രാജ്യത്തിന് എണ്ണ വിറ്റുവരവില്‍നിന്നുള്ള വരുമാനം ഇല്ലാതാക്കാനാണ് യുഎസിന്റെ നീക്കം.

അടുത്തിടെ പിടിച്ചെടുത്ത ലൂണ, പാന്‍ഡി, ബെറിങ്, ബെല്ല എന്നീ പേരുകളിലുള്ള കപ്പലുകള്‍ ഹൂസ്റ്റണിലേക്കാണ് കൊണ്ടുപോകുന്നത്. ഹൂസ്റ്റണില്‍ എത്തിക്കുമ്പോള്‍ ട്രംപ് ഭരണകൂടത്തിലെ മുതിര്‍ന്ന ഉദ്യോഗസ്ഥര്‍ എത്തുമെന്നാണ് വിവരം. അതേസമയം, സൈനിക ബലം ഉപയോഗിക്കാതെയാണ് കപ്പലുകള്‍ പിടിച്ചെടുത്തതെന്നാണ് വിവരം. ഇതിന്റെ കൂടുതല്‍ വിവരങ്ങള്‍ അറിവായിട്ടില്ല.