രണ്ട് മലയാളികള്‍ ഉള്‍പ്പെടെ 10 കപ്പല്‍ ജീവനക്കാരെ ആഫ്രിക്കയില്‍ വച്ച് കടല്‍ക്കൊള്ളക്കാര്‍ തട്ടിക്കൊണ്ടു പോയതായി ബന്ധുക്കള്‍ക്കു വിവരം . കാസര്‍ക്കോട് കോട്ടിക്കുളം ഗോപാല്‍പേട്ടയിലെ രജീന്ദ്രന്‍ ഭാര്‍ഗവനും (35) മറ്റൊരു മലയാളിയും വിവിധ സംസ്ഥാനങ്ങളില്‍ നിന്നുള്ള അഞ്ച് പേരും 3 വിദേശികളുമടക്കം 10 കപ്പല്‍ ജീവനക്കാരെയാണ് തട്ടിക്കൊണ്ടു പോയത്. ആഫ്രിക്കയിലെ ലോമോ തുറമുഖത്തു നിന്നു കാമറൂണിലേക്ക് പോയ ചരക്കു കപ്പലാണ് കടല്‍ക്കൊള്ളക്കാര്‍ പിടിച്ചെടുത്ത് ജീവനക്കാരെ തടവിലാക്കിയത്.

18 ജീവനക്കാരില്‍ 10 പേരെ തട്ടിക്കൊണ്ടു പോയ ശേഷം കപ്പല്‍ ഒഴിവാക്കിയെന്നാണ് സൂചന. മാര്‍ച്ച് 17നു രാത്രി 11.30നു ശേഷം രജീന്ദ്രനെ ബന്ധപ്പെടാനായി വീട്ടുകാര്‍ക്കു കഴിഞ്ഞിട്ടില്ല.പാനമ രജിസ്‌ട്രേഷനുള്ള ബിറ്റു റിവര്‍ കമ്പനിയുടേതാണ് കപ്പല്‍. മുംബൈ ആസ്ഥാനമായ മെരി ടെക് ടാങ്കര്‍ മാനേജ്‌മെന്റാണ് ചരക്ക് കടത്തലിനു ഉപയോഗിക്കുന്നത്.

ബിറ്റു റിവര്‍ കമ്പനി 18നു രജീന്ദ്രന്‍ ഭാര്യയെ വിളിച്ചു വിവരം പറഞ്ഞിട്ടുണ്ടായിരുന്നു. ജീവനക്കാര്‍ സുരക്ഷിതരാണെന്നു കമ്പനി അറിയിച്ചതായി ബന്ധുക്കള്‍ പറയുന്നു. കപ്പലിലെ അവശേഷിക്കുന്ന ജീവനക്കാരുമായി കമ്പനി അധികൃതര്‍ സംസാരിക്കുന്നുണ്ടെങ്കിലും തട്ടിക്കൊണ്ടു പോയവരെ ബന്ധപ്പെടാനായി കഴിയാത്തത് വീട്ടുകാരെയേറെ ആശങ്കപ്പെടുത്തുന്നു. തട്ടിക്കൊണ്ടു പോയവരെക്കുറിച്ചോ മോചനദ്രവ്യത്തെക്കുറിച്ചോ കപ്പല്‍ കമ്പനി വീട്ടുകാര്‍ക്കു വിവരം നല്‍കിയിട്ടില്ല.