സിറിയയിലേക്കുള്ള യാത്രയ്ക്കിടെ 92 പേരുമായി കരിങ്കടലില്‍ റഷ്യന്‍ സൈനിക വിമാനം തകര്‍ന്നുവീണ അപകടത്തിനു കാരണം പൈലറ്റിന്റെ പിഴവെന്നു റിപ്പോര്‍ട്ട്. കേസ് അന്വേഷിക്കുന്ന ഉദ്യോഗസ്ഥരെ ഉദ്ധരിച്ചാണ് ഇത്തരമൊരു നിഗമനത്തില്‍ എത്തിയത്. വിമാനത്തിന്റെ പ്രധാന ബ്ലാക് ബോക്‌സ് നടുക്കടലില്‍നിന്നു കണ്ടെടുത്തിരുന്നു. ഇതിന്റെ പ്രാഥമിക പരിശോധന നടത്തിയതിനുശേഷമാണ് അപകട കാരണം പൈലറ്റിന്റെ പിഴവാണെന്ന എന്ന നിഗമനത്തില്‍ എത്തിയതെന്നു വാര്‍ത്താ ഏജന്‍സി റിപ്പോര്‍ട്ട് ചെയ്തു.

ഞായറാഴ്ച രാവിലെ റഷ്യയിലെ സോചി നഗരത്തില്‍നിന്നു പറന്നുയര്‍ന്ന വിമാനം താമസിയാതെ തകര്‍ന്നുവീഴുകയായിരുന്നു. സിറിയയിലെ റഷ്യന്‍ സൈനികത്താവളത്തില്‍ ക്രിസ്മസ് ആഘോഷത്തിനായി പോകുകയായിരുന്ന റെഡ് ആര്‍മി ക്വയറിലെ 60 അംഗങ്ങളും വിമാനത്തിലുണ്ടായിരുന്നു. 12 മൃതദേഹങ്ങളും 156 മൃതദേഹാവശിഷ്ടങ്ങളും കടലില്‍നിന്നു കണ്ടെടുത്തിട്ടുണ്ട്. വിമാനം വാല്‍ഭാഗം കുത്തി കുത്തനെ കടലിലേക്കു വീഴുകയായിരുന്നുവെന്ന ദൃക്‌സാക്ഷി മൊഴിയും പരിശോധയിലാണ്.