കോണ്‍ഗ്രസുകാര്‍ക്ക് എന്നും അഭിമാനവും ആവേശവുമായ ഇന്ത്യയുടെ പ്രഥമ പ്രധാനമന്ത്രി ജവഹര്‍ലാല്‍ നെഹറുവിന്റെ നൂറ്റി ഇരുപത്തി അഞ്ചാമത് ജന്മദിനം ആഘോഷിക്കാന്‍ പ്രധാനമന്ത്രി നരേന്ദ്രമോഡി.  സ്വാതന്ത്ര്യ സമരത്തിലെ സമുന്നതരായ നേതാക്കളെ കൈയ്യിലെടുത്ത് നരേന്ദ്രമോഡി നേരത്തെ തന്നെ കൈയ്യടി നേടിയിരുന്നു. സര്‍ദ്ദാര്‍ വല്ലഭായി പട്ടേലിന്റെ പ്രതിമ നിര്‍മ്മാണം ദേശശ്രദ്ധ നേടിയതാണ്. പട്ടേലിനെ മോഡി സ്വന്തമാക്കിയതിനെതിരെ കോണ്‍ഗ്രസ് രംഗത്തെത്തിയിരുന്നു. 
തുടര്‍ന്ന് ഭരണത്തിലേറിയതിനു ശേഷം വന്ന ആദ്യ ഗാന്ധി ജയന്തിയെ ഒരു സംഭവമാക്കി മാറ്റാന്‍ മോഡിക്കു സാധിച്ചു. ഗാന്ധിയന്‍മാരെന്ന് അഭിമാനിച്ചിരുന്ന കോണ്‍ഗ്രസുകാരെ കടത്തിവെട്ടി മോഡി ചൂലുമെടുത്ത് ഭാരതം വൃത്തിയാക്കാന്‍ ഇറങ്ങി. ഇത് കോണ്‍ഗ്രസുകാര്‍ക്ക് സഹിക്കാവുന്നതിലും അപ്പുറമായിരുന്നു. ഇപ്പോള്‍ നെഹ്‌റു കുടുംബത്തിലെ തലതൊട്ടപ്പനായ സാക്ഷാല്‍ നെഹ്‌റുവിനെ ഒപ്പം കൂട്ടുകയാണ് മോഡി.
കഴിഞ്ഞ തവണ നെഹറുവിന്റെ ജന്‍മദിനാഘോഷങ്ങള്‍ക്ക് മന്‍മോഹന്‍ സിംഗായിരുന്നു നേതൃത്വം നല്‍കിയിരുന്നത്. ഇത്തവണ ആഘോഷ കമ്മിറ്റിയില്‍ ഗാന്ധി കുടുംബത്തില്‍ നിന്നുള്ള ആരുമില്ലെന്നതാണ് മറ്റൊരു പ്രത്യേകത.
നരേന്ദ്രമോഡിക്കൊപ്പം കമ്മിറ്റിയില്‍ കോണ്‍ഗ്രസ് നേതാക്കളായ ഗുലാം നബി ആസാദ്, മല്ലികാര്‍ജുന്‍ ഖാര്‍ഗെ, കിരണ്‍ സിംഗ് എന്നിവരുമുണ്ട്. ആഘോഷ പരിപാടികളെ കുറിച്ച് ചര്‍ച്ചചെയ്യാന്‍ ദീപാവലിക്കു ശേഷം കമ്മിറ്റിയുടെ ആദ്യ യോഗം ചേരും.
എന്തായാലും ശുചിത്വ ഭാരതത്തിനു ശേഷം മോഡി എന്ത് മാജിക്ക് കാട്ടുമെന്ന് കാത്തിരിക്കുകയാണ് കോണ്‍ഗ്രസുകാര്‍.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha