ലോക്സഭാ തെരെഞ്ഞടുപ്പ് ഏറെ അടുത്ത സാഹചര്യത്തില് കോണ്ഗ്രസിന്റെ ഡല്ഹിക്കയക്കാനുള്ള സാധ്യതപട്ടികയ്ക്ക് കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രനും രമേശ് ചെന്നിത്തലയും ഉമ്മന്ചാണ്ടിയും ചേര്ന്ന് രൂപം നല്കി, കോണ്ഗ്രസ് സ്ഥാനാര്ഥികളുടെ ഡല്ഹിക്ക് അയക്കുന്ന പട്ടിക ഇങ്ങനെ
ലോക്സഭാ തെരെഞ്ഞടുപ്പ് ഏറെ അടുത്ത സാഹചര്യത്തില് കോണ്ഗ്രസിന്റെ ഡല്ഹിക്കയക്കാനുള്ള സാധ്യതപട്ടികയ്ക്ക് കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രനും രമേശ് ചെന്നിത്തലയും ഉമ്മന്ചാണ്ടിയും ചേര്ന്ന് രൂപം നല്കി. കോണ്ഗ്രസ് സ്ഥാനാര്ഥി നിര്ണയചര്ച്ചകള് ഇനി ഡല്ഹിയിലേക്ക്. തിങ്കളാഴ്ചയാണ് അന്തിമപട്ടിക തയാറാക്കാന് ഡല്ഹിയില് സ്ക്രീനിങ് കമ്മിറ്റി യോഗം ചേരുക.
ഇന്ദിരഭവനില് രണ്ടരമണിക്കൂറോളം നീണ്ട ചര്ച്ചകള്ക്കൊടുവിലാണ് സാധ്യതപട്ടികയ്ക്ക് രൂപമായത്. സിറ്റിങ് സീറ്റുകളില് വയനാട് ഒഴിച്ചുളള മണ്ഡലങ്ങളിലെല്ലാം നിലവിലുള്ള എംപിമാരുടെ പേരുകളേ ഉള്ളൂ. ആലപ്പുഴയില് കെ.സി.വേണുഗോപാലും വടകരയില് മുല്ലപ്പള്ളി രാമചന്ദ്രനും മല്സരിക്കുന്ന കാര്യത്തില് ഹൈക്കമാന്ഡ് അന്തിമ തീരുമാനമെടുക്കും. എറണാകുളത്ത് കെ.വി തോമസിനും പത്തനംതിട്ടയില് ആന്റോ ആന്റണിക്കും പകരം ആളെ നിര്ത്തുന്ന കാര്യത്തിലും ദേശീയനേതൃത്വത്തിന്റേതായിരിക്കും അന്തിമവാക്ക്.
വയനാട് കെ.മുരളീധരന് പുറമെ എം.എം. ഹസന്, ഷാനിമോള് ഉസ്മാന് എന്നിവരുടെ പേരും പരിഗണിക്കുന്നുണ്ട്. ആറ്റിങ്ങല് അടൂര് പ്രകാശ്, ചാലക്കുടി ബെന്നി ബഹനാന്, തൃശൂര് വി.എം സുധീരന്, ടി.എന് പ്രതാപന്, ആലത്തൂര് രമ്യഹരിദാസ്, സി.സി ശ്രീകുമാര്, പാലക്കാട് വി.കെ ശ്രീകണ്ഠന്, ഇടുക്കി ഉമ്മന്ചാണ്ടി, ജോസഫ് വാഴയ്ക്കന്, ഡീന് കുര്യാക്കോസ്, കാസര്കോട് സുബയ്യ റൈ, എ.പി അബ്ദുള്ളക്കുട്ടി, കണ്ണൂര് കെ.സുധാകരന് തുടങ്ങിയവര് സാധ്യത പട്ടികയിലുണ്ട്.
മുന് കെ.പി.സി സി പ്രസിഡന്റുമാരോടും വി.ഡി.സതീശനോടും അന്തിമഘട്ട ചര്ച്ച നടക്കുമ്പോള് ഡല്ഹിയില് ഉണ്ടാകണമെന്ന് ദേശീയ നേതൃത്വം ആവശ്യപ്പെട്ടിട്ടുണ്ട്. സ്ക്രിനിങ് കമ്മിറ്റി യോഗത്തിനായി നാളെ വൈകിട്ട് നേതാക്കള് ഡല്ഹിക്കുപോകും.
വടകരയില് സി.പി.എം, പി.ജയരാജനെ സ്ഥാനാര്ത്ഥിയാക്കിയതോടെ യു. ഡി.എഫുമായി നീക്കുപോക്കിനൊരുങ്ങി ആര്.എം.പി. വടകര ഉള്പ്പെടെയുള്ള സ്ഥലങ്ങളില് പാര്ട്ടി നിലപാട് സ്വീകരിക്കാന് ആര്.എം.പി നേതൃയോഗം ഇന്ന് ചേരും. കെ.കെ രമ മത്സരിക്കണമെന്ന് പ്രവര്ത്തകര്ക്കിടയില് ആവശ്യം ഉയര്ന്നിട്ടുണ്ട്.
വടകരയില് അടവ് നയത്തിനുള്ള ഒരുക്കത്തിലാണ് ആര്.എം.പി. അക്രമ രാഷ്ടീയം ചൂണ്ടി കാട്ടി കോണ്ഗ്രസുമായുള്ള നീക്കുപോക്ക് ആലോചിക്കുന്നു. യു.ഡി.എഫിന് പിന്തുണ നല്കുന്നത് പാര്ട്ടിക്കുള്ളില് തന്നെ എതിര്പ്പുണ്ടാക്കുമെന്നതിനാല് പൊതുസ്വതന്ത്രനെ നിര്ത്താനും നീക്കമുണ്ട്. രമയെ മത്സരിക്കണമെന്ന ആവശ്യം പാര്ട്ടിയ്ക്കുള്ളില് ശക്തമാണ്. ഇന്ന് ചേരുന്ന നേതൃയോഗത്തില് ഇക്കാര്യത്തിലും തീരുമാനമായേക്കും. ലോക്സഭാ തെരഞ്ഞെടുപ്പില് നാല് മണ്ഡലങ്ങളില് മത്സരിക്കാനാണ് ആര്.എം.പി തീരുമാനം.
"
https://www.facebook.com/Malayalivartha
