ലാദന്റെ വഴിയേ അന്ത്യയാത്ര... ഐഎസ് തലവന് അബൂബക്കര് അല് ബഗ്ദാദി കൊല്ലപ്പെടുമ്പോള് യുഎസ് ഇല്ലാതാക്കിയത് ഒരു തലമുറയെ തകര്ത്ത കൊടും ഭീകരന്; ഇറാഖിലെയും സിറിയയിലെയും പ്രധാന പ്രദേശങ്ങളെല്ലാം കീഴടക്കി കിരീടം വയ്ക്കാത്ത രാജാവായി ബഗ്ദാദി വിലസിയപ്പോള് ലോകം ഒന്നാകെ വിറച്ചു
ഭീകരസംഘടന ഐഎസ് തലവന് അബൂബക്കര് അല് ബഗ്ദാദി (48) കൊല്ലപ്പെട്ടെന്ന വാര്ത്ത സ്ഥിരീകരിച്ചു കഴിഞ്ഞു. സിറിയയില് ഇന്നലെ പുലര്ച്ചെ നടത്തിയ സൈനിക നടപടിക്കൊടുവില്, ബഗ്ദാദി സ്വയം പൊട്ടിത്തെറിക്കുകയായിരുന്നുവെന്നു യുഎസ് പ്രസിഡന്റ് ഡോണള്ഡ് ട്രംപ് തന്നെയാണ് വെളിപ്പെടുത്തിയത്. തുര്ക്കി അതിര്ത്തിയോടു ചേര്ന്ന് വടക്കുപടിഞ്ഞാറന് സിറിയയിലെ ഇദ്ലിബ് പ്രവിശ്യയിലെ ബാരിഷ ഗ്രാമത്തില് ബഗ്ദാദിയുടെ ഒളിത്താവളം യുഎസ് വളയുകയായിരുന്നു. പിടിക്കപ്പെടുമെന്നായപ്പോള്, സ്വയം നടത്തിയ സ്ഫോടനത്തില് ബഗ്ദാദിയും 3 കുട്ടികളും ഉള്പ്പെടെ കൊല്ലപ്പെട്ടതായി ടിവി സന്ദേശത്തില് ട്രംപ് പറഞ്ഞു.
വളരെ തന്ത്രപരമായാണ് ബഗ്ദാദിയെ അമേരിക്ക കുരുക്കിയത്. ബഗ്ദാദിയുടെ ഒളിയിടത്തെപ്പറ്റിയുള്ള വ്യക്തമായ വിവരങ്ങള് അമേരിക്കന് സേനയ്ക്ക് കൈമാറിയത് ഇറാഖ് രഹസ്യാന്വേഷണ ഏജന്സിയാണ്. ബാഗ്ദാദിയെ കണ്ടെത്താന് ഒരു വര്ഷമായി പ്രത്യേകസംഘങ്ങളെ നിയോഗിച്ചിരുന്നു. ഈ സംഘങ്ങള് ശേഖരിച്ച വിവരങ്ങളെ അടിസ്ഥാനമാക്കിയാണ് അമേരിക്കന് കമാന്ഡോകള് ഒളിയിടം കണ്ടെത്തിയതും ആക്രമണം നടത്തിയതും. എട്ടു വര്ഷം മുന്പ് ഉസാമ ബിന് ലാദനെ ഉന്മൂലനം ചെയ്യാന് യുഎസ് സൈന്യം നടപ്പാക്കിയ 'ഓപ്പറേഷന് ജെറോനിമോ'യെ ഓര്മിപ്പിച്ചു സിറിയയിലെ ആക്രമണവും. അമേരിക്കയുടെ ഓപ്പറേഷന് ഒബ്ളിട്രേഷന് ഒടുവില് ബാഗ്ദാദിയേയും വധിക്കുകയായിരുന്നു.
ഐഎസിന്റെ ഭീകരത പടര്ന്നു പന്തലിച്ചത് വടക്കന് സിറിയ മുതല് ഇറാഖിലെ മൊസൂള് വരെ നീളുന്ന ടൈഗ്രിസ്, യൂഫ്രട്ടിസ് നദീതടത്തിലാണ്. ഈ പ്രദേശത്തെ ലക്ഷക്കണക്കിനു ജനങ്ങളെ ഐഎസിന്റെ തടവിലാക്കിയാണ് 2014ല് അബൂബക്കര് അല് ബഗ്ദാദി തന്റെ ഭരണകൂടം പ്രഖ്യാപിച്ചത്. ഏറ്റവും ശക്തിയാര്ജിച്ച സമയം ഐഎസിന്റെ നിയന്ത്രണം ഇറാഖ് തലസ്ഥാനമായ ബാഗ്ദാദിനു സമീപം വരെയെത്തി. 34,000 ചതുരശ്ര മൈല് വിസ്തീര്ണമുള്ള പ്രദേശത്ത് പൂര്ണ നിയന്ത്രണം. ഇതിനൊപ്പം അനുഭാവികളും സ്ലീപ്പര് സെല്ലുകളുമായി ലോകത്തിന്റെ വിവിധ ഭാഗങ്ങളിലേക്കും ഐഎസ് വല നീണ്ടു. ഇത് ഇറാഖിനും ഭീതിയായി. ഇത് മനസ്സിലാക്കിയാണ് ഇറാഖും അമേരിക്കയ്ക്ക് ഒപ്പം ചേര്ന്നത്. ഇങ്ങനെ ഇറാഖില് ജനിച്ച ബഗ്ദാദിയെ ഇല്ലാതാക്കാനുള്ള യുദ്ധത്തില് ഇറാഖും നിര്ണ്ണായക പങ്കുവഹിച്ചു.
ബഗ്ദാദിയുടെ ജീവിതം കൗതുകമുളവാക്കുന്നതാണ്. കാഴ്ചശക്തി കുറവായതിനാല് സൈന്യത്തില് ചേരാന് പറ്റാതിരുന്ന അബൂബക്കര് അല് ബഗ്ദാദി പിന്നീട് അല് ഖായിദയില് ചേര്ന്നു. ഒടുവില് അല് ഖായിദയേക്കാള് ലോകത്തെ ഭയപ്പെടുത്തിയ ഐഎസിനു രൂപം നല്കി. ഇറാഖിലെയും സിറിയയിലെയും പ്രധാന പ്രദേശങ്ങളെല്ലാം കീഴടക്കി അതിന്റെ ഭരണാധികാരിയായി സ്വയം പ്രഖ്യാപിച്ചു. 1971ല് ഇറാഖിലെ സമാരയിലായിരുന്നു ജനനം. യുഎസിന്റെ ഇറാഖ് അധിനിവേശകാലത്ത് 2003ല് ബഗ്ദാദി പിടിയിലായതായിരുന്നു. എന്നാല് ഒരു വര്ഷത്തിനു ശേഷം മോചിതനായി. ബഗ്ദാദി പടിപടിയായി വളര്ന്ന് 2010ല് അല് ഖായിദയുടെ ഇറാഖ് മേഖലാ കമാന്ഡറായി. അല് ഖായിദയുടെ ഈ വിഭാഗമാണു പിന്നീട് ഇസ്ലാമിക് സ്റ്റേറ്റ് ഓഫ് ഇറാഖ് ആന്ഡ് സിറിയ അഥവാ ഐഎസ്ഐഎസ് ആയി വളര്ന്നത്. യുഎസ് 2011ല് ബഗ്ദാദിയെ ആഗോള ഭീകരനായി പ്രഖ്യാപിച്ചു. ജീവനോടെയോ അല്ലാതെയോ പിടികൂടിയാല് ഒരു കോടി ഡോളറും വാഗ്ദാനം ചെയ്തു. 2016ല് തുക രണ്ടരക്കോടി ഡോളറായി വര്ധിപ്പിച്ചു.
ബാഗ്ദാദിയെ വധിക്കാന് യു.എസ്. പ്രത്യേക കമാന്ഡോകള് നടത്തിയ ഓപ്പറേഷന്റെ നടുക്കത്തിലാണ് സമീപത്ത് താമസിക്കുന്നവര്. രാത്രിയോടെയാണ് യു.എസ്. കമാന്ഡോവിഭാഗം ഓപ്പറേഷന് ആരംഭിച്ചത്. ആക്രമണശബ്ദം കേട്ടാണ് സ്ഥലത്ത് ആളുകൂടിയത്. ഹെലികോപ്റ്ററില് വീടും പുറത്തുണ്ടായിരുന്ന കാറും ലക്ഷ്യമാക്കിയാണ് ആക്രമണം നടത്തിയത്. മൂന്നു മണിക്കൂറോളം നീണ്ടു. അവസാനം യു.എസ്. പ്രസിഡന്റ് ഡൊണാള്ഡ് ട്രംപിന്റെ പ്രഖ്യാപനത്തോടെയാണ് സമീപത്ത് രഹസ്യമായി താമസിച്ചത് ബഗ്ദാദിയാണെന്ന് അറിയുന്നത്.
https://www.facebook.com/Malayalivartha
