ചിത്തിര ആട്ട വിശേഷ പൂജകള് പൂര്ത്തിയാക്കി ശബരിമല നട അടച്ചു...
ആയിരങ്ങള്ക്ക് ദര്ശനസുകൃതത്തിന്റെ പൊന്കിരണമായി ചിത്തിര ആട്ട വിശേഷ പൂജകള് പൂര്ത്തിയാക്കി ശബരിമല നട അടച്ചു. സന്നിധാനത്ത് ഞായറാഴ്ച സഹശ്രകലശം, കളകാഭിഷേകം, പടിപൂജ എന്നിവ നടന്നു. തന്ത്രി കണ്ഠരര് മഹേഷ് മോഹനരുടെ കാര്മ്മികത്വത്തിലായിരുന്നു ചടങ്ങുകള്. വാദ്യഘോഷങ്ങളുടെയും ശരണംവിളികളുടെയും അകമ്ബടിയോടെ ആഘോഷമായാണ് ബ്രഹ്മകലശം ശ്രീകോവിലില് എത്തിച്ചത്. ആയിരക്കണക്കിനു സ്വാമിമാര് ശബരീശനെ സ്തുതിച്ചു നില്ക്കെ തന്ത്രി അയ്യപ്പ വിഗ്രഹത്തില് കളഭാഭിഷേകം നടത്തി.
അഭിഷേകം ചെയ്ത കളഭം ഭക്തര്ക്ക് പ്രസാദമായും നല്കി. നട അടച്ചതോടെ നിലവിലെ ശബരിമല, മാളികപ്പുറം, മേല്ശാന്തിമാരായ വി.എന് വാസുദേവന്, നമ്ബൂതിരിയുടെയും എം എന് നാരായണന് നമ്പൂതിരിയുടെയും ശ്രീകോവിലിലെ പൂജകള് പൂര്ത്തിയായി. മണ്ഡലകാലത്തിനായി നടതുറക്കുന്ന നവംബര് 16 ന് ഇരുവരും നട തുറക്കുക മാത്രമാണ് ചെയ്യുക.
തുടര്ന്ന് അടുത്ത മേല്ശാന്തിമാരുടെ അവരോധന കലശമാടി മലയിറങ്ങും. ചിത്തിര ആട്ട വിശേഷത്തിന് ഒക്ടോബര് 26 ന് വൈകീട്ട് ആണ് ശബരിമല നട തുറന്നത്. തന്ത്രിയുടെ കാര്മ്മികത്വത്തില് മേല്ശാന്തി വി.എന് വാസുദേവന് നമ്പൂതിരി ക്ഷേത്ര നട തുറന്ന് നെയ്യ് തെളിയിച്ചു. കവടിയാര് കൊട്ടാരത്തില് നിന്നും കൊണ്ട് വന്ന നെയ്യ് ഉപയോഗിച്ച് അഭിഷേകം ചെയ്യുന്നതായിരുന്നു പ്രധാന ചടങ്ങ്.
https://www.facebook.com/Malayalivartha
