ചേര്‍ത്തലയിലെ തൈക്കാട്ടുശേരി, പാണാവള്ളി പഞ്ചായത്തുകളിലെ പതിമൂന്നോളം സ്‌കൂളുകളില്‍ വിതരണം ചെയ്യാന്‍ എത്തിച്ച പഴകിയ അരി ഇറക്കാനുള്ള ശ്രമം തൊഴിലാളികള്‍ തടഞ്ഞു.

പ്രസ്തുത സ്‌കൂളുകളിലേക്കുള്ള അരി വിതരണം ചെയ്യുന്നത് പൂച്ചാക്കല്‍ സപ്ലൈക്കോയില്‍ നിന്നാണ്. ലോഡ് ഇറക്കുമ്പോളാണ് അരിയുടെ നിലവാരം തൊഴിലാളികളുടെ ശ്രദ്ധയില്‍പ്പെട്ടത്. ഇതിനെ തുടര്‍ന്ന് തൊഴിലാളികള്‍ അരിയിറക്കാന്‍ വിസമ്മതിക്കുകയായിരുന്നു.

സംഭവം വിവാദമായതോടെ നാട്ടുകാരെത്തി അരി പരിശോധിച്ചു. അപ്പോള്‍ അരിയില്‍ ചെറിയ പ്രാണികളുണ്ടെന്നും പൂപ്പല്‍ പിടിച്ച പഴകിയ അരിയാണെന്നും മനസിലായി. തുടര്‍ന്ന് നാട്ടുകാര്‍ ഭക്ഷ്യ സിവില്‍ സപ്ലൈസ് മന്ത്രി പി.തിലോത്തമനെ വിവരം അറിയിച്ചു. മന്ത്രിയുടെ ഇടപെടലിനെ തുടര്‍ന്ന് അരി ഇറക്കാതെ ചേര്‍ത്തലയിലെ ഗോഡൗണിലേക്ക് തിരിച്ചയച്ചു.

ആലപ്പുഴ, മാവേലിക്കര എഫ്‌സിഐ ഗോഡൗണില്‍ നിന്നും ചേര്‍ത്തല ഗോഡൗണില്‍ എത്തിച്ച് അവിടെ നിന്നാണ് അരി സ്‌കൂളുകള്‍ക്ക് വിതരണം ചെയ്യുന്നത്. ട്രെയിനുകളില്‍ നിന്നു ഇറക്കുമ്പോഴും ലോറികളില്‍ കയറ്റുമ്പോഴുമായി പൊട്ടിവീഴുന്ന ചാക്കുകളിലെ അരി മറ്റൊരു ചാക്കിലേക്ക് മാറ്റുമ്പോഴാണ് പ്രാണികളും മറ്റു മാലിന്യങ്ങളും കടന്നു കൂടുന്നതെന്നു പറയുന്നു.

കൂടാതെ ശാസ്ത്രിയമായ രീതിയില്‍ അരി സൂക്ഷിക്കാതെയും യഥാസമയം വിതരണം ചെയ്യാതെയും ഗോഡൗണുകളില്‍ ഇരുന്നു പോകുമ്പോഴും അരി മോശമാകാറുണ്ട്. സിവില്‍ സപ്ലൈസ് ഉദ്യോഗസ്ഥര്‍ നിലവാരം പരിശോധിച്ച് മാര്‍ക്ക് ചെയ്യുന്ന അരിയാണ് വെയര്‍ഹൗസില്‍ എത്തുക. അരിയുടെ ഗുണനിലവാരം പരിശോധിച്ച് മാത്രമേ റേഷന്‍ കടകളിലേക്കും സ്‌കൂളുകള്‍ക്കും അരി നല്‍കാന്‍ പാടുള്ളൂ. എന്നാല്‍ ഗോഡൗണുകളില്‍ നിന്നു ഇതു ചെയ്യുന്നില്ലാ എന്ന് ആക്ഷേപം ഉണ്ട്. ഉപയോഗ യോഗ്യമല്ലാത്ത അരി വിതരണം ചെയ്യുന്നതിനെതിരെ പ്രതിഷേധം ഉയര്‍ന്നിട്ടുണ്ട്.