പയ്യന്നൂരില്നിന്നു കാണാതായ മുതിര്ന്ന പൗരനെ തിരിച്ചറിയാതിരുന്നതിനെ തുടര്ന്ന് അജ്ഞാത മൃതദേഹമെന്ന് കരുതി മംഗളൂരുവില് സംസ്കരിച്ചു
പയ്യന്നൂരില്നിന്നും ഈ മാസം 12 മുതല് കാണാതായ വയോധികന് മംഗളൂരുവില് മരിച്ചു. ആളെ തിരിച്ചറിയാന് പറ്റാതിരുന്നതിനെ തുടര്ന്ന് പോലീസ് മംഗളൂരുവില് സംസ്കരിച്ചു.ഈ മാസം 12 മുതല് കാണാതായ പാണപ്പുഴ പറവൂര് മണികണ്ഠപുരം സ്വദേശി പി.ആര്. സുകുമാരന് നായര് (84) ആണ് മരിച്ചത്.
പയ്യന്നൂരിലെ ജുജു ഇന്റര്നാഷണല് ഹോട്ടലില് ബന്ധുവിന്റെ വിവാഹ നിശ്ചയത്തിനു പങ്കെടുക്കാനെത്തിയതിനു പിന്നാലെയാണ് സുകുമാരന് നായരെ കാണാതായത്. സൂചന ലഭിച്ചതിനെ തുടര്ന്ന് മംഗളൂരുവിലെത്തിയ ബന്ധുക്കളാണ് മരിച്ചത് പി.ആര്. സുകുമാരന് നായരാണെന്ന് സ്ഥിരീകരിച്ചത്.
ബന്ധുക്കളുടെ പരാതിയെ തുടര്ന്ന് പോലീസ് നടത്തിയ അന്വേഷണത്തില് പതിനൊന്നേകാലോടെ പയ്യന്നൂര് റെയില്വേ സ്റ്റേഷനിലെത്തിയതായി വിവരം ലഭിച്ചെങ്കിലും മറ്റു വിവരങ്ങളൊന്നും കിട്ടിയില്ല. മംഗളൂരു പനമ്പൂര് പോലീസ് സ്റ്റേഷന് പരിധിയില് വയോധികന് മരിച്ചതായുള്ള സന്ദേശം കഴിഞ്ഞ ദിവസം നാട്ടിലെ പോലീസുകാരുടെ വാട്ട്സ്ആപ്പില് കിട്ടിയിരുന്നു. ഇതേത്തുടര്ന്നാണ് ബന്ധുക്കള് ശനിയാഴ്ച പനമ്പൂര് പോലീസ് സ്റ്റേഷനിലെത്തിയത്.
കാണാതായ അന്ന് വൈകുന്നേരം സ്റ്റേഷന് പരിധിയിലെ തുറമുഖത്തിനടുത്തു മരിച്ച നിലയില് കണ്ടെത്തിയെന്നാണ് പനമ്പൂര് പോലീസ് അറിയിച്ചത്. ഇന്ക്വസ്റ്റ് നടപടികള് പൂര്ത്തിയാക്കി മോര്ച്ചറിയിലേക്കു മാറ്റിയിരുന്നതായും രണ്ടാഴ്ച കഴിഞ്ഞിട്ടും ആരുമെത്താതിരുന്നതിനാല് വെള്ളിയാഴ്ച മൃതദേഹം മംഗളൂരുവില് സംസ്കരിച്ചതായും പോലീസ് ബന്ധുക്കളെ അറിയിച്ചു. ഷര്ട്ട്, വെപ്പു പല്ല് ഉള്പ്പടെയുള്ള വസ്തുക്കള് ബന്ധുക്കള് തിരിച്ചറിയുകയായിരുന്നു.
https://www.facebook.com/Malayalivartha
