കോവിഡ് 19 വൈറസ് ബാധയെ തുടർന്ന് ലോകംതന്നെ പ്രതിരോധത്തിലാണ്. കേരളത്തിൽ രോഗത്തെ പ്രതിരോധിക്കാൻ ഒന്നടങ്കം പ്രയത്നിക്കുകയാണ് ആരോഗ്യവകുപ്പ്. പത്തനംതിട്ടയില്‍ ഒന്‍പത് പേര്‍ക്ക് കൂടി കോവിഡ് ഇല്ലെന്ന് സ്ഥിരീകരിച്ചിരിക്കുകയാണ്. ഇതിനിടയിൽ കോവിഡ് സംശയത്തെ തുടര്‍ന്ന് പത്തനംതിട്ടയില്‍ നിരീക്ഷണത്തിലായിരുന്ന തമിഴ്നാട് സ്വദേശി മുങ്ങി. പത്തനംതിട്ടയില്‍ വാടകയ്ക്ക് താമസിക്കുന്നയാളാണ് അധിക‌ൃതരുടെ അനുവാദമില്ലാതെ കടന്നുകളഞ്ഞത്.

തോട്ടപ്പുഴയിലാണ് ഇയാള്‍ വാടകയ്ക്ക് താമസിച്ചത്. വീട്ടില്‍ നിരീക്ഷണത്തിലായിരുന്ന ഇയാള്‍ ആരോ​ഗ്യ വകുപ്പ് അധികൃതരെ അറിയിക്കാതെ മുങ്ങുകയായിരുന്നു. മധുരയില്‍ എത്തിയതായി സുഹൃത്തിനെ വിളിച്ച്‌ അറിയിച്ചിട്ടുണ്ടെന്ന് പഞ്ചായത്ത് പ്രസിഡന്റ് പറഞ്ഞു.

നേരത്തെ ചൈനയില്‍ നിന്നെത്തി വീട്ടില്‍ നിരീക്ഷണത്തില്‍ കഴിയുന്ന പത്തനംതിട്ട സ്വദേശിയായ വിദ്യാര്‍ത്ഥിയുടെ അച്ഛന്‍ മരിച്ചത് കോവിഡ് വൈറസ് ബാധിച്ചല്ലെന്ന് തെളിഞ്ഞിരുന്നു. പരിശോധനയിലാണ് ഇക്കാര്യം വ്യക്തമായത്. മറ്റ് രോ​ഗങ്ങള്‍ക്ക് കൊച്ചിയില്‍ ചികിത്സയിലിരിക്കെയാണ് ഇയാള്‍ മരിച്ചത്.

ചൈനയില്‍ നിന്നെത്തി പത്ത് ദിവസമായി വീട്ടില്‍ നിരീക്ഷണത്തില്‍ ഉണ്ടായിരുന്ന കുട്ടിയുടെ അച്ഛനാണ് മരിച്ചത്. ഇവര്‍ തമ്മില്‍ സമ്ബര്‍ക്കം ഉണ്ടായിരുന്നില്ലെന്നാണ് പ്രാഥമിക വിലയിരുത്തല്‍. സംസ്‌കാരം ഉള്‍പ്പടെയുള്ള ചടങ്ങുകള്‍ പ്രോട്ടോകള്‍ പ്രകാരം നടത്താനാണ് തീരുമാനം.

അതേസമയം കോവിഡ് 19 സംശയിക്കുന്നതിന്‍റെ ഭാഗമായി വീട്ടില്‍ നിരീക്ഷണത്തിലുണ്ടായിരുന്ന ആള്‍ നിര്‍ദേശം അവഗണിച്ച്‌ പുറത്തിറങ്ങി അപകടത്തില്‍പെട്ടു. ഗുരുതരമായി അപകടത്തില്‍പെട്ട് കൊല്ലം ജില്ലാ ആശുപത്രിയിലും തിരുവനന്തപുരം മെഡിക്കല്‍ കോളേജ് ആശുപത്രിയിലുമെത്തിച്ചെങ്കിലും നിരീക്ഷണത്തിലായിരുന്ന വിവരം ആദ്യം അറിയിച്ചില്ല. ഇതോടെ ഇയാളെ പരിചരിച്ച രണ്ട് ആശുപത്രികളിലേയും ഡോക്ടര്‍മാരുള്‍പ്പെടെ 50ലേറെപ്പേരെ വീടുകളിലും ആശുപത്രികളിലും നീരീക്ഷണത്തിലാക്കി . അപകടത്തില്‍പെട്ട ആളുടെ സ്രവ പരിശോധനഫലം വൈകിട്ടോടെ ലഭിക്കും.