നരേന്ദ്ര മോദി കഴിഞ്ഞാല്‍ സഖാക്കള്‍ക്ക് കണ്ട് കൂടാത്ത ഒരാളാണ് യോഗി ആദിത്യനാഥ്. എന്നാല്‍ യുപിയുടെ വളര്‍ച്ച തുറന്ന് കാട്ടുകയാണ് കിറ്റക്‌സ് മാനേജിംഗ് ഡയറക്ടര്‍ സാബു എം. ജേക്കബ്. തുടര്‍ച്ചയായ പരിശോധനകളിലൂടെ തകര്‍ക്കുന്നെന്ന ആക്ഷേപമാണ് സാബു ജേക്കബിനുള്ളത്

കിറ്റക്‌സ് അപ്പാരല്‍ പാര്‍ക്ക് കേരളത്തില്‍ ആരംഭിക്കേണ്ടെന്ന് തീരമാനമെടുത്തു എന്ന വാര്‍ത്തകള്‍ക്ക് പിന്നാലെ നിക്ഷേപ സൗഹൃദ സംസ്ഥാനങ്ങളുടെ കൂട്ടത്തില്‍ യു.പിയെ എന്തുകൊണ്ട് എടുത്തു പറഞ്ഞു എന്ന് വ്യക്തമാക്കുകയാണ് സാബു ജേക്കബ്. നിക്ഷേപ സൗഹൃദ റാങ്കിംഗില്‍ പിന്നിലായിരുന്ന യു.പി എങ്ങനെ രണ്ടാം സ്ഥാനത്തെത്തി എന്ന് നാം മനസിലാക്കണം. അവിടെ മുഖ്യമന്ത്രി നേരിട്ടാണ് പുതിയ വ്യവസായങ്ങള്‍ക്ക് ക്ലിയറന്‍സ് നല്‍കുന്നത് എന്നും അദ്ദേഹം പറഞ്ഞു.

കേരളത്തിലെ ദുരനുഭവത്തിന് പിന്നാലെ തനിക്ക് തമിഴ്‌നാട്, ഗുജറാത്ത്, മദ്ധ്യപ്രദേശ്, ഒഡിഷ എന്നീ സംസ്ഥാനങ്ങളില്‍ നിന്നാണ് തനിക്ക് ക്ഷണം ലഭിച്ചത്. വ്യവസായികളെ സമീപിക്കുന്ന സമീപനമാണ് ഈ സംസ്ഥാനങ്ങളെല്ലാം കൈക്കൊളളുന്നത്. ഈ സംസ്ഥാനങ്ങളില്‍ നിന്നും തന്നെ വിളിച്ചവരില്‍ ഉന്നത ഉദ്യോഗസ്ഥര്‍ മുതല്‍ മന്ത്രിമാര്‍ വരെ ഉള്‍പ്പെടും. പുതിയ സാഹചര്യത്തില്‍ എന്നെ ക്ഷണിച്ച പലരും ചോദിച്ചത് പ്രത്യേകമായി എന്താണ് അനുവദിക്കേണ്ടതെന്നാണ്. ഇവിടെയാവട്ടെ പ്രത്യേകമായി ഒന്നും ലഭിക്കുന്നില്ലെന്ന യാഥാര്‍ത്ഥ്യം നിലനില്‍ക്കുന്നു എന്നും അദ്ദേഹം പറയുന്നു.

അതേസമയം, കേരളത്തില്‍ തുടര്‍ന്നാല്‍ 80 ശതമാനം സ്വന്തം കഴിവും നഷ്ടപ്പെടുമെന്നും സാബു പ്രതികരിച്ചു. അപ്പാരല്‍ പാര്‍ക്ക് എന്തായാലും കേരളത്തില്‍ വേണ്ടെന്നുവച്ചു. പീഡനം മാത്രമായിരുന്നു കഴിഞ്ഞ മാസം. ഒരു മാസമായി ഒരു ജോലിയും തനിക്ക് ചെയ്യാന്‍ കഴിഞ്ഞിട്ടില്ല. ഗള്‍ഫിലും മറ്റും പോയി സമ്പാദിക്കുന്ന പണം ഇവിടെ വ്യവസായം തുടങ്ങാന്‍ ചെലവഴിക്കുന്നവന് നഷ്ടം മാത്രമാണ് കിട്ടുന്നതെന്നും അദ്ദേഹം അഭിപ്രായപ്പെട്ടു.

കിറ്റെക്‌സ് കമ്പനിയില്‍ കഴിഞ്ഞ ഒരു മാസത്തിനിടെ വിവിധ വകുപ്പുകള്‍ 11 തവണകളായാണ് പരിശോധന നടത്തിയത്.
1) തൊഴില്‍ വകുപ്പ് 3 തവണ
2) ഫാക്ടറീസ് ആന്‍ഡ് ബോയിലേഴ്‌സ് വകുപ്പ് 1
3) തഹസീല്‍ദാര്‍ 1
4) ആരോഗ്യവകുപ്പ് 2
5) മലിനീകരണ നിയന്ത്രണ ബോര്‍ഡ് 3
6) ജില്ലാ മെഡിക്കല്‍ ഓഫിസര്‍ 1

ഇതില്‍ പതിനൊന്നാമത്തെ പരിശോധന 4 വകുപ്പുകള്‍ സംയുക്തമായാണ് നടത്തിയത്. ഈ പരിശോധനകള്‍ക്കൊന്നിനുശേഷവും എന്തെങ്കിലും കണ്ടെത്തിയതായി അവരാരും പറഞ്ഞതേയില്ല. ഒടുവില്‍ ഉദ്യോഗസ്ഥ പീഡനത്തെക്കുറിച്ച് ഞാന്‍ ജൂണ്‍ 29ന് പത്രക്കുറിപ്പ് ഇറക്കിയപ്പോള്‍ അന്നു വൈകീട്ടോടെ അവര്‍ കുറ്റം കണ്ടെത്തി. ഇതില്‍ തന്റെ കമ്പനിയുടെ മേല്‍ 7 കുറ്റങ്ങളാണ് ചാര്‍ത്തിയിരിക്കുന്നത്. ഈ ലംഘനങ്ങള്‍ കമ്പനിയില്‍നിന്നു കണ്ടെത്തിയതല്ല. അവ പാര്‍ട്ടി ഓഫിസിലിരുന്ന് എഴുതിച്ചേര്‍ത്തവയാണ്.

അതിന്റെ പൊള്ളത്തരം അതില്‍ കാണാം. അതിലൊന്ന് ഇതാണ്; മിനിമം കൂലി നിയമത്തിലെ സര്‍ക്കാര്‍ ഉത്തരവ് ലംഘിച്ചു. തൊഴില്‍ വകുപ്പില്‍നിന്ന് അസി. ലേബര്‍ ഓഫിസര്‍ നേരിട്ടുവന്ന് തന്ന നോട്ടനസിലാണ് ഇതു പറയുന്നത്.

2010ല്‍ നിശ്ചയിച്ച മിനിമം കൂലി അനുസരിച്ച് കേരളത്തിലെ ഗാര്‍മെന്റ് വ്യവസായ മേഖലയില്‍ ഒന്നാം ഗ്രേഡ് ടെയിലര്‍ക്ക്് നിശ്ചയിച്ച മിനിമം കൂലി 9240 രൂപയാണ്. എന്നാല്‍ കിറ്റെക്‌സില്‍ ഇതേ ഗ്രേഡില്‍ ജോലി ചെയ്യുന്നവര്‍ക്ക് നല്‍കുന്നത് 16,250 രൂപയാണ്. ഇതിനു പുറമെ 4 നേരം സൗജന്യ ഭക്ഷണവും സൗജന്യതാമസവും നല്‍കുന്നു. നിശ്ചയിച്ച കൂലിയേക്കാള്‍ 70 മുതല്‍ 90 ശതമാനം വരെ കൂടുതലാണിത്.

എന്നാല്‍ സര്‍ക്കാര്‍ പറയുന്നത് 2019ല്‍ പുതുക്കിയ മിനിമം കൂലി നല്‍കുന്നില്ല എന്നതാണ്. രാജ്യത്ത് ഒരിടത്തും നടപ്പാക്കാത്ത കൂലിയാണ് അതില്‍ പറയുന്നത്. അതു കോടതി സ്‌റ്റേ ചെയ്തതാണ്. അതിനാല്‍ ഇല്ലാത്ത മിനിമം കൂലിയുടെ പേരില്‍ കിറ്റെക്‌സിനു നല്‍കിയിരിക്കുന്ന നോട്ടിസ് പിന്‍വലിക്കണം എന്നും സാബു ജോര്‍ജ് പറഞ്ഞു.