ഉത്രയോട് കാണിച്ച സ്നേഹവും കരുതലും ..... ഉത്ര വധക്കേസില് ഭാര്യയെ കൊലപ്പെടുത്താന് പാമ്പിനെ ആയുധമാക്കിയതും പ്രതിയുടെ കുബുദ്ധിയും അത്യപൂര്വമാക്കുന്നെന്ന് പ്രോസിക്യൂഷന് കോടതിയില്...
ഉത്രയോട് കാണിച്ച സ്നേഹവും കരുതലും ..... ഉത്ര വധക്കേസില് ഭാര്യയെ കൊലപ്പെടുത്താന് പാമ്പിനെ ആയുധമാക്കിയതും പ്രതിയുടെ കുബുദ്ധിയും അത്യപൂര്വമാക്കുന്നെന്ന് പ്രോസിക്യൂഷന് കോടതിയില്...
ഭാര്യയെ കൊലപ്പെടുത്താന് പാമ്പിനെ ആയുധമാക്കിയതും പ്രതിയുടെ കുബുദ്ധിയും ഉത്ര വധക്കേസിനെ അത്യപൂര്വമാക്കുന്നെന്ന് പ്രോസിക്യൂഷന് കോടതിയില് വാദിച്ചു. രണ്ടുതവണ നിരാലംബയായ സ്ത്രീയില് ഏല്പ്പിച്ച സഹിക്കാനാകാത്ത വേദനയും കുറ്റകൃത്യം മൂടിവെക്കാന് ഉപയോഗിച്ച സര്പ്പകോപമെന്ന നിമിത്തും മാത്രമല്ല കൊലപാതകം നടപ്പാക്കാന്വേണ്ടി പ്രതി ഉത്രയോട് കാണിച്ച സ്നേഹവും കരുതലും അപൂര്വതകളായി കണക്കിലെടുക്കേണ്ടതുണ്ടെന്നും പ്രോസിക്യൂഷന് വാദിച്ചു.
ഉത്ര വധക്കേസില് പ്രോസിക്യൂഷന് ഭാഗം വാദം ആറാം അഡീഷണല് സെഷന്സ് ജഡ്ജി എം.മനോജ് മുന്പാകെയാണ് ആരംഭിച്ചത്. ഭിന്നശേഷിക്കാരിയായ ഭാര്യയെ ഒഴിവാക്കാനും അവരുടെ സ്വത്ത് നിലനിര്ത്താനുമായി കൊലപ്പെടുത്തുകയും അത് സര്പ്പകോപമാണെന്നു വരുത്തിത്തീര്ക്കാനുള്ള പ്രതിയുടെ ശ്രമവുമാണ് പ്രോസിക്യൂഷന് കേസെന്ന് സ്പെഷ്യല് പബ്ലിക് പ്രോസിക്യൂട്ടര് ജി.മോഹന്രാജ് കോടതിയെ ആമുഖമായി അറിയിച്ചു.
ഭാര്യയെ കൊലപ്പെടുത്തുകയെന്ന ലക്ഷ്യത്തോടെ സൂരജ് കരുതലും സ്നേഹവും അഭിനയിക്കുകയായിരുന്നു. ഭര്ത്താവിന്റേത് ആത്മാര്ഥസ്നേഹമാണെന്ന് ഉത്ര തെറ്റിദ്ധരിച്ചു. അതുകൊണ്ടാണ് കൊലപ്പെടുത്തുന്നതിനുമുന്പ് സൂരജ് നല്കിയ മയക്കുമരുന്നുകലര്ന്ന പാനീയം വിശ്വാസത്തോടെ വാങ്ങിക്കുടിച്ചത്.
ആദ്യം അണലിയെക്കൊണ്ട് കടിപ്പിച്ച് കൊല്ലാന് ശ്രമിച്ചു. അത് പരാജയപ്പെട്ട് ഉത്ര ആശുപത്രിയില് ചികിത്സയില് കഴിയുമ്പോള് സൂരജ് അടുത്ത പദ്ധതി തയ്യാറാക്കുകയായിരുന്നു. സര്പ്പശാസ്ത്രജ്ഞനായ മവീഷ്കുമാര്, വനംവകുപ്പ് ഉദ്യോഗസ്ഥന് മുഹമ്മദ് അന്വര്, വെറ്ററിനറി സര്ജന് ഡോ. കിഷോര്കുമാര്, ഫൊറന്സിക് മെഡിസിന് തിരുവനന്തപുരം എം.സി.എച്ച്. മേധാവി ഡോ. ശശികല എന്നിവരടങ്ങിയ വിദഗ്ധസമിതി മരണത്തിനിടയാക്കിയ പാമ്പുകടി സ്വാഭാവികമല്ലെന്നും കൊലപാതകമാണെന്നും വസ്തുതകള് പരിശോധിച്ചു കണ്ടെത്തിയിരുന്നു. പാമ്പുകളെ കൈകാര്യം ചെയ്യുന്നതില് വിദഗ്ധനായ വാവാസുരേഷും ഇക്കാര്യം അറിയിച്ചു.
മൂര്ഖന്പാമ്പിന് ഉത്ര കിടന്ന മുറിയില് കയറാനുള്ള പഴുതുകള് ഇല്ലായിരുന്നെന്നും ജന്നല്വഴി കയറാനുള്ള സാധ്യതയില്ലെന്നും എല്ലാ വിദഗ്ധ സാക്ഷികളും മൊഴിനല്കിയിരുന്നു. മൂര്ഖന് സാധാരണഗതിയില് മനുഷ്യരെ പ്രകോപനമില്ലാതെ കടിക്കാറില്ല. പുലര്ച്ചേ ഇതിന് ഉത്സാഹമുണ്ടാകില്ലെന്നും തെളിവുകളെ ഉദ്ധരിച്ച് പ്രോസിക്യൂഷന് കോടതിയെ അറിയിച്ചു.
മയക്കുമരുന്ന് ഉള്ളില്ച്ചെന്ന് ഉറങ്ങിക്കിടന്ന ഉത്രയെ മൂര്ഖന് ഒരു കാരണവുമില്ലാതെ രണ്ടുപ്രാവശ്യം കൊത്തിയെന്നത് വിശ്വസനീയമല്ല. രണ്ടു കടിപ്പാടുകള് തമ്മിലുള്ള അസാധാരണ വലിപ്പവ്യത്യാസം പാമ്പിന്റെ തലയില് പിടിച്ചമര്ത്തിയാലാണ് ഉണ്ടാകുന്നത്. ഇതു തെളിയിക്കാനായി ഡമ്മി പരീക്ഷണം നടത്തിയ ചിത്രം കോടതിയില് പ്രദര്ശിപ്പിച്ചു.
മൂര്ഖന് പാമ്പിന്റെ തലയില് പിടിച്ചമര്ത്തുമ്പോള് പല്ലുകള് വികസിക്കുന്ന ചിത്രമാണ് കോടതിയില് പ്രദര്ശിപ്പിച്ചത്. പ്രതി സൂരജിനെ വീഡിയോ കോണ്ഫറന്സ് വഴിയാണ് വിചാരണയില് പങ്കെടുപ്പിച്ചത്. പ്രോസിക്യൂഷനുവേണ്ടി അഭിഭാഷകരായ കെ.ഗോപീഷ്കുമാര്, സി.എസ്.സുനില് എന്നിവരും ഹാജരായി. കേസിലെ തുടര്വാദം അഞ്ചിന് നടക്കും.
"
https://www.facebook.com/Malayalivartha
