ബി ജെ പി. സംസ്ഥാന അധ്യക്ഷന്‍ കെ സുരേന്ദ്രനെതിരെ നടത്തുന്ന നീക്കങ്ങള്‍ക്ക് പോലീസിന് ഉപദേശം ലഭിക്കുന്നത് എ. കെ. ജി. സെന്ററില്‍ നിന്നെന്ന് സൂചന. സുരേന്ദ്രനെ കുരുക്കാന്‍ എ.കെ.ജി. സെന്ററില്‍ തയ്യാറാകുന്ന തിരക്കഥ അനുസരിച്ചാണ് പോലീസ് പെരുമാറുന്നത്. സുരേന്ദ്രന്റെ ഭാവി തീരുമാനിക്കാന്‍ എ. കെ. ജി സെന്ററില്‍ ജീവനക്കാരെ നിയമിച്ചിട്ടുണ്ടെന്നാണ് റിപ്പോര്‍ട്ട്.

സുരേന്ദ്രനെ ഇല്ലാതാക്കാനുള്ള ശ്രമങ്ങളാണ് സി പി എം നടത്തുന്നത്. ബിജെപി അദ്ധ്യക്ഷനെ വളഞ്ഞിട്ട് ആക്രമിക്കുന്നതിലൂടെ സര്‍ക്കാര്‍ ലക്ഷ്യമിടുന്നത് ബി ജെ പിയെയാണ് .ശബരിമല പ്രക്ഷോഭകാലത്താണ് സുരേന്ദ്രനെ സര്‍ക്കാര്‍ വേട്ടയാടാന്‍ തുടങ്ങിയത്. പിണറായി സര്‍ക്കാര്‍ സുരേന്ദ്രനെ മാത്രം ജയിലിലടച്ചത് അദ്ദേഹത്തോടുള്ള ഭയം കൊണ്ടാണ്. കൊടകരക്കുഴല്‍പ്പണക്കേസില്‍ ഹാജരാകാന്‍ ആവശ്യപ്പെട്ട് പൊലീസ് നോട്ടീസ് നല്‍കിയതിന്റെ പിന്നിലും സുരേന്ദ്രനെ നിശ്ശബ്ദനാക്കാനുള്ള പിണറായി സര്‍ക്കാരിന്റെ ഗൂഢാലോചനയാണുള്ളത്.

കെ. സുരേന്ദ്രന്‍ എന്ന ബി.ജെ.പി അദ്ധ്യക്ഷന്റെ വാക്കുകള്‍ക്ക് കേരളത്തില്‍ ലഭിക്കുന്ന വലിയ സ്വീകാര്യത പിണറായി സര്‍ക്കാറിനെ അലോസരപ്പെടുത്തുന്നു.

ആത്മാര്‍ത്ഥമായ ഇടപെടലുകളും വിട്ടു വീഴ്ചയില്ലാത്ത സമരവീര്യവും കൊണ്ടാണ് കെ.സുരേന്ദ്രന്‍ രാഷ്ട്രീയ കേരളത്തില്‍ തന്റെതായ ഇരിപ്പിടമുണ്ടാക്കിയത്. ഇതാണ് സിപിഎമ്മും സര്‍ക്കാരും ബിജെപി അദ്ധ്യക്ഷനെ വളഞ്ഞിട്ട് ആക്രമിക്കാനുള്ള പ്രധാന കാരണം.

ശബരിമല പ്രക്ഷോഭ കാലത്ത് ഓരോ ദിവസവും നിരവധി കള്ളക്കേസുകള്‍ ചുമത്തി ജയിലുകളില്‍ നിന്നും ജയിലുകളിലേക്ക് സുരേന്ദ്രനെ മാറ്റി കൊണ്ടിരുന്നത് വിശ്വാസി സമൂഹത്തിന്റെ ഹൃദയത്തെ മുറിവേല്‍പ്പിച്ചു. ഒരു രാഷ്ട്രീയ നേതാവിനോട് ഒരു ഭരണകൂടവും ചെയ്യാത്തത്ര ക്രൂരതയാണ് കെ.സുരേന്ദ്രനോട് സര്‍ക്കാര്‍ ചെയ്തത്. 250 ഓളം കേസുകള്‍ അദ്ദേഹത്തിന്റെ പേരില്‍ രജിസ്റ്റര്‍ ചെയ്തു.

2019 ലോക്‌സഭാ തിരഞ്ഞെടുപ്പില്‍ പത്തനംത്തിട്ടയില്‍ മത്സരിച്ച സുരേന്ദ്രന്‍ മൂന്ന് ലക്ഷത്തോളം വോട്ട് നേടി ഇരുമുന്നണികളെയും ഞെട്ടിച്ചു. അന്നത്തെ വേട്ടയാടലിന് സമാനമായാണ് പിണറായി വീണ്ടും സുരേന്ദ്രനെതിരെ ഗൂഢാലോചന നടത്തുന്നത്. കൊടകര കവര്‍ച്ചാക്കേസില്‍ അദ്ദേഹത്തെ കുടുക്കാന്‍ ആവുന്നത്ര ശ്രമിച്ച പൊലീസ് അദ്ദേഹത്തിന്റെ മകനെ പോലും അതിലേക്ക് വലിച്ചിഴച്ചു.

കഴിഞ്ഞ മൂന്ന് പതിറ്റാണ്ടുകളായി കേരളത്തിന്റെ പൊതുസമൂഹത്തില്‍ നിറഞ്ഞുനില്‍ക്കുന്ന ഒരു പൊതുപ്രവര്‍ത്തകനെ ഒരു തെളിവിന്റെയും പിന്തുണയില്ലാതെ ക്രൂശിക്കാനാണ് സര്‍ക്കാര്‍ ശ്രമിക്കുന്നത്. കൊടകര നനഞ്ഞ പടക്കമായതോടെ മഞ്ചേശ്വരത്തെ സുന്ദരയുടെ പിന്നാലെയായി പൊലീസ്.

?എകെജി സെന്ററില്‍ നിന്നും തയ്യാറാക്കിയ തിരക്കഥ അനുസരിച്ച് ഒരു ചാനല്‍ റിപ്പോര്‍ട്ടര്‍ സുന്ദരയുടെ അടുത്ത് ചെന്നത്. തനിക്ക് ബിജെപി 2.5 ലക്ഷം കൈക്കൂലി തന്നതു കൊണ്ടാണ് സ്ഥാനാര്‍ത്ഥിത്വം പിന്‍വലിച്ചതെന്ന് സുന്ദരയെ കൊണ്ട് പറയിച്ചതാണ് . പിറ്റേന്ന് തന്നെ സുരേന്ദ്രന്റെ പേരില്‍ ജാമ്യമില്ലാ വകുപ്പ് ചുമത്തി കേസെടുത്തു. കൈക്കൂലി വാങ്ങിയെന്ന് സമ്മതിക്കുന്ന സുന്ദരയുടെ പേരില്‍ കേസെടുക്കാതെ കൈക്കൂലി നല്‍കിയതിന് ഒരു തെളിവുമില്ലാത്ത സുരേന്ദ്രന്റെ പേരില്‍ കേസെടുക്കുന്നു. അതും തന്നെ ആരു തട്ടികൊണ്ടു പോയിട്ടില്ലെന്ന് സുന്ദര പോലും പറഞ്ഞിട്ടും പൊലീസ് ചേര്‍ത്ത വകുപ്പില്‍ തട്ടികൊണ്ടു പോകലും അന്യായമായി തടവില്‍ വെക്കലും ചേര്‍ക്കുന്നു.

സമരചരിത്രത്തിലെ സാംസ്‌കാരിക ഭൂമിയായ കോഴിക്കോടിന്റെ മണ്ണില്‍ നിന്നാണ് സുരേന്ദ്രന്‍ രാഷ്ട്രീയ പ്രവര്‍ത്തനം ആരംഭിക്കുന്നത്. സിപിഎം ശക്തി കേന്ദ്രമായ ഉള്ള്യേരിയില്‍ ജനിച്ച് സംഘപ്രസ്ഥാനങ്ങളിലൂടെ വളര്‍ന്ന് ഇന്ന് ബിജെപിയുടെ സംസ്ഥാന പ്രസിഡന്റ് സ്ഥാനത്തെത്തിയ പൊതുപ്രവര്‍ത്തകനെ സിപിഎം ഭയക്കുന്നത് സ്വാഭാവികമാണ്.

കോഴിക്കോട് ഗുരുവായൂരപ്പന്‍ കോളേജില്‍ പഠിക്കുന്ന കാലം മുതല്‍ എബിവിപിയുടെ നേതാവായിരുന്ന സുരേന്ദ്രന് നേരെ എസ്എഫ്‌ഐ-ഡിവൈഎഫ്‌ഐ അക്രമമുണ്ടായി തുടങ്ങി. ഏതാണ്ട് 30 വര്‍ഷങ്ങള്‍ക്ക് ശേഷം ഇന്ന് ബിജെപിയുടെ സംസ്ഥാന പ്രസിഡന്റ് സ്ഥാനത്തെത്തിയപ്പോഴും അവര്‍ അദ്ദേഹത്തെ വേട്ടയാടുകയാണ്. വിദ്യാര്ത്ഥി നേതാവായിരുന്നപ്പോള്‍ ധാരാളം കള്ളക്കേസുകളിലും അദ്ദേഹത്തെ കുടുക്കാന്‍ കുട്ടി സഖാക്കള്‍ ശ്രമിച്ചു.

?കോവളം കൊട്ടാരം സമരം, കേരളാ യൂണിവേഴ്‌സിറ്റി അസിസ്റ്റന്‍ഡ് ഗ്രേഡ് അഴിമതിക്കെതിരായ സമരം, ടോട്ടല്‍ ഫോര്‍ യു തട്ടിപ്പ്, മലബാര്‍ സിമന്റ്‌സ് അഴിമതി, സോളാര്‍ തട്ടിപ്പ് തുടങ്ങിയ അഴിമതികള്‍ക്കെതിരെ സമരം നയിച്ച സുരേന്ദ്രന്‍ കേരളത്തിലെ തെരുവുകളില്‍ അഗ്‌നി പടര്‍ത്തി.

യുവമോര്‍ച്ചയില്‍ നിന്നും ബി.ജെ.പിയിലെത്തിയ അദ്ദേഹം പാര്‍ട്ടിയുടെ ജനറല്‍ സെക്രട്ടറി പദവിയിലും മികച്ച പ്രവര്‍ത്തനമാണ് നടത്തിയത്. പൊതു രാഷ്ട്രീയ സംഭവവികാസങ്ങളോട് പെട്ടെന്ന് പ്രതികരിക്കുന്ന സുരേന്ദ്രന്‍ സോഷ്യല്‍ മീഡിയയിയിലും ഏറ്റവും ജനപിന്തുണയുള്ള രാഷ്ട്രീയ നേതാക്കളിലൊരാളായി മാറി. അതുകൊണ്ട് തന്നെ അദ്ദേഹത്തിന്റെ ഫേസ്ബുക്ക് പോസ്റ്റുകളെല്ലാം മാദ്ധ്യമ വാര്‍ത്തകളില്‍ ഇടംപിടിക്കാറുമുണ്ട്.

സോളാര്‍ അഴിമതിയില്‍ സുരേന്ദ്രന്‍ എന്ത് പറയുന്നു എന്ന് നോക്കി പ്രതികരിക്കേണ്ട ഗതികേടിലായിരുന്നു ഇടതുപക്ഷത്തെ എല്ലാ നേതാക്കളും. സുരേന്ദ്രന്‍ പറഞ്ഞതിലേക്ക് കാര്യങ്ങള്‍ എത്തിയെങ്കിലും ഭരണത്തിലെത്തിയ ശേഷം പിണറായി സര്‍ക്കാര്‍ കോണ്‍ഗ്രസ് നേതാക്കളെ രക്ഷിച്ചെടുത്തു.