അങ്ങനെ അതിനും കേരളം സാക്ഷിയാകുകയാണ്. പുരുഷന്‍മാരുടെ സ്വാതന്ത്ര്യത്തിന് വേണ്ടി സ്വാതന്ത്ര്യദിനത്തില്‍ പ്രതിഷേധ മാര്‍ച്ചുമായി ഓള്‍ കേരള മെന്‍സ് അസോസിയേഷന്‍ രംഗത്തെത്തുകയാണ്. വലതുപക്ഷ നിരീക്ഷകനും ദിലീപ് അനുകൂലിയുമായ രാഹുല്‍ ഈശ്വരാണ് മാര്‍ച്ച് ഉദ്ഘാടനം ചെയ്യുന്നത്.

പുരുഷന്‍മാര്‍ക്കെതിരെയുള്ള കരിനിയമങ്ങള്‍ക്കെതിരെ പ്രതിഷേധിക്കുന്നതിന് വേണ്ടിയാണ് എകെഎം മാര്‍ച്ച് സംഘടിപ്പിക്കുന്നതെന്ന് രാഹുല്‍ ഈശ്വര്‍ പറഞ്ഞു. ദിലീപ്, വിജയ് ബാബു, സിവിക് ചന്ദ്രന്‍ എന്നീവര്‍ക്കെതിരെ പരാതികള്‍ വരുമ്പോള്‍ തന്നെ കാണിക്കുന്ന അനാവശ്യ തിടുക്കം ഇല്ലാതാക്കാനും, സമൂഹത്തില്‍ സന്തുലിതമായി സ്ത്രീ പുരുഷ സമത്വമുണ്ടാകാന്‍ വേണ്ടിയുള്ള മുന്നേറ്റമാണിതെന്നും എകെഎം യുട്യൂബ് ചാനലിലൂടെ രാഹുല്‍ ഈശ്വര്‍ പറഞ്ഞു.

രാഹുല്‍ ഈശ്വറിന്റെ വാക്കുകള്‍ ഇങ്ങനെയാണ്.

നമ്മുടെ സമൂഹത്തില്‍ ഇന്ന് ഏറ്റവും കൂടുതല്‍ സ്വാതന്ത്ര്യമില്ലായ്മ അനുഭവിക്കുന്നത് പുരുഷന്‍മാരാണ്. പലപ്പോഴും പുരുഷന്‍മാര്‍ നിയമത്തിന്റെ തെറ്റായ പ്രയോഗം കാരണം വേട്ടയാടപ്പെടുന്നു. വ്യാജ മീടൂകളും വ്യാജ ബലാത്സംഗ പരാതികളും അവര്‍ ദുരിതമനുഭവിക്കാന്‍ കാരണമാകുന്നു. നമുക്കറിയാം ഒരുപാട് വ്യാജപരാതികള്‍ വരുന്നുണ്ട്. നമ്മുടെ മാത്രം പ്രസ്താവനയല്ല അത്. ഡല്‍ഹി ഹൈക്കോടതി ജഡ്ജിയായ ജസ്റ്റിസ് പ്രസാദ് ചൂണ്ടിക്കാണിച്ചത് ഇന്ത്യയില്‍ പേടിപ്പെടുത്തുന്ന രീതിയില്‍ വ്യാജ ബലാത്സംഗ കേസുകള്‍ വളരുന്നു എന്നാണ്.

നമ്മളെല്ലാവരും സ്ത്രീകളെ ബഹുമാനിക്കുന്നവരാണ്. പക്ഷെ, വ്യാജ മീടു, വ്യാജ ബലാത്സംഗ കേസുകള്‍ വളരെയധികം തെറ്റായ കാര്യങ്ങള്‍ നമ്മുടെ സമൂഹത്തില്‍ മുന്നോട്ടുവെയ്ക്കുന്നുണ്ട്. നമുക്കെല്ലാം അറിയാവുന്നതുപോലെ സിനിമാ നടന്‍മാരായ ശ്രീ ദിലീപ് ആകട്ടെ, ശ്രീ വിജയ് ബാബു ആകട്ടെ എഴുത്തുകാരനായ ശ്രീ സിവിക് ചന്ദ്രനാകട്ടെ, ഇവരെയെല്ലാം ഒരു ആരോപണത്തിന്റെ പേരില്‍ ക്യാന്‍സല്‍ ചെയ്യാനും ബഹിഷ്‌കരിക്കാനും കരിവാരിത്തേക്കാനുമൊക്കെ ഒരുപാട് പേര്‍ മുന്നോട്ട് വരുന്നു.

കുറ്റം ചെയ്തവരാണെങ്കില്‍ കോടതി ഇവരെ ശിക്ഷിക്കട്ടെ. കുറ്റാരോപിതരെ കുറ്റവാളികളായി ചിത്രീകരിച്ച് അവരെ അപഹസിക്കാനും അധിക്ഷേപിക്കാനും കുടുംബത്തെ അവഹേളിക്കാനും പലരും നീക്കം നടത്തുന്നുണ്ട്. ഇതിനെതിരെ ശക്തമായ പ്രതിഷേധവും പ്രതിരോധവും ആവശ്യമാണ്. മെന്‍സ് അസോസിയേഷന്‍ പോലുള്ള മുന്നേറ്റങ്ങള്‍ ഇന്നിന്റെ ആവശ്യമാണ്.

വ്യാജ മീടുകള്‍ക്കെതിരെ മെന്‍ ടു ആവശ്യമാണ്. അജിത് മികച്ച സംഘാടകനാണ്. 75ാമത് സ്വാതന്ത്ര്യദിനത്തില്‍ പുരുഷന്‍മാര്‍ക്കെതിരെയുള്ള കരിനിയമങ്ങളെ പ്രതിഷേധിക്കാന്‍, ശ്രീ ദിലീപിനേയും ശ്രീ വിജയ് ബാബുവിനേയും ശ്രീ സിവിക് ചന്ദ്രനേയും പോലുള്ള പ്രമുഖര്‍ക്കെതിരെ പരാതികള്‍ വരുമ്പോള്‍ തന്നെ കാണിക്കുന്ന അനാവശ്യ തിടുക്കം ഇല്ലാതാക്കാന്‍, സമൂഹത്തില്‍ സന്തുലിതമായി സ്ത്രീ പുരുഷ സമത്വമുണ്ടാകാന്‍ വേണ്ടിയുള്ള മുന്നേറ്റമാണിത്. ഈ മെന്‍ ടൂ, പുരുഷാവകാശ മുന്നേറ്റത്തില്‍ ഞാനും പങ്കാളിയാകുന്നുണ്ട്. നിങ്ങള്‍ എല്ലാവരുടേയും പിന്തുണ അഭ്യര്‍ത്ഥിക്കുന്നു. എന്നാണ് രാഹുല്‍ ഈശ്വര്‍ പറഞ്ഞത്.