പശ്ചിമ ബംഗാളിലെ തിരഞ്ഞെടുപ്പ് തിരിച്ചടിക്ക് പിന്നാലെ തൃണമൂല്‍ കോണ്‍ഗ്രസ് അതിന്റെ ചരിത്രത്തിലെ ഏറ്റവും കടുത്ത ആഭ്യന്തര പ്രതിസന്ധിയിലൂടെയാണ് കടന്നുപോകുന്നതെന്ന് തുറന്നുസമ്മതിച്ച് മുതിര്‍ന്ന നേതാക്കള്‍. മുതിര്‍ന്ന നേതാക്കളുടെ രാജി, എംപിമാരുടെ കലാപം, കോണ്‍ഗ്രസുമായുള്ള ലയന അഭ്യൂഹങ്ങള്‍ എന്നിവ പാര്‍ട്ടിയുടെ നിലനില്‍പ്പിനെ തന്നെ ചോദ്യം ചെയ്യുന്ന രീതിയിലേക്ക് വളര്‍ന്നിട്ടുണ്ട്. പാര്‍ട്ടി ഒരു വലിയ അസ്തിത്വ പ്രതിസന്ധി നേരിടുകയാണെന്ന് മുതിര്‍ന്ന നേതാക്കള്‍ തന്നെ തുറന്നുസമ്മതിച്ചതോടെ മമതയുടെ രാഷ്ട്രീയഭാവിയും ചോദ്യമുനയിലായിട്ടുണ്ട്.

മമത ബാനര്‍ജിയുടെ വിശ്വസ്തനും മുതിര്‍ന്ന നേതാവുമായ സൗഗത റോയ് തന്നെ പാര്‍ട്ടിയുടെ അവസ്ഥയെ പ്രതിസന്ധി എന്ന് വിശേഷിപ്പിച്ചത് ഗൗരവകരമാണ്. ബംഗാളില്‍ പ്രതിപക്ഷ ശക്തി വീണ്ടെടുക്കാന്‍ കോണ്‍ഗ്രസുമായി സഹകരിക്കേണ്ടി വരുമെന്ന സൂചനയും അദ്ദേഹം നല്‍കി. പാര്‍ട്ടിക്കുള്ളിലെ അസ്വസ്ഥതകള്‍ ഏതാനും നേതാക്കളില്‍ മാത്രം ഒതുങ്ങുന്നില്ലെന്നും പാര്‍ലമെന്ററി തലത്തില്‍ വരെ പടര്‍ന്നിട്ടുണ്ടെന്നും അദ്ദേഹം പറഞ്ഞു. ജനങ്ങളുടെയും പാര്‍ട്ടി പ്രവര്‍ത്തകരുടെയും പരാതികള്‍ മമത ബാനര്‍ജി നേരിട്ട് കേള്‍ക്കണമെന്നും അഭിഷേക് ബാനര്‍ജിക്കെതിരെയുള്ള പരാതികള്‍ പരിഹരിക്കണമെന്നും അദ്ദേഹം ആവശ്യപ്പെട്ടു.

മമത ബാനര്‍ജിയുടെ നേതൃത്വത്തെ വെല്ലുവിളിച്ചുകൊണ്ട് തൃണമൂല്‍ എംപിമാര്‍ക്കിടയില്‍ ഒരു വലിയ വിമത ഗ്രൂപ്പ് രൂപപ്പെട്ടിരിക്കുകയാണ്. സായോനി ഘോഷ്, യൂസഫ് പത്താന്‍ എന്നിവരുള്‍പ്പെടെ 20ഓളം മുതിര്‍ന്ന എംപിമാര്‍ ഒപ്പിട്ട കത്ത് പുറത്തുവന്നതോടെ പാര്‍ട്ടയിലെ മത ബാനര്‍ജിക്കെതിരായ കലാപം മറനീക്കി പുറത്തുകൊണ്ടുവന്നിരിക്കുകയാണ്. തങ്ങളെ പ്രത്യേക വിഭാഗമായി അംഗീകരിക്കണമെന്നാണ് ഇവരുടെ ആവശ്യം. ലോക്‌സഭാ എംപിമാരില്‍ മൂന്നില്‍ രണ്ട് ഭാഗത്തിലധികം പേരുടെ പിന്തുണയുള്ളതിനാല്‍ കൂറുമാറ്റ നിരോധന നിയമപ്രകാരം അയോഗ്യരാക്കപ്പെടില്ലെന്ന് വിമതര്‍ കരുതുന്നു.

രാജ്യസഭാ അംഗങ്ങളുടെ തുടര്‍ച്ചയായ രാജി തൃണമൂല്‍ കോണ്‍ഗ്രസിനെ കൂടുതല്‍ തളര്‍ത്തുകയാണ്. സുഖേന്ദു ശേഖര്‍ റോയ്, സുഷ്മിത ദേവ് എന്നിവര്‍ക്ക് പിന്നാലെ പ്രകാശ് ചിക് ബാറെയ്കും കഴിഞ്ഞ ദിവസം തന്റെ രാജി സമര്‍പ്പിച്ചു. ബംഗാളിലെ രാഷ്ട്രീയ സാഹചര്യം ഇപ്പോള്‍ ബിജെപിക്ക് അനുകൂലമായി മാറിയെന്നാണ് രാജിവെച്ചതിന് പിന്നാലെ അദ്ദേഹം പ്രതികരിച്ചത്. ദിവസങ്ങള്‍ക്കുള്ളില്‍ മൂന്ന് പ്രമുഖ രാജ്യസഭാ എംപിമാര്‍ രാജിവെച്ചത് വരും ദിവസങ്ങളില്‍ കൂടുതല്‍ നേതാക്കള്‍ പാര്‍ട്ടി വിടുമെന്ന അഭ്യൂഹങ്ങള്‍ ശക്തമാക്കിയിട്ടുണ്ട്.

പാര്‍ട്ടിക്കുള്ളിലെ തര്‍ക്കങ്ങളുടെ പ്രധാന കേന്ദ്രം അഭിഷേക് ബാനര്‍ജിയുടെ പ്രവര്‍ത്തനശൈലിയാണെന്ന് വിലയിരുത്തപ്പെടുന്നു. മമതയുടെ ബന്ധു കൂടിയായ അഭിഷേകിന് ചുറ്റും അധികാരം കേന്ദ്രീകരിക്കുന്നത് മുതിര്‍ന്ന നേതാക്കളെ അകറ്റിയെന്നാണ് റിപ്പോര്‍ട്ടുകള്‍ സൂചിപ്പിക്കുന്നത്. ഈ ആഭ്യന്തര കലഹങ്ങള്‍ പരിഹരിച്ചില്ലെങ്കില്‍ പാര്‍ട്ടിയുടെ ഭാവി കൂടുതല്‍ ഇരുളടഞ്ഞതാകുമെന്നാണ് വിലയിരുത്തല്‍.