ജനങ്ങളുടെ മൊബൈല്‍ നമ്പറുമായി ആധാര്‍ നമ്പര്‍ ബന്ധിപ്പിക്കണമെന്ന് തങ്ങള്‍ ഉത്തരവിറക്കിയിട്ടില്ലെന്ന് സുപ്രീം കോടതി വ്യക്തമാക്കി. എന്തടിസ്ഥാനത്തിലാണ് ആധാര്‍ മൊബൈല്‍ നമ്പറുമായി ബന്ധിപ്പിക്കണമെന്ന നിര്‍ദ്ദേശം കേന്ദ്ര സര്‍ക്കാര്‍ നല്‍കിയതെന്നും അഞ്ചംഗ ഭരണഘടനാ ബെഞ്ച് ചോദിച്ചു. ആധാര്‍ സംബന്ധിച്ച് ലോക്‌നീതി ഫൗണ്ടേഷന്‍ നല്‍കിയ കേസ് പരിഗണിച്ചപ്പോഴാണ് കോടതി ഇക്കാര്യം പറഞ്ഞത്. ആധാര്‍ സംബന്ധിച്ച് ഫെബ്രുവരി 6ന് കോടതി ഇറക്കിയ ഉത്തരവിനെ കേന്ദ്രം ദുര്‍വ്യാഖ്യാനം ചെയ്യുകയായിരുന്നു. 

ഉപഭോക്താവിന്റെ സ്വാതന്ത്രത്തെ തടസപ്പെടുത്താന്‍ സര്‍ക്കാരിന് അധികാരമില്ലെന്നും ചീഫ് ജസ്റ്റിസ് ദീപക് മിശ്ര അദ്ധ്യക്ഷനായ അഞ്ചംഗ ഭരണഘടനാ ബെഞ്ച് വ്യക്തമാക്കി.അതേസമയം, മൊബൈല്‍ സേവന ദാതാക്കള്‍ക്ക് ലൈസന്‍സിന് നിബന്ധന വയ്ക്കാന്‍ സര്‍ക്കാരിന് അവകാശമുണ്ടെന്ന് യു.ഐ.ഡി.എഐ വാദിച്ചു. എന്നാല്‍ ഉപഭോക്താവിന്റെ സ്വാതന്ത്രത്തെ ബാധിക്കുന്ന തരത്തില്‍ നിബന്ധന വയ്ക്കാന്‍ സര്‍ക്കാരിന് ഒരവകാശവും ഇല്ലെന്ന് സുപ്രീം കോടതി പറഞ്ഞു. 

ആധാര്‍ സുരക്ഷിതമാണ്. എന്നാല്‍, ഏറ്റവും പുതിയ തരത്തിലുള്ള ചോര്‍ച്ച ആശങ്കപ്പെടുത്തുന്നു. ഇതിനായി ഹാക്കര്‍മാര്‍ക്ക് സൈറ്റുകളില്‍ കടന്നു കയറേണ്ടി വന്നില്ല. സര്‍ക്കാര്‍ വകുപ്പുകള്‍ മറ്റ് വകുപ്പുകളില്‍ നിന്നുള്ള വിവരശേഖരണത്തിനായി ഇപ്പോള്‍ തന്നെ ആധാര്‍ നന്പര്‍ ഉപയോഗിക്കുന്നുണ്ട്. ഇതിലൂടെ ഗുണഭോക്താവിന്റെ വിലാസവും ബാങ്ക് അക്കൗണ്ട് അടക്കമുള്ള വിവരങ്ങള്‍ എല്ലാം മനസിലാക്കാം. ആന്ധ്രാപ്രദേശ് സര്‍ക്കാരിന്റെ ഹൗസിംഗ് കോര്‍പ്പറേഷനില്‍ നിന്ന് 1.34 ലക്ഷം പേരുടെ വിവരങ്ങള്‍ ചോര്‍ന്നത് ഇത്തരത്തിലാണെന്നും യു.ഐ.ഡി.എ.ഐ വാദിച്ചു. ഇത് മറ്റേത് തരത്തിലുള്ള ചോര്‍ച്ചയെക്കാളും അപകടകരമാണെന്നും യു.ഐ.ഡി.എ.ഐ പറഞ്ഞു.

ഏതെങ്കിലുമൊരാളുടെ ജാതിയോ മതമോ മനസിലാക്കുന്നതിന് ആധാര്‍ ഒരിക്കലും ഉപയോഗിക്കാനാവില്ലെന്നും യു.ഐ.ഡി.എ.ഐ പറഞ്ഞു.