കര്‍ണാടകയില്‍ നിയമ സഭാ തെരഞ്ഞെടുപ്പ് കൊഴുപ്പിക്കാനായി കേരളത്തിലെ നേതാക്കളും രംഗത്ത്. മുന്‍ മുഖ്യമന്ത്രി ഉമ്മന്‍ ചാണ്ടി, കേന്ദ്രമന്ത്രി അല്‍ഫോന്‍സ് കണ്ണന്താനം തുടങ്ങി നിരവധി നേതാക്കളാണ് കോണ്‍ഗ്രസ്, ബി.ജെ.പി കക്ഷികളുടെ തെരഞ്ഞെടുപ്പ് പ്രചരണത്തിനായി ബംഗളുരുവില്‍ എത്തിയത്. ബംഗളുരുവിലെ 14 മണ്ഡലങ്ങളില്‍ മലയാളി വോട്ടുകള്‍ നിര്‍ണായകമായതിനാലാണ് കേരള നേതാക്കളെ ഇറക്കിയുള്ള ഈ പ്രചരണ കോലാഹലം.

ബംഗളുരു നഗരത്തോട് ചേര്‍ന്നു കിടക്കുന്ന സി.വി രാമന്‍നഗര്‍ മണ്ഡലത്തില്‍ നിയമസഭാ തെരഞ്ഞെടുപ്പിന്റെ ഭാഗമായ റോഡ്‌ഷോ പൊടിപൊടിക്കുന്നു. നൂറുകണക്കിന് കോണ്‍ഗ്രസ് പ്രവര്‍ത്തകരുടെ ആരവങ്ങള്‍ക്കിടെ സ്ഥാനാര്‍ത്ഥി സമ്പത്ത് രാജിനൊപ്പമെത്തിയ നേതാവിനെ കണ്ടു തെരഞ്ഞെടുപ്പ് നടക്കുന്നത് കേരളത്തിലാണോ ആരെങ്കിലും സംശയിച്ചാല്‍ തെറ്റുപറയാനാവില്ല. മുന്‍ മുഖ്യമന്ത്രി ഉമ്മന്‍ചാണ്ടിയായിരുന്നു സി.വി.രാമന്‍ നഗറിലെ ഇന്നലത്തെ പ്രധാന പ്രചാരകന്‍. സംഗതി മറ്റൊന്നുംകൊണ്ടല്ല; ഇരുപത്തയ്യായിരത്തിലധികം മലയാളി വോട്ടര്‍മാരാണ് സി.വി രാമന്‍ നഗറില്‍ മാത്രമുള്ളത്. അതുകൊണ്ടുതന്നെ കേരളത്തില്‍ നിന്നും പ്രധാന നേതാക്കളെയെത്തിച്ച് പ്രചരണം കൊഴുപ്പിക്കാനാണ് കോണ്‍ഗ്രസ്, ബി.ജെ.പി കക്ഷികളുടെ തീരുമാനം. 

സി.വി രാമന്‍നഗറിന് പുറമെ കെ.ആര്‍. പുരം, ബാട്രായനപുര, ദാസറഹള്ളി, സര്‍വജ്ഞനഗര്‍, മഹാദേവപുര, ബി.ടി.എം. ലേഔട്ട്, ബൊമ്മനഹള്ളി, ബെംഗളൂരു സൗത്ത്, ശാന്തിനഗര്‍ തുടങ്ങിയ മണ്ഡലങ്ങളിലാണ് മലയാളി വോട്ടര്‍മാര്‍ ഏറെയുള്ളത്. ബൊമ്മനഹള്ളിയില്‍ മുപ്പതിനായിരത്തിലധികം മലയാളി വോട്ടര്‍മാരുണ്ട്. സര്‍വജ്ഞനഗര്‍, ശാന്തിനഗര്‍, ബൊമ്മനഹള്ളി എന്നിവിടങ്ങളില്‍ മലയാളികളാണ് മത്സരരംഗത്തുള്ളത്. ഇവിടങ്ങളിലെല്ലാം കോണ്‍ഗ്രസ് സ്ഥാനാര്‍ത്ഥികള്‍ക്കായി ഉമ്മന്‍ചാണ്ടിക്കൊപ്പം എം.പിമാരായ ശശി തരൂര്‍, കെ.സി വേണുഗോപാല്‍, ആന്റോ ആന്റണി, എ.ഐ.സി.സി സെക്രട്ടറി പി.സി വിഷ്ണുനാഥ് എന്നിവരും പ്രചരണ രംഗത്തുണ്ട്. പ്രതിപക്ഷ നേതാവ് രമേശ് ചെന്നിത്തല പ്രചരണത്തിനായി അടുത്ത ആഴ്ച എത്തുന്നുണ്ട്. 
ബി.ജെ.പിയാകട്ടെ കേന്ദ്രമന്ത്രി അല്‍ഫോന്‍സ് കണ്ണന്താനത്തിന്റെയും സംസ്ഥാന ജനറല്‍ സെക്രട്ടറി കെ. സുരേന്ദ്രന്റെ നേതൃത്വത്തില്‍ കഴിഞ്ഞ കുറെ നാളുകളായി പ്രചാരണരംഗത്തുണ്ട്. പി.കെ കൃഷ്ണദാസ്, ബി.രാധാകൃഷ്ണ മേനോന്‍ തുടങ്ങിയവരും വിവിധ മണ്ഡലങ്ങളില്‍ സജീവമാണ്. ജെ.ഡി.എസും കേരളത്തില്‍ നിന്നുള്ള പ്രതിനിധികളെ പ്രചാരണത്തിനായി എത്തിച്ചിട്ടുണ്ട്. 

ബംഗളുരുവിലെ 28 മണ്ഡലങ്ങളിലായി 12 ലക്ഷത്തിലധികം മലയാളികളാണ് വോട്ടര്‍മാരായുള്ളത്. ഇവരില്‍ ഭൂരിഭാഗവും ഐ.ടി, കച്ചവട മേഖലകളിലുള്ളവരാണ്. കടുത്ത മത്സരം നടക്കുന്ന ഈ മണ്ഡലങ്ങളില്‍ പലയിടത്തും മലയാളി വോട്ടുകള്‍ നിര്‍ണായകമാണ്. അതുകൊണ്ടുതന്നെ വലിയ വാഗ്ദാനങ്ങള്‍ നല്‍കി വോട്ടുറപ്പാക്കാനുള്ള ശ്രമത്തിലാണ് എല്ലാ മുന്നണികളും.