ഉത്തര്‍പ്രദേശ്, രാജസ്ഥാന്‍, ആന്ധ്രപ്രദേശ് തുടങ്ങിയ സ്ഥലങ്ങളില്‍ കഴിഞ്ഞ ദിവസം വന്‍ നാശം വിതച്ച പൊടിക്കാറ്റിലും മഴയിലും മരിച്ചവരുടെ എണ്ണം 130 ആയി. 205 ലേറെ പേര്‍ക്ക് പരിക്കേറ്റിട്ടുണ്ട്. ഇന്നലെ കൂടുതല്‍ മൃതദേഹങ്ങള്‍ കണ്ടെടുത്തിട്ടുണ്ട്. മരണസംഖ്യ ഇനിയും ഉയരുമെന്നാണ് കരുതുന്നത്. മരിച്ചവര്‍ക്ക് ഉത്തര്‍പ്രദേശ് സര്‍ക്കാര്‍ നാല് ലക്ഷം രൂപ വീതം നഷ്ടപരിഹാരം പ്രഖ്യാപിച്ചു. കര്‍ണാടകത്തില്‍ തിരഞ്ഞെടുപ്പ് പ്രചാരണത്തിലായിരുന്ന യു. പി മുഖ്യമന്ത്രി യോഗി ആദിത്യനാഥ് ദുരന്തത്തെ തുടര്‍ന്ന് അടിയന്തരമായി തിരിച്ചു പോയി.

അതിശക്തമായ കാറ്റും മഴയും ഇടിമിന്നലും നിരവധി ഗ്രാമങ്ങളില്‍ മരണവും നാശവും വിതച്ചു. ഉത്തര്‍പ്രദേശില്‍ ഇരുപത് വര്‍ഷത്തിനിടെ ഉണ്ടാകുന്ന ഏറ്റവും വിനാശകാരിയായ കൊടുങ്കാറ്റാണിത്. 132കിലോമീറ്റര്‍ വരെ വേഗതയിലാണ് കാറ്റ് വീശിയത്. ഒന്നുരണ്ട് ദിവസങ്ങള്‍ കൂടി കാലാവസ്ഥ മോശമായിരിക്കുമെന്നാണ് പ്രവചനം. ഡല്‍ഹിയില്‍ കാറ്റ് വീശിയിരുന്നെങ്കിലും അപകടങ്ങള്‍ റിപ്പോര്‍ട്ട് ചെയ്തിട്ടില്ല. ഇന്ത്യയുടെ പല ഭാഗങ്ങളിലും അടുത്ത 48 മണിക്കൂറുകളില്‍ ചുഴലിക്കാറ്റ് രൂപപ്പെടുമെന്നും കനത്ത മഴയും കാറ്റും വീശുമെന്നും ദേശീയ കാലാവസ്ഥ നിരീക്ഷണ കേന്ദ്രത്തിന്റെ മുന്നറിയിപ്പുണ്ട്.

ഉത്തര്‍പ്രദേശില്‍ ആഗ്ര ഉള്‍പ്പടെയുള്ള സ്ഥലങ്ങളില്‍ 72 മണിക്കൂര്‍ ജാഗ്രതാ നിര്‍ദ്ദേശമുണ്ട്. അതിനിടെ, ഒട്ടേറെ പേരുടെ മരണത്തിനിടയാക്കിയ ദുരന്തത്തിന് ശേഷമാണ് മുന്നറിയിപ്പ് എത്തിയതെന്ന ആക്ഷേപം ശക്തമാണ്. ഇരുപത് ദിവസത്തിനുള്ളില്‍ രണ്ടുതവണ ആഗ്രയില്‍ ശക്തമായ കാറ്റുണ്ടായിരുന്നതായാണ് റിപ്പോര്‍ട്ട്. കഴിഞ്ഞ ദിവസങ്ങളില്‍ ഇവിടുത്തെ 1400 ഗ്രാമങ്ങളില്‍ വൈദ്യുതി ഉണ്ടായിരുന്നില്ല. താജ്മഹലിന്റെ രണ്ടു തടിവാതിലുകള്‍ക്ക് കേടുപാടുകള്‍ സംഭവിച്ചിരുന്നു. പൊടിക്കാറ്റില്‍ രണ്ട് മിനാരങ്ങള്‍ തകരുകയും ചെയ്തു. സമീപത്തെ നിരവധി മരങ്ങളും കടപുഴകിയിരുന്നു.