കര്‍ണാടകയില്‍ കോണ്‍ഗ്രസ് ജെഡിഎസ് സഘ്യം അധികാരത്തിലേറിയതിനു പിന്നാലെ വകുപ്പ് വിഭജനത്തെച്ചൊല്ലി ചെറിയ പ്രശ്‌നങ്ങളുണ്ടെന്ന് സമ്മതിച്ച് മുഖ്യമന്തി കുമാരസ്വാമി. സംസ്ഥാനത്ത് കോണ്‍ഗ്രസ്‌ജെഡിഎസ് സര്‍ക്കാര്‍ അധികാരത്തിലേറി ദിവസങ്ങള്‍ മാത്രം പിന്നിടുമ്പോഴാണ് വിഭജനത്തിന്റെ പേരില്‍ തര്‍ക്കങ്ങളുണ്ടെന്ന് മുഖ്യമന്ത്രി തന്നെ സമ്മതിച്ചിരിക്കുന്നത്. ചര്‍ച്ചകളിലൂടെ പരിഹരിക്കാവുന്ന പ്രശ്‌നങ്ങളെ നിലവിലുള്ളൂവെന്നും സര്‍ക്കാരിനെ വീഴ്ത്താന്‍ മാത്രം ഗുരുതരമല്ലെന്നും കുമാരസ്വാമി വ്യക്തമാക്കിയിട്ടുണ്ട്.

നാടകീയ സംഭവങ്ങള്‍ക്കൊടുവിലാണ് കര്‍ണാടകയില്‍ കുമാരസ്വാമിയുടെ നേതൃത്വത്തില്‍ കോണ്‍ഗ്രസ്‌ജെഡിഎസ് സര്‍ക്കാര്‍ അധികാരത്തിലെത്തുന്നത്. സഖ്യസര്‍ക്കാരില്‍ സീറ്റ് വിഭജനത്തെ ചൊല്ലി തുടക്കം മുതല്‍ ഭിന്നതകള്‍ ഉണ്ടായിരുന്നുവെങ്കിലും ഇതാദ്യമായാണ് മുഖ്യമന്ത്രി തന്നെ ഇത് പരസ്യമായി സമ്മതിച്ചിരിക്കുന്നത്.മന്ത്രിസഭയില്‍ 22 മന്ത്രിമാര്‍ കോണ്‍ഗ്രസിനും 12 മന്ത്രിമാര്‍ ജെഡിഎസിനും എന്ന് നേരത്തെ ധാരണയായിരുന്നു. എന്നാല്‍ ഇതില്‍ വകുപ്പുകള്‍ സംബന്ധിച്ചാണ് ഇപ്പോള്‍ തര്‍ക്കം ഉയരുന്നത്.

വിഷയവുമായി ബന്ധപ്പെട്ട് കോണ്‍ഗ്രസ് നേതാക്കളായ മുന്‍ മുഖ്യമന്ത്രി സിദ്ധരാമയ്യ, ഉപമുഖ്യമന്ത്രി പരമേശ്വര, കര്‍ണാടകയുടെ ചുമതലയുള്ള കോണ്‍ഗ്രസ് ജനറല്‍ സെക്രട്ടറി കെസി വേണുഗോപാല്‍ എന്നിവരുമായി മുഖ്യമന്ത്രി ചര്‍ച്ച നടത്തിരുന്നു. എന്നാല്‍ അന്തിമ തീരുമാനത്തിന് ഹൈക്കമാന്‍ഡിന്റെ അനുമതി ലഭിക്കേണ്ടതുണ്ട്. ഇതിനായി നേതാക്കള്‍ ഡല്‍ഹിയിലെത്തിയിട്ടുണ്ട്.