മനാമയിയിലുണ്ടായ ശക്തമായ പൊടിക്കാറ്റിൽ അന്തരീക്ഷം മൂടപ്പെട്ടതിനാൽ എല്ലാ യാത്രക്കാരും സുരക്ഷ പാലിക്കണമെന്ന് അഭ്യന്തര മന്ത്രാലയം മുന്നറിയിപ്പ് നൽകി. ബഹ്‌റൈന്റെ വിവിധ ഭാഗങ്ങളിലും കനത്ത പൊടിക്കാറ്റ്​ അനുഭവപ്പെട്ടു.

ഇന്നലെ കാലത്തുമുതലാണ്​ പൊടിക്കാറ്റ്​ ഇരച്ചെത്തിയത്. ഇത്​ സാധാരണ ജനജീവിതത്തെ ബാധിച്ചു. വാഹനമോടിക്കാനും ബുദ്ധിമുട്ടുണ്ടാക്കി. റോഡിൽ കാഴ്​ച വളരെ കുറവായിരുന്നു. ബഹ്​റൈൻ ഗതാഗത, ടെലികമ്മ്യൂണിക്കേഷൻസ്​ മന്ത്രാലയം രാജ്യത്ത്​ ശക്തിയേറിയ വടക്കുപടിഞ്ഞാറൻ കാറ്റുണ്ടാകുമെന്ന്​ ഇന്നലെ കാലത്ത്​ തന്നെ ട്വീറ്റ്​ ചെയ്​തിരുന്നു. പൊടിക്കാറ്റുണ്ടാകുമെന്നും അറിയിപ്പുണ്ടായി. തുടർന്ന്​ മുന്നറിയിപ്പുമായി ഗതാഗത ഡയറക്​ടറേറ്റും കോസ്​റ്റ്​ ഗാർഡും രംഗത്തെത്തി.

ഇന്നലെ കോഴിക്കോട്​ നിന്ന്​ വന്ന എയർ ഇന്ത്യ എക്​സ്​പ്രസ്​ വിമാനത്തിന്​ ഷെഡ്യൂൾ സമയമായ ഉച്ച 1.20ന്​ ബഹ്​റൈനിൽ ഇറങ്ങാനായില്ല. കനത്ത പൊടിക്കാറ്റുമൂലം വിമാനം ദോഹയിലേക്ക്​ തിരിച്ചുവിടേണ്ടി വന്നു. തുടർന്ന്​ ഉച്ച കഴിഞ്ഞ്​ 3.49നാണ്​ വിമാനം ഇറങ്ങിയത്​. പിന്നീട്​ ഒരു മണിക്കൂറിന്​ ശേഷം തിരിച്ചുപോയതായി എയർ ഇന്ത്യ അധികൃതർ പറഞ്ഞു.