സോഷ്യല്‍ മീഡിയയില്‍ പങ്കന്‍ ചേട്ടന്റെ ചൂളമടിച്ചുകൊണ്ടുള്ള ചായയടി വൈറലായപ്പോള്‍, സ്റ്റേഷന്‍ കടവ് ചായക്കടയില്‍ തിരക്കേറി!
പുത്തന്‍വേലിക്കര സ്റ്റേഷന്‍ കടവ് പാലത്തിന് അരികിലുള്ള ചായക്കടയിലേക്ക് ഒരു അധ്യാപകന്‍ ചായ കുടിക്കാനെത്തിയപ്പോള്‍, അവിടെ എത്തുന്ന ആര്‍ക്കുമെന്ന പോലെ നിറഞ്ഞ മനസ്സോടെ പങ്കജാക്ഷന്‍ ചേട്ടന്‍ ചായ നല്‍കി. എന്നാല്‍ അറുപത്തിയാറാം വയസില്‍ താനും തന്റെ ചായക്കടയും പറവൂര്‍ പുത്തന്‍വേലിക്കരയുടെ പരിധിയ്ക്ക് പുറത്തേയ്ക്ക് വളരാന്‍ തുടങ്ങുകയാണെന്ന് അപ്പോള്‍ അറിഞ്ഞില്ല.
പറവൂര്‍ പുത്തന്‍വേലിക്കരയിലെ ചായക്കടക്കാരന്‍ പങ്കജാക്ഷന്‍ കൊടുങ്ങല്ലൂരുകാരനാണ്. മുപ്പത്തിരണ്ട് വര്‍ഷം മുന്‍പാണ് പുത്തന്‍വേലിക്കരയില്‍ ചായക്കട നടത്താനെത്തുന്നത്. പിന്നീട് ഇങ്ങോട്ട് നാട്ടുകാര്‍ക്ക് പ്രിയപ്പെട്ട ചൂളമടിച്ച് ചായയടിക്കുന്ന പങ്കന്‍ ചേട്ടനായി. പഴയകാല മലയാള സിനിമാഗാനങ്ങളും നാടകഗാനങ്ങളുമാണ് പങ്കജാക്ഷന്‍ ചൂളമടിച്ച് പാടുക. ചെറുപ്പത്തില്‍ ക്ലബ്ബുകളിലും മറ്റും പാട്ട് പാടാന്‍ പോകുമായിരുന്നു. പിന്നീട് ജീവിതപ്രാരാബ്ധങ്ങളേറിയപ്പോള്‍ പാട്ട് നിന്നു.
കടയില്‍ ചായകുടിക്കാനെത്തിയ ആ അധ്യാപകനാണ് പങ്കജാക്ഷനിലെ പ്രതിഭയെ യൂട്യൂബിലൂടെ പ്രശസ്തനാക്കിയത്. വാട്‌സ്അപ്പിലും യൂട്യൂബിലും ഫെയ്‌സ്ബുക്കിലുമെല്ലാം ചൂളമടിച്ച് കറങ്ങി നടക്കുകയാണ് പുത്തന്‍വേലിക്കരക്കാരുടെ പങ്കന്‍ ചേട്ടന്റെ ചൂളമടിയും ചായയടിയും.
സംസാരത്തേക്കാള്‍ ചൂളമടിയിലൂടെയാണ് പങ്കജാക്ഷന്റെ ആശയവിനിമയവും. ഒരു ചായയ്ക്ക് വേണ്ടി കടയില്‍ എത്ര കാത്തിരിക്കാനും നാട്ടുകാര്‍ തയാറാണ്. കാരണം പശ്ചാത്തലത്തില്‍ മുഴുവന്‍ സമയവും ചൂളമടിയുണ്ടല്ലോ. സമൂഹമാധ്യമങ്ങളില്‍ ചൂളമടി വൈറല്‍ ആയതോടെ പുത്തന്‍വേലിക്കര സ്റ്റേഷന്‍ കടവ് പാലത്തിന് അരികിലുള്ള ചായക്കടയിലേക്ക് എത്തുന്നവരുടെ എണ്ണവും കൂടിയിട്ടുണ്ട്.
https://www.facebook.com/Malayalivartha
