അയര്‍ലന്‍ഡിലെ കില്‍മാനാഗിലെ ഒരു പള്ളിയില്‍ ഒരാളുടെ സംസ്‌കാര ചടങ്ങ് നടക്കവേ കുടുംബാംഗങ്ങളുടെയും സുഹൃത്തുക്കളുടെയും ബന്ധുക്കളുടെയും സാന്നിധ്യത്തില്‍ മൃതദേഹമടങ്ങിയ പെട്ടി കല്ലറയിലേയ്ക്ക് എടുത്തുവച്ചു. എന്നാല്‍ പെട്ടെന്ന് ശവപ്പെട്ടിക്കുള്ളില്‍ നിന്ന് നിലവിളി ശബ്ദം ഉയര്‍ന്നു. 'എന്നെ തുറന്നു വിടൂ എന്നായിരുന്നു അലര്‍ച്ച'. ഇതു കേട്ട് ചുറ്റിലുമുള്ളവര്‍ അമ്പരക്കുന്നതിനു പകരം മരണശുശ്രൂഷയില്‍ പങ്കെടുക്കയാണെന്ന കാര്യം പോലും മറന്ന് ചിരിക്കാന്‍ തുടങ്ങി!

ഐറിഷ് പ്രതിരോധ സേനയിലെ ഉദ്യോഗസ്ഥനായിരുന്ന ഷായ് ബ്രാഡ്ലിയുടെ സംസ്‌കാര ചടങ്ങുകള്‍ ഇക്കഴിഞ്ഞ ഒക്ടോബര്‍ 13 ശനിയാഴ്ച നടക്കുമ്പോഴാണ് ഈ സംഭവങ്ങള്‍. തന്റെ വിയോഗം അറിഞ്ഞ് എത്തിയവരെ അദ്ദേഹം അവസാനമായി ചിരിപ്പിക്കാനായി തന്റെ ശബ്ദം റെക്കോര്‍ഡ് ചെയ്തു വച്ചിരുന്നതാണ്.

''ഞാനെവിടെയാണ്? എന്നെ പുറത്തിറക്കൂ, ഇവിടെയാകെ ഇരുട്ടാണ്. പുരോഹിതന് ഞാന്‍ പറയുന്നത് കേള്‍ക്കാമോ? ഞാന്‍ ഷായ്യാണ്. ഞാനീ പെട്ടിയിലുണ്ട്. ഞാന്‍ മരിച്ചു''- ശവപ്പെട്ടിയിലെ തട്ടും ഷായ്യുടെ ശബ്ദം ഉയര്‍ന്നു. ഒടുവില്‍ 'ഞാന്‍ നിങ്ങളോട് യാത്ര പറയാന്‍ വന്നതാണ്' എന്നു പറഞ്ഞ് ശബ്ദം നിലയ്ക്കുകയായിരുന്നു. ഷായ്യുടെ സ്വഭാവം അറിയുന്നതുകൊണ്ടു തന്നെ ആ ശബ്ദം കേട്ടപ്പോള്‍ മുതല്‍ ചുറ്റിലുമുള്ളവര്‍ ചിരിക്കാന്‍ തുടങ്ങിയിരുന്നു.

ഒക്ടോബര്‍ 8-ന് ആണ് ഷായ് മരിക്കുന്നത്. രോഗബാധിതനായി കിടപ്പിലായിരുന്നു. എന്നാല്‍ താന്‍ ലോകത്തില്‍ നിന്നു വിടപറയുമ്പോള്‍ ആളുകള്‍ ചിരിച്ചു കൊണ്ട് യാത്രയാക്കണമെന്ന് അച്ഛന്‍ ആഗ്രഹിച്ചിരുന്നതായി ഷായ്യുടെ മകള്‍ പറഞ്ഞു. ഇതേത്തുടര്‍ന്ന് അദ്ദേഹത്തിന്റെ ശബ്ദം റെക്കോര്‍ഡ് ചെയ്ത മകള്‍ അത് ശവപ്പെട്ടിയില്‍ ഘടിപ്പിച്ച് പ്രവര്‍ത്തിപ്പിക്കുകയും ചെയ്തു.