മുംബൈയില്‍ നടന്ന ലളിതമായ ചടങ്ങില്‍ വച്ച് ഇന്ത്യന്‍ താരം മനീഷ് പാണ്ഡെ ചലച്ചിത്ര താരം ആശ്രിത ഷെട്ടിയ്ക്ക് താലി ചാര്‍ത്തി. മുപ്പതുകാരനായ പാണ്ഡെ സൂറത്തില്‍ നടന്ന സയ്യിദ് മുഷ്താഖ് അലി ട്രോഫി ഫൈനലിനു തൊട്ടുപിന്നാലെയാണ് മുംബൈയിലെത്തിയത്. മനീഷ് പാണ്ഡെയുടെയും ആശ്രിത ഷെട്ടിയുടെയും കുടുംബാംഗങ്ങളും സുഹൃത്തുക്കളും മാത്രമേ വിവാഹത്തില്‍ പങ്കെടുത്തുള്ളൂ.

വിജയ് ഹസാരെ ട്രോഫിക്കു പിന്നാലെ സയ്യിദ് മുഷ്താഖ് അലി ട്രോഫിയിലും കര്‍ണാടകയെ വിജയത്തിലെത്തിച്ചതില്‍ മനീഷ് പാണ്ഡെയ്ക്ക് കാര്യമായ പങ്കുണ്ട്. സയ്യിദ് മുഷ്താഖ് അലി ടൂര്‍ണമെന്റില്‍ തമിഴ്‌നാടിനെ ഒരു റണ്ണിനു തോല്‍പ്പിച്ചാണ് കര്‍ണാടക കിരീടം നിലനിര്‍ത്തിയത്. തകര്‍പ്പന്‍ അര്‍ധസെഞ്ചുറിയുമായി കര്‍ണാടക ഇന്നിങ്‌സിന് കരുത്തുപകര്‍ന്ന പാണ്ഡെയായിരുന്നു അവരുടെ വിജയശില്‍പിയും. 45 പന്തുകള്‍ നേരിട്ട പാണ്ഡെ, 60 റണ്‍സെടുത്ത് പുറത്താകാതെ നിന്നു.

മത്സരശേഷമുള്ള വാര്‍ത്താ സമ്മേളനത്തില്‍ വിവാഹത്തെക്കുറിച്ച് പാണ്ഡെ സൂചിപ്പിച്ചിരുന്നു. 'വെസ്റ്റിന്‍ഡീസിനെതിരായ പരമ്പരയ്ക്കുള്ള ഒരുക്കമാണ് ഇനി പ്രധാനം. അതിനു മുന്‍പ് എന്നെ സംബന്ധിച്ച് പ്രധാനപ്പെട്ട മറ്റൊരു ഇന്നിങ്‌സ് കൂടിയുണ്ട്. നാളെ (തിങ്കള്‍) ഞാന്‍ വിവാഹിതനാവുകയാണ്' - പാണ്ഡെ പറഞ്ഞു.

പാണ്ഡെയുടെ വധുവായ ആശ്രിത ഷെട്ടി തമിഴ് ചിത്രങ്ങളിലൂടെ ആരാധകര്‍ക്ക് സുപരിചിതയാണ്. അറിയപ്പെടുന്ന മോഡല്‍ കൂടിയായ ആശ്രിത, തുളു സിനിമയിലൂടെയാണ് ചലച്ചിത്ര ലോകത്തെത്തിയത്. ഉദയം എന്‍എച്ച് 4, ഒരു കന്നിയും മൂന്ന് കളവാണികളും, ഇന്ദ്രജിത്ത് തുടങ്ങിയ തമിഴ് സിനിമകളിലും അഭിനയിച്ചു. പുതുമുഖ നായകനൊപ്പമുള്ള നാന്‍ താന്‍ ശിവയാണ് റിലീസ് ചെയ്യാനുള്ള ചിത്രം.

ആഭ്യന്തര ക്രിക്കറ്റില്‍ കര്‍ണാടകയുടെ നായകനായ മനീഷ് പാണ്ഡെ വിജയ് ഹസാരെ ട്രോഫിയിലും ടീമിനെ കിരീടത്തിലേക്കു നയിച്ചു. 2015-ല്‍ ഇന്ത്യന്‍ ജഴ്‌സിയില്‍ അരങ്ങേറിയ പാണ്ഡെ 23 ഏകദിനങ്ങളിലും 32 ട്വന്റി20കളിലും ഇന്ത്യന്‍ ജഴ്‌സിയണിഞ്ഞു. 23 ഏകദിനങ്ങളില്‍നിന്ന് 36.66 റണ്‍സ് ശരാശരിയില്‍ 440 റണ്‍സ് നേടിയിട്ടുണ്ട്. ഒരു സെഞ്ചുറിയും രണ്ട് അര്‍ധസെഞ്ചുറിയും സഹിതമാണിത്. 32 ട്വന്റി20 മല്‍സരങ്ങളില്‍നിന്ന് 39.13 റണ്‍സ് ശരാശരിയില്‍ 587 റണ്‍സും നേടി. ഇതില്‍ രണ്ട് അര്‍ധസെഞ്ചുറികളും ഉള്‍പ്പെടുന്നു.