ടി-20 ലോകകപ്പ് സൂപ്പര്‍ 12ല്‍ ദക്ഷിണാഫ്രിക്കയ്ക്ക് ആദ്യ ജയം. ചാമ്ബ്യന്മാരായ വെസ്റ്റ് ഇന്‍ഡീസിനെ 8 വിക്കറ്റിനു കീഴടക്കിയാണ് കീഴടക്കിയാണ് ദക്ഷിണാഫ്രിക്ക വിജയിച്ചത്. വെസ്റ്റ് ഇന്‍ഡീസ് മുന്നോട്ടുവച്ച 144 റണ്‍സ് വിജയലക്ഷ്യം 18.2 ഓവറില്‍ വിക്കറ്റ് 2 നഷ്ടപ്പെടുത്തി ദക്ഷിണാഫ്രിക്ക മറികടന്നു.

51 റണ്‍സെടുത്ത എയ്ഡന്‍ മാര്‍ക്രം പ്രോട്ടീസിന്‍്റെ ടോപ്പ് സ്കോററായി ആദ്യ ഓവറില്‍ തന്നെ ക്യാപ്റ്റന്‍ ടെംബ ബാവുമ (2) റണ്ണൗട്ടായെങ്കിലും പിന്നീട് കളി ദക്ഷിണാഫ്രിക്കയുടെ നിയന്ത്രണത്തിലായിരുന്നു. ഡികോക്കിനു പകരം ഓപ്പണ്‍ ചെയ്ത റീസ ഹെന്‍റിക്ക്സ് തകര്‍പ്പന്‍ പ്രകടനം കാഴ്ചവച്ചു.

ഏകദിന ശൈലിയില്‍ ബാറ്റ് വീശിയ റസ്സി വാന്‍ഡര്‍ ഡസ്സന്‍ പ്രതിസന്ധി സൃഷ്ടിച്ചെങ്കിലും അത്ര ഉയര്‍ന്ന സ്കോര്‍ അല്ലാത്തതിനാല്‍ വലിയ ബുദ്ധിമുട്ട് സൃഷ്ടിച്ചില്ല. 39 റണ്‍സെടുത്ത ഹെന്‍റിക്കസിനെ അകീല്‍ ഹുസൈന്‍്റെ പന്തില്‍ ഷിംറോണ്‍ ഹെട്മെയര്‍ ഉജ്ജ്വലമായി പിടികൂടി.

വാന്‍ഡര്‍ ഡസ്സനുമായി 57 റണ്‍സിന്‍്റെ കൂട്ടുകെട്ട് ഉയര്‍ത്തിയതിനു ശേഷമാണ് താരം മടങ്ങിയത്.നാലാം നമ്ബറിലെത്തിയ എയ്ഡന്‍ മാര്‍ക്രം ഗംഭീര ബാറ്റിംഗ് കാഴ്ചവച്ചു. വാന്‍ഡര്‍ ഡസ്സന്‍്റെ മെല്ലെപ്പോക്കിനെ മറച്ച്‌ അനായാസം ബൗണ്ടറികള്‍ കണ്ടെത്തിയ മാര്‍ക്രം ദക്ഷിണാഫ്രിക്കന്‍ ചേസ് വളരെ എളുപ്പമാക്കി. 25 പന്തുകളില്‍ താരം ഫിഫ്റ്റി തികച്ചു. അപരാജിതമായ 83 റണ്‍സാണ് മൂന്നാം വിക്കറ്റില്‍ വാന്‍ഡര്‍ ഡസ്സന്‍-മാര്‍ക്രം സഖ്യം കൂട്ടിച്ചേര്‍ത്തത്.

ആദ്യ മത്സരത്തില്‍ ഓസ്ട്രേലിയയോട് പരാജയപ്പെട്ട ദക്ഷിണാഫ്രിക്കയ്ക്ക് ഈ ജയം ഏറെ ആത്മവിശ്വാസം നല്‍കും. അതേസമയം, കഴിഞ്ഞ കളി ഇംഗ്ലണ്ടിനോടും ഈ കളി ദക്ഷിണാഫ്രിക്കയോടും പരാജയപ്പെട്ട വെസ്റ്റ് ഇന്‍ഡീസിന് മുന്നോട്ടുള്ള യാത്ര ഏറെക്കുറെ അസാധ്യമാണ്.

ആദ്യം ബാറ്റ് ചെയ്ത വിന്‍ഡീസ് നിശ്ചിത 20 ഓവറില്‍ 8 വിക്കറ്റ് നഷ്ടപ്പെടുത്തി 143 റണ്‍സ് നേടി. 56 റണ്‍സ് നേടിയ എവിന്‍ ലൂയിസാണ് വിന്‍ഡീസിന്‍്റെ ടോപ്പ് സ്കോറര്‍. ബാറ്റര്‍മാര്‍ക്കെല്ലാം തുടക്കം ലഭിച്ചെങ്കിലും അത് മുതലെടുക്കാനായില്ല. 35 പന്തുകള്‍ നേരിട്ട് 16 റണ്‍സെടുത്ത ലെന്‍ഡല്‍ സിമ്മന്‍സിന്‍്റെ മെല്ലെപ്പോക്ക് വിന്‍ഡീസിനു കനത്ത തിരിച്ചടിയായി.