ലോകത്തിലെ ഏറ്റവും പ്രായം കുറഞ്ഞ ചെസ് ഗ്രാന്‍ഡ് മാസ്റ്ററെന്ന നേട്ടവുമായി ഇന്ത്യന്‍ വംശജനായ 12 വയസുകാരന്‍. ഹംഗറിയിലെ ബുഡാപെസ്റ്റില്‍ നടന്ന ചെസ് ടൂര്‍ണമെന്‍റിലാണ് അഭിമന്യു മിശ്രയെന്ന 12 വയസുകാരന്‍റെ നേട്ടം.

ന്യൂ ജേഴ്സിയില്‍ നിന്നുള്ള അഭിമന്യു 12 വയസും 4 നാലുമാസവും 25 ദിവസവും പ്രായവുമുള്ളപ്പോഴാണ് 19 വര്‍ഷമായി സെര്‍ജി കര്‍ജാകിന്‍സിന്‍റെ പേരിലായിരുന്ന റെക്കോര്‍ഡ് തന്‍റെ പേരിലാക്കിയത്. 2002 ഓഗസ്റ്റ് 12നായിരുന്നു സെര്‍ജി കര്‍ജാകിന്‍ ലോകത്തിലെ ഏറ്റവും പ്രായം കുറഞ്ഞ ഗ്രാന്‍ഡ് മാസ്റ്ററെന്ന പദവി സ്വന്തമാക്കിയത്.

12 വയസും 7 മാസവുമായിരുന്നു റെക്കോര്‍ഡ് നേടുമ്പോൾ സെര്‍ജിയുടെ പ്രായം. ലോകറെക്കോര്‍ഡ് ലക്ഷ്യമിട്ട് ഏതാനും മാസങ്ങളായി തുടര്‍ച്ചയായി ചെസ് ടൂര്‍ണമെന്‍റുകളില്‍ പങ്കെടുക്കുകയായിരുന്നു അഭിമന്യു. 2009 ഫെബ്രുവരി 5-നാണ് അഭിമന്യു ജനിച്ചത്.

തന്‍റെ ആദ്യത്തേയും രണ്ടാമത്തേയും ഗ്രാന്‍ഡ് മാസ്റ്റര്‍ നേട്ടമാണ് അഭിമന്യു ബുഡാപെസ്റ്റില്‍ കാഴ്ച വച്ചത്. മൂന്നാം ഗ്രാന്‍മാസ്റ്റര്‍ നോം സ്വന്തമാക്കിയാണ് അഭിമന്യുവിന്‍റെ ചരിത്ര നേട്ടം. ഏപ്രില്‍ മാസത്തില്‍ വെസെര്‍കെപ്സോ ടൂര്‍ണമെന്‍റിലും മെയ് മാസത്തില്‍ ഫസ്റ്റ് സാറ്റര്‍ഡേ ടൂര്‍ണമെന്‍റിലുമായിരുന്നു ഈ നേട്ടം. 15-കാരനായ ഗ്രാന്‍ഡ് മാസ്റ്റര്‍ ലിയോണ്‍ ലൂക്ക് മെന്‍ഡോണ്‍ക്കെയെയാണ് അഭിമന്യു പരാജയപ്പെടുത്തിയത്.