ഒളിമ്ബിക് വില്ലേജില്‍ ആശങ്ക ഉയര്‍ത്തി വീണ്ടും കോവിഡ്. ഒളിമ്ബിക്‌സില്‍ പങ്കെടുക്കാനെത്തിയ കായിക താരത്തിനാണ് കോവിഡ് സ്ഥിരീകരിച്ചത്. ചെക്ക് റിപ്പബ്ലിക് വോളിബോള്‍ താരം ഓണ്‍ഡ്രെ പെരിസിച്ചിനാണ് രോഗം പിടിപെട്ടത്.

ചെക്ക് റിപബ്ലിക്ക് ഒളിമ്ബിക്‌സ് ടീം തലവന്‍ മാര്‍ട്ടിക്ക് ഡൊക്‌റ്റൊര്‍ വാര്‍ത്ത ഔദ്യോഗികമായി സ്ഥിരീകരിച്ചു. ദിവസേന നടത്തുന്ന പരിശോധനയിലാണ് പെരിസിച്ചിന് രോഗബാധയുള്ളതായി കണ്ടെത്തിയത്. ഇതോടെ ഒളിമ്ബിക് വില്ലേജില്‍ കോവിഡ് ബാധിച്ചവരുടെ എണ്ണം നാലായി.

നേരത്തെ, ദക്ഷിണാഫ്രിക്കന്‍ ഫുട്‌ബോള്‍ താരങ്ങളായ തബിസോ മോന്യാനെ, കമോഹെലോ മഹ്ലാത്സി എന്നിവര്‍ക്കും രോഗബാധ സ്ഥിരീകരിച്ചിരുന്നു. ടീമിന്റെ വീഡിയോ അനലിസ്റ്റ് മാരിയോ മാഷയ്ക്കും രോഗം സ്ഥിരീകരിച്ചിട്ടുണ്ട്. ലോകം ഉറ്റുനോക്കുന്ന കായിക മാമാങ്കത്തിന് തിരിതെളിയാന്‍ ഏതാനും ദിവസങ്ങള്‍ മാത്രം ശേഷിക്കെ ഒളിമ്ബിക് വില്ലേജിലെ രോഗബാധ കായിക പ്രേമികളെ ആശങ്കയിലാക്കിയിരിക്കുകയാണ്.