ബാഡ്മിന്റണ്‍ പുരുഷ ഡബിള്‍സിലെ ആദ്യ മത്സരത്തില്‍ അത്യുജ്ജ്വലമായി പൊരുതി വിജയിച്ച്‌ ഇന്ത്യയുടെ സാത്വിക് സായിരാജ്-ചിരാഗ് ഷെട്ടി സഖ്യം. ഗ്രൂപ്പ് എയില്‍ നടന്ന മത്സരത്തില്‍ ചൈനീസ് തായ്പേയിയുടെ ലീ യാംഗ്-വാംഗ് ചി ലിന്‍ സഖ്യത്തെ ഒന്നിനെതിരെ രണ്ട് ഗെയിമുകള്‍ക്കാണ് ഇന്ത്യന്‍ സഖ്യം കീഴടക്കിയത്. സ്‌കോര്‍: 21-16, 16-21, 27-25.

ആദ്യ ഗെയിം ഇന്ത്യന്‍ സഖ്യം അനായാസം നേടിയപ്പോള്‍ രണ്ടാം ഗെയിം മുതല്‍ കളി മാറുകയായിരുന്നു. രണ്ടാം ഗെയിമില്‍ ഇന്ത്യയെ അതേ സ്‌കോറിന് തളച്ച്‌ ചൈനീസ് തായ്പേയ് തിരിച്ചടിച്ചതോടെ മൂന്നാം ഗെയിമിലേക്ക് കളി നീണ്ടു. വാശിയേറിയ മൂന്നാം ഗെയിമിന്റെ ഇടവേളവരെ ഇന്ത്യ പിന്നിലായിരുന്നു. പിന്നീട് ഇഞ്ചോടിഞ്ച് പോരാട്ടമായി. ചൈനീസ് തായ്‌പേയ്‌ക്കാര്‍ ഗെയിം പോയിന്റിന് അരികിലെത്തിയപ്പോള്‍ ഇന്ത്യയുടെ മറ്റൊരു തിരിച്ചുവരവും കണ്ടു. ഒടുവില്‍ 20-20ന് തുല്യതയിലാക്കിയ ഇന്ത്യ പിന്നീട് പലതവണ ഗെയിം പോയിന്റിന് അരികിലെത്തുകയും എതിരാളികള്‍ തിരിച്ചടിക്കുന്നതും കണ്ടു. 21 പോയിന്റില്‍ അവസാനിക്കേണ്ട മത്സരം 27 പോയിന്റിലെത്തിച്ചാണ് ഇന്ത്യയ്ക്ക് വിജയിക്കാനായത്. 69 മിനിട്ടാണ് മത്സരം നീണ്ടത്.