നീന്തലിൽ സജന് പ്രകാശ് സെമി കാണാതെ പുറത്ത്: 200 മീറ്റര് ബട്ടര്ഫ്ളൈ സ്ട്രോക്ക് ഹീറ്റ്സില് സജന് പ്രകാശിന് നാലാം സ്ഥാനം
ഒളിമ്പിക്സില് നീന്തലില് 200 മീറ്റര് ബട്ടര്ഫ്ളൈ ഇനത്തില് പങ്കെടുത്ത ഇന്ത്യയുടെ മലയാളി താരമായ സജന് പ്രകാശ് സെമിയിലെത്താതെ പുറത്ത്. ഹീറ്റ്സില് നാലാമതായാണ് സജന് ഫിനിഷ് ചെയ്തത്. 1:57:32 സെക്കന്റിലാണ് സജന് മത്സരം പൂര്ത്തിയാക്കിയത്.
സെമി ഫൈനലിലേക്ക് യോഗ്യത നേടാനായി അഞ്ച് ഹീറ്റ്സുകളിലായി ഇറങ്ങിയ താരങ്ങളില് മികച്ച സമയം രേഖപ്പെടുത്തിയ 16 പേര് സെമിയിലേക്ക് മുന്നേറിയപ്പോള് ഹീറ്റ്സില് മൊത്തത്തില് 24ആം സ്ഥാനത്തായിരുന്നു സജന്. സജന്റെ ഹീറ്റ്സില് മത്സരിച്ച ആരും തന്നെ സെമിയിലേക്ക് യോഗ്യത നേടിയിട്ടില്ല. ഹീറ്റ്സില് അവസാന നിമിഷമാണ് സജന് നാലാം സ്ഥാനത്തേക്ക് പിന്തള്ളപ്പെട്ടത്.
മൂന്നാം സ്ഥാനത്തെത്തിയ അയര്ലന്ഡ് താരമായ ഹൈലാന്ഡും സജനും തമ്മില് വെറും 13 മില്ലിസെക്കന്റിന്റെ വ്യത്യാസം മാത്രമാണ് ഉണ്ടായിരുന്നത്. മത്സരത്തില് ഒന്നാം ഹീറ്റ്സില് മത്സരിച്ച ഹംഗേറിയന് താരമായ ക്രിസ്റ്റോഫ് മിലാക്കിന്റെതാണ് മികച്ച സമയം (1:53:58).
200 മീറ്റര് ബട്ടര്ഫ്ളൈയില് നിന്നും പുറത്തായ താരത്തിന് ഇനി ഇതേ ഇനത്തില് 100 മീറ്ററില് കൂടി മത്സരമുണ്ട്. 29നാണ് 100 മീറ്റര് ബട്ടര്ഫ്ളൈയിലെ മത്സരങ്ങള് നടക്കുക. നേരത്തെ ഒളിമ്പിക്സിന് നേരിട്ട് യോഗ്യത നേടുന്ന ആദ്യ ഇന്ത്യന് നീന്തല് താരമെന്ന ബഹുമതിയുമായാണ് സജന് പ്രകാശ് ടോക്യോയിലേക്ക് ടിക്കറ്റെടുത്തത്.
റോമില് നടന്ന ചാമ്ബ്യന്ഷിപ്പില് ഒന്നാമനായാണ് സജന് പ്രകാശ് യോഗ്യത ഉറപ്പിച്ചത്. നേരിട്ട് ഒളിമ്പിക്സ് യോഗ്യത എ വിഭാഗത്തില് ഉള്പ്പെട്ടാണ് സജന് യോഗ്യത കരസ്ഥമാക്കിയത്. നീന്തലില് ഒരു മിനിറ്റ് 56.38 സെക്കന്റാണ് സജന്റെ മികച്ച പ്രകടനം.
അതേസമയം നീന്തലില് ഇന്ത്യയുടെ ഇനിയുള്ള അവസാന പ്രതീക്ഷയാണ് സജന്. ഇന്നലെ നടന്ന മത്സരങ്ങളില് ഇന്ത്യയെ പ്രതിനിധീകരിച്ചിറങ്ങിയ ശ്രീഹരി നടരാജനും മാനാ പട്ടേലും ഹീറ്റ്സില് തന്നെ പുറത്തായിരുന്നു. ഹീറ്റ്സില് ശ്രീഹരി അഞ്ചാം സ്ഥാനത്തായി നിരാശപെടുത്തുന്ന പ്രകടനമാണ് നടത്തിയത്. അതേസമയം അപ്രതീക്ഷിതമായി ഗെയിംസിന് യോഗ്യത നേടിയ മാനാ പട്ടേല് ഹീറ്റ്സില് രണ്ടാം സ്ഥാനത്ത് ഫിനിഷ് ചെയ്തെങ്കിലും സമയാടിസ്ഥാനത്തില് പുറകോട്ട് പോവുകയായിരുന്നു.
ടോക്യോ ഒളിമ്ബിക്സിന് ടിക്കറ്റെടുത്ത ഇന്ത്യന് സംഘത്തില് ഒമ്ബത് മലയാളികള് ഇടം പിടിച്ചിട്ടുണ്ട്. ലോങ്ജംപില് എം ശ്രീശങ്കര്, 20 കിലോമീറ്റര് നടത്തത്തില് കെ ടി ഇര്ഫാന്, 400 മീറ്റര് ഹര്ഡില്സില് എം.പി.ജാബിര് 4 X 400 മീറ്റര് റിലേ ടീമില് മുഹമ്മദ് അനസ്, നോഹ നിര്മ്മല് ടോം, 4 X 400 മീറ്റര് മിക്സഡ് റിലേയില് അലക്സ് ആന്റണി എന്നിവരാണ് ടോക്കിയോ ഒളിംപിക്സില് പങ്കെടുക്കുന്ന മലയാളി അത്ലറ്റുകള്. കൂടാതെ ഇന്ത്യന് ഇന്ത്യന് ഹോക്കി താരം പി.ആര്. ശ്രീജേഷും സംഘത്തിലുണ്ട്.
https://www.facebook.com/Malayalivartha