ആ കാര്യം ഞാൻ എപ്പോഴും മനസിൽ കൊണ്ടു നടക്കാറില്ല... എല്ലാവർക്കും ചോദിക്കാനുള്ളത് അത് മാത്രം; ഇപ്പോഴും ഈ സീസണിലെ ശേഷിക്കുന്ന മത്സരങ്ങളെക്കുറിച്ചാണ് ചിന്തിക്കുന്നത്: ഇത്ര നേരത്തേ പറയണ്ടായിരുന്നു!!! സങ്കടം പറഞ്ഞ് സാനിയ മിർസ
ടെന്നീസ് താരം സാനിയ മിർസയ്ക്ക് വിരമിക്കൽ പ്രഖ്യാപനത്തിൽ വീണ്ടുവിചാരം. ഈ സീസണോടെ ടെന്നിസിൽ നിന്ന് വിരമിക്കുന്നതായി പ്രഖ്യാപിച്ചതിൽ ഇപ്പോൾ ഖേദിക്കുന്നതായി സാനിയ പറഞ്ഞു. വിരമിക്കാനുള്ള തീരുമാനം ശരിയാണെങ്കിലും അത് മുൻകൂട്ടി പ്രഖ്യാപിച്ചതിലാണ് ഇപ്പോൾ വിഷമിക്കുന്നതെന്ന് സാനിയ പറയുന്നു. അതിനുശേഷം വിരമിക്കുന്നതിനേക്കുറിച്ച് മാത്രമാണ് എല്ലാവർക്കും ചോദിക്കാനുള്ളതെന്ന് സാനിയ ചൂണ്ടിക്കാട്ടി. ഓസ്ട്രേലിയൻ ഓപ്പൺ മിക്സഡ് ഡബിൾസ് ക്വാർട്ടർ പോരാട്ടത്തിൽ തോറ്റതിന് പിന്നാലെയാണ് 35കാരിയായ
സാനിയ വിരമിക്കൽ പ്രഖ്യാപനം നടത്തിയത്.
ഞാൻ അതേക്കുറിച്ച് (വിരമിക്കുന്നതിനെക്കുറിച്ച്) എപ്പോഴും ചിന്തിക്കുന്നില്ല എന്നതാണ് വാസ്തവം. സത്യത്തിൽ ആ പ്രഖ്യാപനം കുറച്ച് നേരത്തെ ആയിപ്പോയെന്ന് തോന്നുന്നു. ഇപ്പോൾ അതേക്കുറിച്ച് എനിക്ക് ഖേദമുണ്ട്. കാരണം, ഇപ്പോൾ കാണുന്നവർക്കെല്ലാം എന്നോട് ചോദിക്കാൻ ആ ഒരു വിഷയം മാത്രമേയുള്ളൂ- സാനിയ പറഞ്ഞു. ഇത് കരിയറിലെ അവസാന സീസണായതിനാൽ ടെന്നിസിനേക്കുറിച്ചും ടൂർണമെന്റുകളേക്കുറിച്ചുമുള്ള കാഴ്ചപ്പാടുകൾ മാറിയിട്ടുണ്ടോ എന്ന ചോദ്യത്തോട് പ്രതികരിക്കുമ്പോഴായിരുന്നു സാനിയയുടെ മറുപടി.
ജയം മാത്രം ലക്ഷ്യമിട്ടാണ് ഞാൻ ടെന്നീസ് കളിക്കുന്നത്. കളത്തിൽ തുടരുന്നിടത്തോളം കാലം എല്ലാ കളികളും ജയിക്കാൻ തന്നെയാകും എന്റെ ശ്രമം. വിരമിക്കുകയാണെന്ന കാര്യം എപ്പോഴും ഞാൻ മനസിൽ കൊണ്ടുനടക്കുന്നില്ല. ഇപ്പോഴും ടെന്നീസ് കളിക്കുന്നത് ഞാൻ ആസ്വദിക്കുന്നുണ്ട്. മുൻപും ആസ്വദിച്ചിരുന്നു. വിജയമായാലും തോൽവിയായാലും ഇതുവരെയുള്ള കാഴ്ചപ്പാട് തന്നെയാണ് എനിക്കിപ്പോഴും. കളത്തിൽ എന്റെ 100 ശതമാനവും നൽകാനാണ് ശ്രമം.
ചിലപ്പോൾ വിജയിക്കും. മറ്റു ചിലപ്പോൾ വിജയിക്കാതെ പോകും. ഇപ്പോഴും ഈ സീസണിലെ ശേഷിക്കുന്ന മത്സരങ്ങളെക്കുറിച്ചാണ് ഞാൻ ചിന്തിക്കുന്നത്. അല്ലാതെ ഈ സീസൺ പൂർത്തിയാകുമ്പോൾ എന്തു സംഭവിക്കും എന്നല്ല– സാനിയ വ്യക്തമാക്കി. കരിയറിൽ 6 ഡബിൾസ് ഗ്രാൻസ്ലാം കിരീടങ്ങൾ നേടിയിട്ടുള്ള സാനിയ 2 തവണ കിരീടമുയർത്തിയത് ഓസ്ട്രേലിയൻ ഓപ്പണിലാണ്. ഓസ്ട്രേലിയൻ ഓപ്പൺ മിക്സഡ് ഡബിൾസിൽ ഇന്നലെ നടന്ന ക്വാർട്ടർ പോരാട്ടത്തിൽ സാനിയ മിർസ-രാജീവ് റാം സഖ്യം തോറ്റിരുന്നു.
മിക്സഡ് ഡബിൾസിൽ മഹേഷ് ഭൂപതിക്കൊപ്പം 2009ലും 2016ൽ സ്വിസ് ഇതിഹാസം മാർട്ടിന ഹിൻജിനൊപ്പം ഡബിൾസിലും സാനിയ ഓസ്ട്രേലിയൻ ഓപ്പൺ നേടിയിട്ടുണ്ട്. ഇന്ത്യൻ വനിതാ ടെന്നിസ് ചരിത്രത്തിലെ ഏറ്റവും മികച്ച കളിക്കാരി കൂടിയാണ് സാനിയ. മൂന്ന് മിക്സഡ് ഡബിൾസ് ട്രോഫിയടക്കം ആറു ഗ്രാൻഡ് സ്ലാം ടൈറ്റിലുകൾ സ്വന്തം പേരിലുണ്ട്. വിംബിൾഡണിൽ കിരീടം നേടുന്ന ആദ്യ ഇന്ത്യക്കാരിയാണ്. ഖേൽരത്ന, അർജുന അവാർഡുകൾ നൽകി രാജ്യം ആദരിച്ചിട്ടുണ്ട്. 2016നുശേഷം കുടുംബത്തോടൊപ്പം ചെലവഴിക്കാനായി ടെന്നീസ് കോർട്ടിൽ നിന്ന് വിട്ടുനിന്ന സാനിയ 2020ലാണ് മത്സര രംഗത്തേക്ക് മടങ്ങിയെത്തിയത്.
https://www.facebook.com/Malayalivartha