തോമസ് കപ്പ് ബാഡ്‌മിന്റണ്‍ ചാമ്പ്യന്‍ഷിപ്പില്‍ കന്നിക്കിരീടം ചൂടി ഇന്ത്യ. ശക്തരായ ഇന്തോനേഷ്യയെ തകര്‍ത്ത് കന്നിക്കിരീടം സ്വന്തമാക്കി.14 തവണ ചാമ്പ്യൻ മാരായ ഇന്തോനേഷ്യയ്ക്ക് എതിരെ 3-0ന് ആയിരുന്നു ഇന്ത്യയുടെ ജയം. കിഡംബി ശ്രീകാന്തും സാത്വിക് -ചിരാഗ് സഖ്യവും ലക്ഷ്യ സെന്നുമാണ് ഇന്ത്യയുടെ വിജയശില്‍പികള്‍. ഫൈനലില്‍ ഒരു മത്സരം പോലും തോല്‍ക്കാതെയാണ് ഇന്ത്യയുടെ ചരിത്ര നേട്ടം.

8-21, 21-17, 21-16 എന്ന സ്‌കോറിനാണ് ലക്ഷ്യ സെന്‍ ആന്റണി ജിന്റിംഗിനെ പരാജയപ്പെടുത്തിയത്. ഇന്ത്യയുടെ ഡബിള്‍സ് ജോഡികളായ സാത്വികും ചിരാഗും അഹ്‌സന്‍-സുകമുല്‍ജോ സഖ്യത്തെ 18-21, 23-21, 21-19 എന്ന സ്കോറിനും കിഡംബി ശ്രീകാന്ത് 21-15, 23-21 എന്ന സ്കോറിന് ജോനാഥന്‍ ക്രിസ്റ്റിയെ തോല്‍പിച്ചാണ് ജയം സ്വന്തമാക്കിയത്.

മലേഷ്യയെയും ഡെന്‍മാര്‍ക്കിനേയും പരാജയപ്പെടുത്തിയാണ് ഇന്ത്യ ഫൈനലില്‍ എത്തിയത്. ഇന്ത്യൻ ടീമിന് അഭിനന്ദനവുമായി പ്രധാനമന്ത്രി നരേന്ദ്ര മോദി ​രം​ഗത്തെത്തി. ഇന്ത്യ ചരിത്രം രചിച്ചെന്ന് പ്രധാനമന്ത്രി പറഞ്ഞു. ടീമിന് ഒരു കോ‌ടി രൂപ പാരിതോഷികം പ്രഖ്യാപിച്ചു.