കോമണ്‍വെല്‍ത്ത് ഗെയിംസില്‍ ബിന്ധ്യറാണിയിലൂടെ ഇന്ത്യക്ക് നാലാം മെഡല്‍. 55 കിലോ ഭാരോദ്വഹനത്തിലാണ് ബിന്ധ്യ വെള്ളി നേടിയത്. മത്സരത്തില്‍ നാടകീയമായാണ് ബിന്ധ്യ വെള്ളി മെഡലിലേക്ക് കുതിച്ചത്.

രണ്ടാം റൗണ്ടില്‍ 114 കിലോ ഭാരം ഉയര്‍ത്താനുള്ള ബിന്ധ്യയുടെ ശ്രമം പരാജയപ്പെട്ടതോടെ അവരുടെ നേട്ടം വെങ്കലമെഡലില്‍ ഒതുങ്ങുമെന്നായിരുന്നു പ്രതീക്ഷിച്ചത്.

എന്നാല്‍, മൂന്നാം റൗണ്ടില്‍ 116 കിലോ ഉയര്‍ത്തി അവര്‍ രണ്ടാം സ്ഥാനത്തേക്ക് കുതിക്കുകയായിരുന്നു. സ്വര്‍ണമെഡല്‍ നേടിയ നൈജീരിയയുടെ അദിജാത് ഒലാറിയ ബിന്ധ്യയേക്കാള്‍ ഒരു കിലോ ഗ്രാം മാത്രമാണ് അധികം ഉയര്‍ത്തിയത്.

ഒലാറിയ 203 കിലോ ഉയര്‍ത്തിയപ്പോള്‍ ബിന്ധ്യ 202 കിലോ ഉയര്‍ത്തി. ഇംഗ്ലണ്ടിന്റെ ഫറേ മൊറോക്കാണ് ഈയിനത്തില്‍ വെങ്കലം. 198 കിലോയാണ് മൊറോ ഉയര്‍ത്തിയത്. നേരത്തെ മീരാബായ് ചാനുവിലൂടെ ഭാരോദ്വഹനത്തില്‍ ഇന്ത്യ ആദ്യ സ്വര്‍ണം നേടിയിരുന്നു. ഭാരോദ്വഹനത്തില്‍ സങ്കേത് സര്‍ക്കാര്‍ വെള്ളിയും ഗുരുരാജ പൂജാരി വെങ്കലവും നേടി.