സിംബാബ്വെയ്‌ക്കെതിരെ അഞ്ച് വിക്കറ്റിന്റെ വിജയം സ്വന്തമാക്കി നെതര്‍ലന്‍ഡ്‌സ്. സിംബാബ്വെ ഉയര്‍ത്തിയ 118 റണ്‍സ് വിജയലക്ഷ്യം പിന്തുടര്‍ന്ന നെതര്‍ലന്‍ഡ്‌സ് 18 ഓവറില്‍ അഞ്ച് വിക്കറ്റ് നഷ്ടത്തില്‍ 120 റണ്‍സ് നേടി.

സ്‌കോര്‍: സിംബാബ്വെ 117/10(19.2)നെതര്‍ലന്‍ഡ്‌സ് 120/5(18)ഉയര്‍ന്ന സ്‌കോര്‍ പടുത്തുയര്‍ത്താനുള്ള സ്വപ്നവുമായി ആദ്യം ബാറ്റ് ചെയ്യാനിറങ്ങിയ സിംബാബ്വെയ്ക്ക് നായകന്‍ ക്രെയ്ഗ് ഇര്‍വിന്‍(3) അടക്കമുള്ള മുന്‍നിര ബാറ്റര്‍മാരെ പെട്ടെന്ന് തന്നെ നഷ്ടമായി.

24 പന്തില്‍ 40 റണ്‍സ് നേടിയ സിക്കന്ദര്‍ റാസ പുറത്തായതോടെ ടീം സ്‌കോര്‍ മൂന്നക്കം കടക്കുമോയെന്ന് സംശയം ഉയര്‍ന്നിരുന്നു. 28 റണ്‍സ് നേടിയ ഷോണ്‍ വില്യംസാണ് ടീമിന്റെ രണ്ടാമത്തെ മികച്ച സ്‌കോറിനുടമ.

14 എക്‌സ്ട്രാ റണ്‍സ് നല്‍കി ഡച്ച് പട സഹായിച്ചതോടെ സിംബാബ്വെന്‍ സ്‌കോര്‍ 117-ല്‍ എത്തി. 29 റണ്‍സ് വഴങ്ങി പോള്‍ വാന്‍ മീക്കരന്‍ മൂന്ന് വിക്കറ്റ് നേടിയപ്പോള്‍ ബ്രാന്‍ഡന്‍ ഗ്ലോവര്‍, ലോഗന്‍ വാന്‍ ബീക്ക്, ബാസ് ഡെ ലീഡ് എന്നിവര്‍ രണ്ട് വിക്കറ്റ് വീതം നേടി.

ഓപ്പണര്‍ മാക്‌സ് ഒഡൗഡ് 52 റണ്‍സുമായി മികച്ച തുടക്കം നല്‍കിയതോടെ മറുപടി ബാറ്റിംഗില്‍ 12.5 ഓവറില്‍ 90-2 എന്ന സുരക്ഷിത നിലയില്‍ ഓറഞ്ച് പട എത്തിയിരുന്നു. ടോം കൂപ്പര്‍ 32 റണ്‍സ് നേടി മികച്ച പിന്തുണ നല്‍കിയതോടെ അഞ്ച് വിക്കറ്റും 12 പന്തും ബാക്കി നില്‍ക്കെ ടീം വിജയലക്ഷ്യം കടന്നു.