ഓണം കഴിഞ്ഞതോടെ സംസ്ഥാനത്ത് സവാളയുടെ വില കുതിച്ചുയരുന്നു. ഓണത്തിന് 40 രൂപ ചില്ലറവില ഉണ്ടായിരുന്ന സവോള ഓണം കഴിഞ്ഞതോടെ 44 രൂപയിലേക്ക് ഉയര്‍ന്നു.  ഇന്നലെ മൊത്തവിപണിയിലെ വില കിലോയ്ക്ക് 42 രൂപയും ചില്ലറവില 50 രൂപയുമായാണ് ഉയര്‍ന്നത്.  ജൂലൈ അവസാനവാരം വരെ ചില്ലറവില 20 രൂപയാണ് ഉണ്ടായിരുന്നത്. ഉത്തരേന്ത്യന്‍ സംസ്ഥാനങ്ങളില്‍ ജൂലൈ, ഓഗസ്റ്റ് മാസങ്ങളിലുണ്ടായ കനത്ത മഴയെയും വെള്ളപ്പൊക്കത്തെയും തുടര്‍ന്ന് കൃഷി നശിച്ചതാണ് വില ഉയരാന്‍ കാരണമായി പറയുന്നത്. ഇതുകാരണം വിപണിയിലേക്ക് ഇപ്പോള്‍ ആവശ്യത്തിനുള്ള ലോഡുകള്‍ എത്തുന്നില്ല. ഇക്കണക്കിന് പോയാല്‍ അടുത്ത ആഴ്ചയോടെ ചില്ലറ വില അറുപതിലേക്ക് ഉയരുമെന്നാണ് വ്യാപാരികള്‍ പറയുന്നത്. ചെറിയ ഉള്ളിക്ക് ഇപ്പോള്‍ അറുപതിനടുത്താണ് വില. 

കഴിഞ്ഞ അഞ്ചുവര്‍ഷത്തിനിടെ മഹാരാഷ്ട്രയില്‍ ഉണ്ടായ ഏറ്റവും കനത്ത മഴയാണ് ജൂലൈമാസത്തില്‍ ലഭിച്ചത്. കൃഷിയിടങ്ങളില്‍ വെള്ളം കെട്ടിനിന്നതിനെത്തുടര്‍ന്ന് സവോള മുഴുവന്‍ ചീഞ്ഞു നശിക്കുകയായിരുന്നു. നേരത്തെ വ്യാപാരികള്‍ സ്‌റ്റോക്ക് ചെയ്തിരുന്ന സവോളയാണ് ഇപ്പോള്‍ വിപണിയിലേക്ക് എത്തിക്കൊണ്ടിരുന്നത്. എന്നാല്‍, ആവശ്യത്തിന് അയയ്ക്കാനുള്ള സ്‌റ്റോക്ക് മഹാരാഷ്ട്രയിലെയും കര്‍ണാടകയിലെയും വ്യാപാരികളുടെ പക്കലില്ല. ഇതാണ് വില കുതിച്ചുയരാന്‍ കാരണം. 

ഇന്ത്യയില്‍ ആകെ ഉത്പാദിപ്പിക്കുന്ന സവോളയുടെ 33 ശതമാനവും മഹാരാഷ്ട്രയില്‍ നിന്നാണ്. രണ്ടാം സ്ഥാനത്ത് നില്‍ക്കുന്ന കര്‍ണാടകയില്‍ 17 ശതമാനമാണ് ഉത്പാദനം. ഇന്ത്യയിലെ തന്നെ ഏറ്റവും മികച്ച സവോള ഉത്പാദിപ്പിക്കുന്നത് മഹാരാഷ്ട്രയിലെ പൂനയിലാണ്.