സംസ്ഥാനത്ത് ബുധനാഴ്ച പ്ലസ് വണ്‍ ക്ലാസ് ആരംഭിച്ചു. ഇതുവരെ പ്രവേശനം നേടിയത് 3,16,772 വിദ്യാര്‍ഥികള്‍. മുഖ്യഘട്ടത്തിലെ മൂന്ന് അലോട്ട്‌മെന്റ് ചൊവ്വാഴ്ച പൂര്‍ത്തിയായപ്പോള്‍ 99.07 ശതമാനത്തിനും പ്രവേശനം ലഭ്യമായെന്നാണ് കണക്ക്.

നിലവില്‍ 2799 സീറ്റാണ് ഒഴിവുള്ളത്. മഴയെത്തുടര്‍ന്ന് അവധി പ്രഖ്യാപിച്ച ജില്ലകളിലും ദുരിതാശ്വാസ ക്യാമ്പ് പ്രവര്‍ത്തിക്കുന്ന സ്‌കൂളുകളിലും പ്രവേശനം നടന്നില്ല. കഴിഞ്ഞ വര്‍ഷം ആഗസ്ത് 25നായിരുന്നു ക്ലാസ് തുടങ്ങിയത്.


എട്ടുമുതല്‍ 12 വരെ സപ്ലിമെന്ററി അലോട്ട്മെന്റ് നടത്തി പതിനാറോടെ പ്രവേശനത്തിന്റെ സപ്ലിമെന്ററി ഘട്ടം പൂര്‍ത്തിയാക്കും. തുടര്‍ന്ന്, പരാതി വന്ന മലപ്പുറം, പാലക്കാട്, കോഴിക്കോട്, വയനാട് തുടങ്ങിയ ജില്ലയിലെ വിദ്യാര്‍ഥികളുടെ വിവരം താലൂക്ക് അടിസ്ഥാനത്തില്‍ ശേഖരിക്കും.പ്ലസ് വണ്‍ പ്രവേശനോത്സവത്തിന്റെ സംസ്ഥാനതല ഉദ്ഘാടനം തിരുവനന്തപുരം മണക്കാട് ഗവണ്‍മെന്റ് ഗേള്‍സ് ഹയര്‍ സെക്കന്‍ഡറി സ്‌കൂളില്‍ പൊതു വിദ്യാഭ്യാസമന്ത്രി വി ശിവന്‍കുട്ടി നിര്‍വഹിച്ചു. പ്ലസ് വണ്‍ ഇംപ്രൂവ്‌മെന്റ് പരീക്ഷ വിദ്യാര്‍ഥികളുടെ ആവശ്യപ്രകാരം സെപ്തംബര്‍, ഒക്ടോബര്‍ മാസങ്ങളില്‍ നടത്തുമെന്ന് മന്ത്രി പറഞ്ഞു.

അതേസമയം പ്ലസ് വണ്‍ പ്രവേശനത്തിനുള്ള സ്‌പോര്‍ട്ട്‌സ് ക്വോട്ടാ സപ്ലിമെന്ററി അലോട്ട്‌മെന്റ് റിസള്‍ട്ട് വ്യാഴാഴ്ച പ്രസിദ്ധീകരിക്കും. രാവിലെ 10 മുതല്‍ കാന്‍ഡിഡേറ്റ് ലോഗിനിലെ സ്‌പോര്‍ട്‌സ് സപ്ലിമെന്ററി റിസള്‍ട്ട്‌സ് എന്ന ലിങ്കിലൂടെ അലോട്ട്‌മെന്റ് റിസള്‍ട്ട് പരിശോധിക്കാം. അലോട്ട്‌മെന്റ് കിട്ടിയവര്‍ അലോട്ട്‌മെന്റ് ലെറ്റര്‍ എടുക്കുന്ന ലിങ്കിലൂടെ രണ്ട് പേജുള്ള അലോട്ട്‌മെന്റ് ലെറ്റര്‍ പരിശോധിച്ച് പ്രവേശനത്തിന് ഹാജരാകേണ്ട ദിവസവും സ്‌കൂളും കോഴ്‌സും കൃത്യമായി മനസ്സിലാക്കുകയും വേണം.