ബിഗ് ബോസ് മലയാളം അൻപതാം ദിനത്തിൽ എത്തിനിൽക്കുമ്പോൾ പ്രേക്ഷകർക്കും മത്സരാർത്ഥികൾക്ക് പരസ്പ്പരവും ഓരോരുത്തരുടെയും സ്വഭാവം മനസ്സിലായിത്തുടങ്ങിയിരിക്കുന്നു. ഓരോരുത്തരും എങ്ങനെ ചിന്തിക്കുമെന്നും പ്രവർത്തിക്കുമെന്നുള്ള ഏകദേശ ധാരണ എല്ലാവര്ക്കും ലഭിക്കുകയും ചെയ്തു. എന്നാൽ ഇപ്പോഴും മറ്റുള്ളവർക്ക് പിടികൊടുക്കാതെ ദുരൂഹമായി തുടരുന്നത് സുജോ മാത്യു എന്ന മത്സരാർഥിയാണ്. ഇടയ്ക്കിടെ നിറം മാറ്റുന്ന സുജോയെയാണ് പ്രേക്ഷകർ ബിഗ് ബോസ് ഹൗസിൽ കാണുന്നത്. സുജോ തന്റെ വിജയത്തിന് വേണ്ടി എന്തും ചെയ്യും എന്നതിന്റെ തെളിവ് കഴിഞ്ഞ ദിവസം പ്രേക്ഷകർക്കും ലഭിച്ചു.

മത്സരാർത്ഥികൾക്ക് തങ്ങളുടെ കഴിവുകൾ തെളിയിക്കാനും ബിഗ് ബോസ് ഹൗസിൽ നിലനിൽക്കാനും സഹായിക്കുന്ന ഏറ്റവും വലിയൊരു മാർഗമാണ് ബിഗ് ബോസ് നൽകുന്ന ടാസ്ക്കുകൾ. കഴിഞ്ഞ ദിവസവും ബിഗ് ബോസ് മത്സരാർത്ഥികൾക്കായി അത്തരമൊരു ടാസ്ക്ക് നൽകിയിരുന്നു. വമ്പനൊരു ഓഫറും ബിഗ് ബോസ് ടാസ്ക്കിനൊപ്പം നൽകിയിരുന്നു.സ്വര്‍ണ്ണഖനിയുമായി ബന്ധപ്പെട്ട ടാസ്‌ക്കിനിടയിലായിരുന്നു വലിയ പ്രഖ്യാപനം ഉണ്ടായത് . ടാസ്‌ക്കില്‍ ഏറ്റവും കൂടുതല്‍ പോയിന്റ് നേടുന്നയാള്‍ക്ക് നേരിട്ട് ഗ്രാന്‍ഡ് ഫിനാലെയില്‍ പങ്കെടുക്കാനുള്ള അവസരമാണ് ബിഗ് ബോസ് നല്‍കിയത്. ഇത് കേട്ടതോടെ മത്സരാര്‍ത്ഥികളുടെ ആവേശവും ഇരട്ടിക്കുകയായിരുന്നു. ആക്റ്റിവിറ്റി ഏരിയയില്‍ തയ്യാറാക്കിയ സ്വര്‍ണ്ണഖനിയില്‍ നിന്നും സ്വര്‍ണ്ണം കുഴിച്ചെടുക്കുകയെന്ന ടാസ്‌ക്കായിരുന്നു ബിഗ് ബോസ് നല്‍കിയത്. ടാസ്ക്കിൽ ആദ്യം മത്സരിച്ചത് സുജോയും പാഷാണം ഷാജിയുമായിരുന്നു. തുടർന്ന് സുജോ രജിത്ത് കുമാറുമായി ഒരു കരാർ ഉണ്ടാക്കി. രജിത്ത് കുമാറിന്റെ സ്ഥാനം നൽകി സുജോ രജിത്തിന്‌ പകരം മത്സരിക്കുകയായിരുന്നു മാത്രമല്ല സുജോയുടെ നിധി രജിത്ത് കുമാർ സൂക്ഷിക്കുകയും ചെയ്യും. പകരമായി രജിത്തിന് കമ്മീഷൻ നൽകണം. തുടർന്ന് രഘുവും ഇവരോടൊപ്പം ചേരുകയും സുജോയുടെ സ്വർണ്ണം സൂക്ഷിക്കാൻ രജിത്തിനൊപ്പം ചേരുകയും ചെയ്തു.ഇതിനിടയിൽ പൊസിഷനുവേണ്ടി വീണയും സുജോയും തമ്മിൽ കടുത്ത വാക്കുതർക്കം ഉണ്ടാവുകയും ചെയ്തിരുന്നു.

എന്നാൽ ഡെയിലി ടാസ്ക്കിനിടെയുള്ള നൃത്തത്തിൽ വീണയും ആര്യയും സുജോയും തമ്മിൽ രഹസ്യ സംഭാഷണം നടത്തുന്നതാണ് പ്രേക്ഷകർ കാണുന്നത്. രജിത്ത് കുമാറിന്റെ കാലുവാരനാണ് മൂവരും ശ്രമിച്ചത്. എന്നാൽ പദ്ധതി വിജയിച്ചില്ല. പിന്നീട് സുജോയെ പരീക്ഷിക്കാൻ വീണയും ആര്യയും ഫുക്രുവും ജസ്ലയും ചേർന്ന് തീരുമാനിക്കുന്നു. ഇതിന്റെ ഭാഗമായി നാലുപേരും ചേർന്ന് സുജോയുടെ സ്വർണ്ണം തട്ടിയെടുക്കാൻ ശ്രമിക്കുന്നു. നാലുപേരും ചേർന്ന് രജിത്തിനെ ആക്രമിക്കാൻ ശ്രമിച്ചപ്പോൾ സുജോ ഇടപ്പെട്ടു. പിന്നീട് വീണയും സുജോയും തമ്മിൽ രൂക്ഷമായ വാക്കുതർക്കം ഉണ്ടാകുകയും ചെയ്തു. സുജോയുടെ തനി നിറം അപ്പോഴാണ് പുറത്തുവന്നത്. ഒടുവില്‍ ബിഗ് ബോസ് ഇന്ന് ഫലം പ്രഖ്യാപിച്ചപ്പോള്‍ ഒന്നാം സ്ഥാനത്ത് എത്തിയത് സുജോയായിരുന്നു.

നേടിയെടുത്ത സ്വര്‍ണ്ണം മോഷണം പോവാതെ സൂക്ഷിക്കണമെന്നും ബിഗ് ബോസ് നിര്‍ദേശിച്ചിരുന്നു. ഓരോ ഘട്ടത്തിലും സ്വര്‍ണം നേടുകയും ചെയ്യണം. ലക്ഷ്വറി ടാസ്‌ക്കുകളിലെ പോയിന്റ് മാത്രമല്ല ഇനി പരിഗണിക്കുന്നതെന്നും ബിഗ് ബോസ് പറഞ്ഞിരുന്നു. നേരിട്ട് ഗ്രാന്റ് ഫിനാലെയിലേക്കെത്തുന്ന മത്സരാര്‍ത്ഥി ആരായിരിക്കുമെന്നറിയാനായി കാത്തിരിക്കുകയാണ് പ്രേക്ഷകരും . ബിഗ് ബോസിന്റെ പുതിയ പ്രഖ്യാപനം വന്നതോടെ ബിഗ് ബോസ് ഹൗസിലെ മത്സരം ഒന്നുകൂടി കടുത്തിരിക്കുകയാണ്.