'ദ് ലവേഴ്‌സ്' സിനിമയിലെ നായകന് സിനിമയിലേതു പോലെ ദാരുണാന്ത്യം
ചവറ ഭരണിക്കാവ് പിജെ ഹൗസില്‍ റിട്ട. എസ്‌ഐ ജോണ്‍ റോഡ്രിഗ്‌സിന്റെ മകനും 'ദ് ലവേഴ്‌സ്' എന്ന സിനിമയിലെ നായകനുമായിരുന്ന ഗോഡ്‌ഫ്രെ(36), താന്‍ സിനിമയില്‍ അഭിനയിച്ചു തീര്‍ത്ത രംഗങ്ങള്‍ ജീവിതത്തിന്റെ ക്ലൈമാക്‌സില്‍ ആവര്‍ത്തിച്ച് മടങ്ങി. 4 വര്‍ഷം മുന്‍പ് സുഹൃത്ത് ഷൈജുവുമായി ചേര്‍ന്നു നിര്‍മിച്ച 'ദ് ലവേഴ്‌സ്' എന്ന സിനിമയിലെ അന്ത്യരംഗങ്ങളുടെ തനിയാവര്‍ത്തനമായിരുന്നു ജീവിതത്തിലും നടന്നത്.
ഗോഡ്‌ഫ്രെ, പ്രാക്കുളത്തെ ബന്ധുവീട്ടില്‍ പോയി മടങ്ങി വരവേ, കഴിഞ്ഞ രാത്രി തൃക്കടവൂര്‍ നീരാവില്‍ പൊട്ടന്‍മുക്കിനു സമീപം ബൈക്ക് നിയന്ത്രണം വിട്ടു മതിലിലിടിച്ചായിരുന്നു അപകടം. ഹെല്‍മറ്റ് തകര്‍ന്നു തലയ്ക്കു പരുക്കേറ്റു രക്തം വാര്‍ന്ന് ഏറെ നേരം റോഡില്‍ കിടന്നെങ്കിലും ആശുപത്രിയിലെത്തിക്കാന്‍ ആരും തയാറായില്ല. പിന്നീടെത്തിയ കെഎസ്ഇബി ജീവനക്കാരന്‍ കൃത്രിമശ്വാസം നല്‍കി. തുടര്‍ന്ന് സ്ഥലത്തെത്തിയ യുവാക്കള്‍ ഓട്ടോറിക്ഷയില്‍ സമീപത്തെ സ്വകാര്യാശുപത്രിയിലേക്കു കൊണ്ടുപോയെങ്കിലും ഫലമുണ്ടായില്ല.
സിനിമയിലെ അപകടരംഗത്തിലും ഗോഡ്‌ഫ്രെയുടെ നായക കഥാപാത്രം ഓടിച്ച ബൈക്ക് ലോറിയുമായി കൂട്ടിയിടിക്കുകയായിരുന്നു. നായകന്റെ മൃതദേഹം പള്ളിയിലെത്തിക്കുന്ന ആംബുലന്‍സ് ഡ്രൈവറുടെ വേഷമിട്ട ചവറ പന്മന പുത്തന്‍ചന്ത അഥീന കോട്ടേജില്‍ അബ്ദുല്‍ സലീം തന്നെ ഇന്നലെ ഗോഡ്‌ഫ്രെയുടെ മൃതദേഹം ആംബുലന്‍സില്‍ ചവറ തലമുകള്‍ സെന്റ് അഗസ്റ്റിന്‍ പള്ളിയിലെത്തിച്ചു. ഇന്നലെ വീട്ടുകാരുടെ അഭ്യര്‍ഥന പ്രകാരം സിനിമയില്‍ മൃതദേഹത്തെ വസ്ത്രങ്ങള്‍ അണിയിച്ച സലിം അതേ വസ്ത്രങ്ങള്‍ അണിയിച്ചതു കണ്ണീര്‍ക്കാഴ്ചയായി.
സിനിമയിലെ അന്ത്യരംഗങ്ങള്‍ പാട്ടിലൂടെ ചിത്രീകരിച്ചത് ഗോഡ്‌ഫ്രെയുടെ വീടിന് എട്ടു കിലോമീറ്റര്‍ അകലെ കരുനാഗപ്പള്ളിയിലായിരുന്നു. സിനിമയിലെ ബാക്കി എല്ലാ പാട്ടുകളും യൂട്യൂബില്‍ അപ്ലോഡ് ചെയ്‌തെങ്കിലും ഈ പാട്ടു മാത്രം അപ്ലോഡ് ചെയ്യാന്‍ ഗോഡ്‌ഫ്രെ സമ്മതിച്ചിരുന്നില്ല. അമ്മ: ഫിലോ. സഹോദരങ്ങള്‍: ആശ, ആന്റണി.
https://www.facebook.com/Malayalivartha
