മിന്നല്‍ മുരളിയുടെ സെറ്റ് തകര്‍ത്ത കേസിലെ സൂത്രധാരന്‍ പിടിയില്‍; നിരവധി മേഷണ കേസുകളിലെ പ്രതിയാണ് ഇയാള്‍; എ ടി എം തകര്‍ത്ത് പണം അപഹരിക്കാന്‍ ശ്രമിച്ചതിന് കൊരട്ടി ആലുവ സ്റ്റേഷനിലും മാരകായുധങ്ങള്‍ കൈവശം വച്ചതിന് കാലടി സ്റ്റേഷനിലും ഇയാള്‍ക്കെതിരെ കേസ്
മിന്നല്‍ മുരളി എന്ന ചിത്രത്തിന്റെ സെറ്റ് തകര്‍ത്ത കേസിലെ സൂത്രധാരനും രണ്ടാം പ്രതിയുമായ കൃഷ്ണദാസ്(28) പിടിയിലായി. കാലടി മാണിക്കമംഗലം സ്വദേശിയാണ് പ്രതി. ജില്ലാ പോലീസ് മേധാവി കെ കാര്‍ത്തിക് ഐ പി എസിന്റെ നേതൃത്വത്തിലുള്ള അന്വേഷണ സംഘമാണ് ഇയാളെ അറസ്റ്റ് ചെയ്തത്.
പെരുമ്പാവൂരില്‍ നിന്നുമാണ് പ്രതിയായ കൃഷ്ണദാസിനെ പിടികൂടിയത്. നിരവധി മേഷണ കേസുകളിലെ പ്രതിയാണ് ഇയാള്‍. എ ടി എം തകര്‍ത്ത് പണം അപഹരിക്കാന്‍ ശ്രമിച്ചതിന് കൊരട്ടി ആലുവ സ്റ്റേഷനിലും മാരകായുധങ്ങള്‍ കൈവശം വച്ചതിന് കാലടി സ്റ്റേഷനിലും ഇയാള്‍ക്കെതിരെ കേസുകളുണ്ട്. സെറ്റ് തകര്‍ത്ത കേസുമായി ബന്ധപ്പെട്ട് നേരത്തെ അഞ്ച് പേരെ അറസ്റ്റ് ചെയ്തിരുന്നു.
പ്രതികള്‍ക്കെതിരെ കാപ്പ ചുമത്തുന്നതുമായി ബന്ധപ്പെട്ട നടപടിയുമായി മുമ്പോട്ടു പോവുകയാണ് പോലീസ്. സ്വകാര്യ സ്വത്തിനുള്ള നാശനഷ്ടം തടയുകയും നഷ്ടപരിഹാരം നല്‍കലും ആക്ട് മതസ്പര്‍ധ ഉണ്ടാക്കുന്ന തരത്തിലുള്ള പ്രവര്‍ത്തനം, എപ്പിഡമിക് ഡിസീസസ് ഓര്‍ഡിനന്‍സ്, ഗൂഢാലോചന, മോഷണം എന്നീ വകുപ്പുകളും ചാര്‍ജ് ചെയ്തിട്ടുണ്ട്. പ്രതികളുടെ മുന്‍കാല ചരിത്രം പോലീസ് അന്വേഷിച്ചു വരുന്നു.
പെരുമ്പാവൂര്‍ സ്റ്റേഷന്‍ ഓഫീസര്‍ സി.ജയകുമാര്‍, പ്രിന്‍സിപ്പല്‍ എസ്.ഐ. ബേസില്‍, അഡീഷണല്‍ എസ്.ഐ.റിന്‍സ് തോമസ്, ഏഅടക രാജേന്ദ്രന്‍, സി.പി.ഒ പ്രിജിത്ത് എന്നിവരാണ് പ്രതിയെ അറസ്റ്റ് ചെയ്ത സംഘത്തിലുണ്ടായിരുന്നത്.
കാലടി മണപ്പുറത്താണ് മിന്നല്‍ മുരളി എന്ന സിനിമക്ക് വേണ്ടി സെറ്റ് നിര്‍മിച്ചിരുന്നത്. അതാണ് അന്താരാഷ്ട്ര ഹിന്ദു പരിഷത് പ്രവര്‍ത്തകര്‍ പൊളിച്ചത്. പൊളിക്കുന്നതിന്റെ ദൃശ്യങ്ങള്‍ എ എച് പി സംസ്ഥാന സെക്രട്ടറി തന്നെ ഫേസ്ബുക്കില്‍ പോസ്റ്റ് ചെയ്യുകയും ചെയ്തു. ആലുവ കാലടി മണപ്പുറത്ത് സജ്ജമാക്കിയ കൂറ്റന്‍ സെറ്റാണ് തകര്‍ത്തത്. ഇതിന്റെ അടിയില്‍ വലിയ പ്രതിഷേധമാണ് നടക്കുന്നത്. സെറ്റിട്ടത് മഹാദേവര്‍ ക്ഷേത്രത്തിനു മുന്നിലാണെന്നും ഇത് ഒരുവര്ഷത്തോളമായിട്ടും പൊളിക്കാന്‍ കൂട്ടാക്കിയില്ലെന്നുമാണ് ഇവര്‍ പറയുന്ന ന്യായം.
സെറ്റ് വലിയ ചുറ്റികകള്‍ കൊണ്ട് അടിച്ചുതകര്‍ക്കുന്ന ചിത്രങ്ങള്‍ സഹിതം ആക്രമണം നടത്തിയ വിവരം ഇവര്‍ ഫേസ്ബുക്കിലൂടെ അറിയിക്കുകയായിരുന്നു. അന്താരാഷ്ട്ര ഹിന്ദു പരിഷത്ത് കേരളം ജനറല്‍ സെക്രട്ടറി ഹരി പാലോടാണ് സെറ്റ് തകര്‍ത്ത പ്രവര്‍ത്തകരെ അഭിനന്ദിച്ച് ഫേസ്ബുക്കില്‍ പോസ്റ്റിട്ടത്.
എന്നാല്‍ സിനിമ ഷൂട്ടിംഗ് ഇനിയും തീര്‍ന്നിട്ടില്ലെന്നും ലോക്ക് ഡൌണ്‍ ആയതിനാല്‍ ഷൂട്ടിങ് നിര്‍ത്തിവെച്ചിരിക്കുകയുമായിരുന്നു. ബേസില്‍ ജോസഫ് സംവിധാനം ചെയ്യുന്ന മിന്നല്‍ മുരളിയില്‍ സൂപ്പര്‍ ഹീറോ കഥാപാത്രമായാണ് ടൊവീനോ എത്തുന്നത്. ചിത്രത്തിന്റെ ആദ്യ ഷെഡ്യൂള്‍ നേരത്തെ പൂര്‍ത്തിയായിരുന്നു. ആലുവ മണപ്പുറത്ത് രണ്ടാംഘട്ട ചിത്രീകരണം ആരംഭിക്കാനിരിക്കെയാണ് ലോക്ക് ഡൗണ്‍ പ്രഖ്യാപിച്ചത്.
https://www.facebook.com/Malayalivartha
