സൗരയുഥത്തിന് പുറത്ത് ഭൂമിക്ക് സമാനമായ 10 പുതിയ ഗ്രഹങ്ങളെ നാസയുടെ കെപ്ലര്‍ ദൗത്യം വഴി തിരിച്ചറിഞ്ഞു. ഭൗമസദൃശ്യമായ ഗ്രഹങ്ങളാണെന്ന് മാത്രമല്ല, അവ മാതൃ നക്ഷത്രത്തെ പരിക്രമണം ചെയ്യുന്നത് വാസയോഗ്യ മേഖലയിലാണെന്നതും പ്രതീക്ഷയുണര്‍ത്തുകയാണ്.

219 പുതിയ ഗ്രഹങ്ങളാണ് നാസ കണ്ടെത്തിയത്. ഇവയില്‍ ഭൗമസദൃശ്യമായ 10 ഗ്രഹങ്ങളില്‍ ജീവന്റെ തുടിപ്പുകള്‍ കാണാനുള്ള സാധ്യത ഏറെയാണ്. ഭൂമിയുടേതിന് സമാനമായ വലിപ്പവും അന്തരീക്ഷവുമുള്ള ഇവിടെ ജീവന്റെ തുടിപ്പുകള്‍ കണ്ടെത്താനാകുമെന്നാണ് പ്രതീക്ഷിക്കുന്നതെന്ന് നാസ പ്രസ്താവന കുറിപ്പില്‍ അറിയിച്ചു.

സൗരയുഥത്തിന് വെളിയില്‍ ഭൂമിക്ക് സമാനമായ ഗ്രഹങ്ങളെ കണ്ടെത്താന്‍ 2009 വിക്ഷേപിച്ച ടെലിസ്‌കോപ്പാണ് കെപ്ലെര്‍. ആകാശഗംഗയില്‍ 45 ലക്ഷം നക്ഷത്രങ്ങള്‍ അടങ്ങിയ പ്രദേശമാണ് കെപ്ലര്‍ വിശദമായി നിരീക്ഷിക്കുന്നത്. ഗ്രഹങ്ങളുണ്ടാകാന്‍ സാധ്യതയുള്ള ഒന്നരലക്ഷത്തോളം നക്ഷത്രങ്ങള്‍ കെപ്ലെറുടെ ദൃഷ്ടിയിലുണ്ട്.