താപനില അപകടകരമായ നിലയിലേക്ക് ഉയര്‍ന്ന് ചുട്ടുപൊള്ളുന്ന സ്ഥിതിയിലായതോടെ തെക്കുപടിഞ്ഞാറന്‍ അമേരിക്കയില്‍ 40 വിമാനങ്ങള്‍ യാത്ര റദ്ദാക്കി. പല ഭാഗത്തും താപനില 53 ഡിഗ്രി സെല്‍ഷ്യസ്
വരെയായതോടെ ഫീനിക്‌സിലെ ഡോക്ടര്‍മാര്‍ കരുതലെടുക്കാന്‍ ജനങ്ങളോട് ആവശ്യപ്പെട്ടിട്ടുണ്ട്. അരിസോണയിലെ താപനിലയില്‍ നിയന്ത്രണാതീതമായി ഉയരുകയാണ്. നെവാഡ, ഡെത്ത്‌വാലി, കാലിഫോര്‍ണിയ എന്നിവിടങ്ങളിലെല്ലാം കടുത്ത ചൂട് അനുഭവപ്പെടുകയാണ്.

വേനലിന്റെ ആദ്യ ദിനമായ ചൊവ്വാഴ്ച ലാസ്‌വേഗാസില്‍ 47 ഡിഗ്രി ആയിരുന്നു ചൂട്. ചൊവ്വാഴ്ച ചൂട് കൂടുമെന്ന് പ്രവചിച്ചിരുന്ന കാലാവസ്ഥാ നിരീക്ഷണ കേന്ദ്രം വരും ദിവസങ്ങളില്‍ ഫീനിക്‌സിലെ ചൂട് 48 ഡിഗ്രിക്ക് മുകളിലേക്ക് പോകുമെന്നും പറഞ്ഞിട്ടുണ്ട്. 20 വര്‍ഷത്തിനിടയില്‍ മരുഭൂമി നഗരത്തില്‍ രേഖപ്പെടുത്തുന്ന ഏറ്റവും ഉയര്‍ന്ന ചൂടായിരിക്കും ഇതെന്നും പറയുന്നു. ആഴ്ചമദ്ധ്യം കടുത്ത ചൂട് പ്രതീക്ഷിക്കപ്പെടുന്ന സാഹചര്യത്തിലാണ് വിമാനങ്ങള്‍ക്ക് മുന്നറിയിപ്പ് നല്‍കിയത്.

ചൂട് അതിന്റെ പാരമ്യത്തിലേക്ക് ഉയരുകയും വിമാനങ്ങള്‍ യാത്ര ഒഴിവാക്കുകയും ചെയ്ത സാഹചര്യത്തില്‍ തിങ്കളാഴ്ച മുതല്‍ ബുധനാഴ്ച വരെ മറ്റു വിമാനങ്ങളിലേക്ക് ഫീസ് ഇല്ലാതെ തന്നെ മാറാന്‍ യാത്രക്കാര്‍ അവസരം ഒരുക്കാമെന്ന് അമേരിക്കന്‍ എയര്‍ലൈന്‍സ് ഫീനിക്‌സിലെ യാത്രക്കാര്‍ ഉറപ്പ് നല്‍കി. താപനില 47 ഡിഗ്രിയിലേക്ക് ഉയര്‍ന്നാല്‍ ജെറ്റുകള്‍ പ്രവര്‍ത്തിപ്പിക്കാനാകില്ലെന്ന് അമേരിക്കന്‍ എയര്‍ലൈന്‍സ് വ്യക്തമാക്കുകയും ചെയ്തിട്ടുണ്ട്.

മറ്റേതൊരു നഗരത്തേക്കാളും ലാസ് വെഗാസാണ് ചുട്ടു പൊള്ളുന്നതെന്ന് സന്ദര്‍ശകര്‍ അറിഞ്ഞിരിക്കണമെന്നാണ് അധികൃതര്‍ പറയുന്നത്. എളുപ്പം ചൂടുപിടിക്കുകയും പതിയെ തണുക്കുകയും ചെയ്യുന്ന കോണ്‍ക്രീറ്റ് കെട്ടിടങ്ങള്‍ ചൂട് വര്‍ദ്ധിപ്പിക്കുകയും ചെയ്യും. പെട്ടെന്ന് പിടിക്കുമ്പോള്‍ കൈകള്‍ പൊള്ളുന്നതിനാല്‍ വാതിലുകളുടെ ലോഹപിടികള്‍ പൊതിയണമെന്നും കാറുകളുടെ െ്രെഡവിംഗ് വീലുകളില്‍ പിടിക്കുമ്പോള്‍ സൂക്ഷിക്കണമെന്നും വളര്‍ത്ത് മൃഗങ്ങളെയും മറ്റും പുറത്ത് അലയാന്‍ വിടുന്നത് അവയ്ക്ക് പൊള്ളലേല്‍ക്കാന്‍ കാരണമാകുമെന്നും പറയുന്നുണ്ട്.

2016 ല്‍ ചൂടിനെ തുടര്‍ന്ന് 130 പേര്‍ മരിച്ച സ്ഥലമാണ് ഫീനിക്‌സ്. ചൂടുമായി ബന്ധപ്പെട്ട പ്രശ്‌നങ്ങളെ തുടര്‍ന്ന് എല്ലാവര്‍ഷവും അരിസോണയിലെ അത്യാഹിത വിഭാഗത്തില്‍ 2000 ലധികം ആള്‍ക്കാര്‍ ചികിത്സ തേടിയെത്തുന്നതായും പറയുന്നു.