ലക്കിടിയിലെ റിസോര്‍ട്ടില്‍ പോലീസുമായുണ്ടായ ഏറ്റുമുട്ടലില്‍ മാവോവാദി നേതാവ് സി.പി. ജലീല്‍ കൊല്ലപ്പെട്ടതിന്റെ പ്രത്യാക്രമണങ്ങള്‍ മുന്നില്‍കണ്ട് വയനാട്ടില്‍ അതീവസുരക്ഷ. മലപ്പുറം, പാലക്കാട് ജില്ലകളില്‍ മാവോവാദി സാന്നിധ്യമുള്ള മേഖലകളിലും സുരക്ഷ ശക്തമാക്കിയിട്ടുണ്ട്. സംഭവത്തില്‍ മാവോവാദികള്‍ എതുതരത്തില്‍ പ്രതികരിക്കുമെന്ന ആശങ്കയിലാണ് പോലീസ്. ബുധനാഴ്ച രാത്രിയുണ്ടായ പോലീസിന്റെ ശക്തമായ ആക്രമണത്തില്‍ മാവോവാദികള്‍ പിന്‍വലിഞ്ഞിട്ടുണ്ടെങ്കിലും ഏതുനിമിഷവും അവരുടെ ഭാഗത്തുനിന്ന് തിരിച്ചടി പ്രതീക്ഷിക്കുന്നുണ്ട്.
മാവോവാദി സംഘങ്ങള്‍ ജില്ലയുടെ പലഭാഗങ്ങളിലായി തമ്പടിച്ചിട്ടുള്ളതിനാല്‍ ജില്ലയിലുടനീളം പോലീസ് നിരീക്ഷണം ശക്തമാണ്.
തിരുനെല്ലി, തലപ്പുഴ, പടിഞ്ഞാറത്തറ, വെള്ളമുണ്ട, മാനന്തവാടി, മേപ്പാടി, പുല്പള്ളി, കേണിച്ചിറ, തൊണ്ടര്‍നാട് പോലീസ് സ്‌റ്റേഷനുകളില്‍ സുരക്ഷ വര്‍ധിപ്പിച്ചിട്ടുണ്ട്. രണ്ടു വര്‍ഷത്തിനിടെ സംസ്ഥാനത്ത് പോലീസുമായുണ്ടായ ഏറ്റുമുട്ടലില്‍ മൂന്ന് മാവോവാദി നേതാക്കളാണ് കൊല്ലപ്പെട്ടത്. നേതാക്കള്‍ നഷ്ടമായെങ്കിലും സംഘടനയുടെ ശക്തി ക്ഷയിച്ചിട്ടില്ലെന്ന് ബോധ്യപ്പെടുത്താന്‍ മാവോവാദികള്‍ തീര്‍ച്ചയായും ആക്രമണത്തിന് മുതിരുമെന്നാണ് രഹസ്യാന്വേഷണ വിഭാഗങ്ങള്‍ കരുതുന്നത്.

നിലമ്പൂര്‍ ഏറ്റുമുട്ടലിന് പ്രതികാരം ചെയ്യുന്നതിനായി കേരളത്തിലെ പ്രധാന ശക്തികേന്ദ്രമായ വയനാട്ടില്‍ മാവോവാദികള്‍ ആക്രമണത്തിന് തയ്യാറെടുക്കുന്നതായി ഇന്റലിജന്‍സ് മുന്നറിയിപ്പുണ്ടായിരുന്നു. നിലമ്പൂര്‍ ഏറ്റുമുട്ടലിന് തിരിച്ചടി നല്‍കുന്നതിനും വയനാട് കേന്ദ്രമായി പ്രവര്‍ത്തനം ശക്തമാക്കുന്നതിനുമായി രൂപവത്കരിച്ച വരാഹിണി ദളത്തിനായിരുന്നു ആക്രമണം നടത്തുന്നതിനുള്ള ചുമതല.

ഏറ്റുമുട്ടലിന്റെ ഒന്നാം വാര്‍ഷികത്തിന് മുന്നോടിയായി അയല്‍സംസ്ഥാനങ്ങളില്‍ നിന്നുള്‍പ്പെടെ ഒട്ടേറെ മാവോവാദികള്‍ ജില്ലയിലെത്തിയെങ്കിലും പോലീസ് അതീവജാഗ്രത പുലര്‍ത്തിയതിനാല്‍ തിരിച്ചടിയ്ക്കാനായില്ല. പക്ഷെ, നാടുനീളെ പോലീസ് വലവിരിച്ചിട്ടും മാനന്തവാടിയില്‍ നിന്ന് മാവോവാദി നേതാവ് ചന്ദ്രു ബസ് മാര്‍ഗം കൈതക്കൊല്ലിയിലും മാവോവാദി നേതാവ് ലത ബസ് മാര്‍ഗം തൃശ്ശിലേരിയിലും എത്തിയത് വിവാദമായിരുന്നു.

നിലമ്പൂരില്‍ രണ്ട് നേതാക്കളെ പോലീസ് വെടിവെച്ച് കൊലപ്പെടുത്തിയിട്ട് രണ്ട് വര്‍ഷം കഴിഞ്ഞിട്ടും തിരിച്ചടി നല്‍കാനാവാത്തതില്‍ മാവോവാദികള്‍ക്കിടയില്‍ കടുത്ത അമര്‍ഷമുണ്ട്. ഇതിനിടെ ജലീലിന്റെ രക്തസാക്ഷിത്വത്തിനും തിരിച്ചടിനല്‍കാനായില്ലെങ്കില്‍ മാവോവാദികളുടെ ആത്മവീര്യത്തെ കെടുത്തുമെന്നതിനാല്‍ ശക്തമായ തിരിച്ചടിയുണ്ടാകുമെന്നാണ് കരുതുന്നത്.