മിസോറാം ഗവര്ണര് കുമ്മനം രാജശേഖരന് രാജിവച്ചു; സജീവരാഷ്ട്രീയത്തിലേക്ക് മടങ്ങി വരുന്നതിന് മുന്നോടിയായാണ് രാജിയെന്നാണ് വിവരം; കുമ്മനത്തെ കേരളത്തിലേക്ക് തിരികെ കൊണ്ടു വരണമെന്ന് സംസ്ഥാനത്തെ ആര്എസ്എസ് നേതൃത്വം ബിജെപിയോട് ആവശ്യപ്പെട്ടിരുന്നു
മിസോറാം ഗവര്ണര് കുമ്മനം രാജശേഖരന് രാജിവച്ചു. സജീവരാഷ്ട്രീയത്തിലേക്ക് മടങ്ങി വരുന്നതിന് മുന്നോടിയായാണ് രാജിയെന്നാണ് വിവരം. രാജി രാഷ്ട്രപതി രാംനാഥ് കോവിന്ദ് സ്വീകരിച്ചു. കുമ്മനത്തെ കേരളത്തിലേക്ക് തിരികെ കൊണ്ടു വരണമെന്ന് സംസ്ഥാനത്തെ ആര്എസ്എസ് നേതൃത്വം ബിജെപിയോട് ആവശ്യപ്പെട്ടിരുന്നു. ഇക്കാര്യം ബിജെപി കേന്ദ്രനേതൃത്വം അംഗീകരിച്ചതോടെയാണ് സീനിയര് നേതാവിന്റെ മടങ്ങി വരവ്. കുമ്മനം മടങ്ങിയെത്തുന്നതോടെ തിരുവനന്തപുരത്തെ ബിജെപി സ്ഥാനാര്ഥിയാരെന്ന ആകാംക്ഷയ്ക്കും അവസാനമാവുകയാണ്. കുമ്മനം തന്നെ തിരുവനന്തപുരത്ത് മത്സരത്തിന് ഇറങ്ങണമെന്നാണ് കേരളത്തിലെ ആര്എസ്എസ് ഘടകത്തിന്റെ നിലപാട്.
ഇക്കാര്യം ബിജെപി ദേശീയനേതൃത്വത്തെ അവര് അറിയിച്ചിട്ടുണ്ട്. കേരളത്തില് പാര്ട്ടിക്ക് ഏറ്റവും വിജയസാധ്യതയുള്ള സീറ്റാണ് തിരുവനന്തപുരമെന്നും അവിടെ ഏറ്റവും സാധ്യത കുമ്മനം രാജശേഖരനാണെന്നുമാണ് ആര്എസ്എസ് വിലയിരുത്തല്. ശശി തരൂരിനോടു കൊമ്പുകോര്ക്കാന് കുമ്മനത്തിനേ പറ്റൂ എന്ന നിലപാടിലും വിശ്വാസത്തിലുമാണ് പ്രവര്ത്തകര്. കുമ്മനം വരുമെന്ന പ്രതീക്ഷയുടെ അടിസ്ഥാനം ആര്എസ്എസ്സിന്റെ നിലപാടാണ്. കുമ്മനത്തെ കേരളത്തിലേക്കു മടക്കിക്കൊണ്ടു വരണമെന്ന ഉറച്ച നിലപാട് ആര്എസ്എസ് നേതൃത്വം ബിജെപിയെ അറിയിച്ചു കഴിഞ്ഞു. കുമ്മനം വന്നില്ലെങ്കില് പിന്നെ പരിഗണിക്കേണ്ടതു സുരേഷ് ഗോപിയെ ആകണമെന്നും അവര് അറിയിച്ചിട്ടുണ്ട്.
എന്നാല്, കുമ്മനത്തിന്റെ മടങ്ങിവരവിനു മുഖ്യ തടസ്സം ഗവര്ണര് സ്ഥാനം തന്നെ. കര്ണാടക ഗവര്ണര് വാജുഭായ് വാല അടക്കം ഏതാനും ബിജെപി നേതാക്കള് സ്വന്തം നാട്ടിലേക്കു മടങ്ങി സജീവ രാഷ്ട്രീയത്തിലേയ്ക്കു തിരിച്ചുവരാനുള്ള താല്പര്യം ബിജെപി കേന്ദ്ര നേതൃത്വത്തെ അറിയിച്ചിട്ടുണ്ട്. ഒരാള്ക്ക് മടങ്ങാന് അവസരം നല്കിയാല് എല്ലാവരെയും പരിഗണിക്കേണ്ടി വരുമെന്ന ആശങ്ക ബിജെപിക്കുണ്ട്. തിരുവനന്തപുരം സീറ്റിലേക്കു കണ്ണുവച്ചിരിക്കുന്ന ഒരുപിടി നേതാക്കള് ഇപ്പോള് തന്നെ ബിജെപിയിലുണ്ട്. അവരാരും കുമ്മനത്തിനു വേണ്ടി വാദിക്കില്ല. അതിനാല് ആര്എസ്എസ് നിലപാടാണു നിര്ണായകം.
https://www.facebook.com/Malayalivartha
