ആക്കളിയൊന്നും ഇനി നടക്കില്ല പോലീസിനെ ഒന്നു നന്നാക്കാന്‍ പറ്റുമോ നോക്കട്ടെ. സ്വന്തം ഡിപ്പാര്‍ട്ട്‌മെന്റിനെ ആദ്യം നന്നാക്കിയാലെ മറ്റുള്ളവരെ നന്നാക്കാന്‍ യോഗ്യതയുള്ളു എന്ന് ഇപ്പോളെങ്കിലും തലപ്പത്തുള്ളവര്‍ക്ക് മനസിലായല്ലോ. പിണറായിസര്‍ക്കാരിന്റെ പോലീസനെക്കുറിച്ച് നാട്ടിലൊന്നും അഭിപ്രായം അത്ര നല്ലതല്ലന്നിരിക്കെ ഇത്രയെങ്കിലു ചെയ്യുന്നതു തന്നെ വലിയകാര്യമാണ്. ജില്ലാ പൊലീസ് മേധാവിയുടെ ഓഫിസില്‍ ഭരണപരമായ ജോലികള്‍ നിര്‍വഹിക്കുന്ന മിനിസ്റ്റീരിയല്‍ ജീവനക്കാര്‍ സഹപ്രവര്‍ത്തകരെ 'എടാ പോടാ, എടീ പോടി' തുടങ്ങിയ വാക്കുകള്‍ ഉപയോഗിച്ച് അഭിസംബോധന ചെയ്യുന്നതിനെ വിലക്കി ഇടുക്കി പൊലീസ് മേധാവിയുടെ സര്‍ക്കുലര്‍.

ഒരേ റാങ്കിലുള്ള മിനിസ്റ്റീരിയല്‍ ജീവനക്കാര്‍ സഹപ്രവര്‍ത്തകരെ സര്‍, മാഡം എന്ന് അഭിസംബോധന ചെയ്യണമെന്നും സര്‍ക്കുലറില്‍ വ്യക്തമാക്കുന്നു. ഇടുക്കിയിലാണ് ഉത്തരവിറങ്ങിയതെങ്കിലും എല്ലാ ജില്ലകളിലും ഇതാണ് അവസ്ഥയെന്നും പൊലീസ് ഉദ്യോഗസ്ഥരുടെ മോശമായ പെരുമാറ്റത്തെ സംബന്ധിച്ചു നിരവധി പരാതികള്‍ ലഭിക്കുന്നുണ്ടെന്നും ഉന്നത ഉദ്യോഗസ്ഥര്‍ വ്യക്തമാക്കുന്നു.വനിതാ മിനിസ്റ്റീരിയല്‍ ഓഫിസര്‍മാര്‍ പൊലീസ് ഉദ്യോഗസ്ഥരുടെ റാങ്കോ സീനിയോറിറ്റിയോ നോക്കാതെ പേരു വിളിക്കുന്നതു ശ്രദ്ധയില്‍പ്പെട്ടിട്ടുണ്ടെന്നും ഇതു ഒഴിവാക്കണമെന്നും പൊലീസ് മേധാവി നിര്‍ദേശിച്ചിട്ടുണ്ട്. എഎസ്‌ഐ റാങ്കിനു മുകളിലുള്ള ചില ഓഫിസര്‍മാര്‍ നിസാര പരിഗണനകള്‍ക്കായി മിനിസ്റ്റീരിയല്‍ ജീവനക്കാരെ സല്യൂട്ട് ചെയ്യുന്നതായും ഇതു സേനയ്ക്കാകെ നാണക്കേടാണെന്നും സര്‍ക്കുലറിലുണ്ട്. ഓഫിസ് സംബന്ധമായ പരാതികളുണ്ടെങ്കില്‍ ജില്ലാ ആസ്ഥാനത്തെ പൊലീസ് ഹെല്‍പ്പ് ഡെസ്‌കിനെ സമീപിക്കണം. പൊലീസ് ഉദ്യോഗസ്ഥരും മിനിസ്റ്റീരിയല്‍ ജീവനക്കാരെ സര്‍, മാഡം എന്ന് അഭിസംബോധന ചെയ്യണം.നന്നായി പെരുമാറുന്നത് സംബന്ധിച്ചു മിനിസ്റ്റീരിയല്‍ ജീവനക്കാര്‍ക്ക് ഈ മാസം 20ന് മുന്‍പ് ക്ലാസ് നല്‍കണം. ജീവനക്കാര്‍ ഡ്യൂട്ടി സമയം കഴിയുന്നതിനു മുന്‍പു മുങ്ങുന്നത് അനുവദിക്കില്ല. ക്ലാസ് ഫോര്‍ ജീവനക്കാരും താല്‍ക്കാലിക ശുചീകരണ തൊഴിലാളികളും പൊലീസ് ഉദ്യോഗസ്ഥരെ പേരു വിളിക്കുന്നതായി ശ്രദ്ധയില്‍പ്പെട്ടിട്ടുണ്ടെന്നും ഇതു ഒഴിവാക്കണമെന്നും സര്‍ക്കുലറില്‍ വ്യക്തമാക്കുന്നു.