3.65 കോടി രൂപ ചെലവിട്ട് തിരുവല്ല റെയില്‍വേ സ്റ്റേഷനില്‍ നിര്‍മ്മിക്കുന്ന രണ്ട് എസ്‌കലേറ്ററുകളുടെയും നടപ്പാലത്തിന്റേയും നിര്‍മ്മാണം അന്തിമ ഘട്ടത്തിലാണെന്ന് ആന്റോ ആന്റണി എംപി. എസ്‌കലേറ്ററുകളുടെയും നടപ്പാലത്തിന്റേയും നിര്‍മ്മാണപ്രവര്‍ത്തനങ്ങള്‍ വിലയിരുത്താന്‍ തിരുവല്ല റയില്‍വേ സ്റ്റേഷനില്‍ എത്തിയപ്പോഴായിരുന്നു അദ്ദേഹത്തിന്റെ പ്രതികരണം.

എസ്‌കലേറ്റര്‍ നിര്‍മ്മിക്കുന്നതിന് തന്റേയും മുന്‍ രാജ്യ സഭാ ഉപാധ്യക്ഷന്‍ പി. ജെ കുര്യന്റേയും പ്രാദേശിക വികസനഫണ്ടില്‍ നിന്നും 1 കോടി രൂപ വീതവും, നടപ്പാലം നിര്‍മ്മിക്കുന്നതിനായി കേന്ദ്ര റെയില്‍വേ മന്ത്രാലയത്തില്‍ നിന്നും 1.65 കോടി രൂപയുമാണ് അനുവദിച്ചിരിക്കുന്നത്.

ഒന്നാം നമ്പര്‍ പ്ലാറ്റ്‌ഫോമില്‍ യാത്രക്കാര്‍ക്ക് കയറുന്നതിനും ഇറങ്ങുന്നതിനും രണ്ടാം നമ്പര്‍ പ്ലാറ്റ്‌ഫോമില്‍ കയറുന്നതിനുമാണ് എസ്‌കലേറ്റര്‍ നിര്‍മ്മിക്കുന്നത്. ഒന്നാം പ്ലാറ്റ്‌ഫോമില്‍നിന്നും രണ്ടും മൂന്നും പ്ലാറ്റ്‌ഫോമുകളിലേക്ക് പോകുന്നതിനുള്ള നടപ്പാലമാണ് റെയില്‍വേ മന്ത്രാലയത്തില്‍ നിന്നും അനുവദിച്ച 1.65 കോടി രൂപ ഉപയോഗിച്ച് നിര്‍മ്മിക്കുന്നത്.

സിവില്‍ വര്‍ക്കുകള്‍ അടുത്തയാഴ്ചയോടുകൂടി പൂര്‍ത്തീകരിച്ച് എസ്‌കലേറ്റര്‍ പ്രവര്‍ത്തനക്ഷമമാക്കാന്‍ കഴിയുമെന്ന് റെയില്‍വേ അധികൃതര്‍ അറിയിച്ചതായി എംപി പറഞ്ഞു. എസ്‌കലേറ്ററിന്റേയും നടപ്പാലത്തിന്റേയും നിര്‍മ്മാണം പൂര്‍ത്തിയാകുന്നതോടെ യാത്രക്കാര്‍ക്ക് വളരെ ആശ്വാസമാകുമെന്നും എംപി പ്രത്യാശിച്ചു.