കോവിഡ് കേസുകള്‍ വര്‍ധിക്കുന്ന സാഹചര്യത്തില്‍ റാപ്പിഡ് ആന്റിബോഡി ടെസ്റ്റിന്റെ സാധ്യതകളിലേക്ക് വീണ്ടും കേരളം.. ഉറവിടമറിയാത്ത രോഗികള്‍ വര്‍ധിക്കുന്നതും ഇളവുകളെതുടര്‍ന്ന് ജനജീവിതം സാധാരണനിലയിലായ സാഹചര്യത്തില്‍ വൈറസ് വ്യാപനസാധ്യത കണക്കിലെടുത്തുമാണ് റാപ്പിഡ് ടെസ്റ്റിന് ആരോഗ്യവകുപ്പ് തീരുമാനമെടുത്തത്. രണ്ട് വിദേശകമ്പനികളില്‍നിന്നായി 10000 റാപ്പിഡ് കിറ്റുകള്‍ നേരിട്ട് ലഭ്യമാക്കാനാണ് തീരുമാനം. ഈ രണ്ട് കമ്പനികള്‍ക്കും ഇന്ത്യയില്‍ കിറ്റുകള്‍ വിതരണം ചെയ്യാന്‍ ഐ.സി.എം.ആര്‍ അനുമതി നല്‍കിയിരുന്നു. കേരളത്തിലെ കോവിഡ് പകര്‍ച്ചയുടെ രണ്ടാംഘട്ടത്തില്‍ ഐ.സി.എം.ആറില്‍നിന്ന് ലഭിക്കുന്ന കിറ്റുകള്‍ ഉപയോഗിച്ച് ലക്ഷം റാപ്പിഡ് ടെസ്റ്റുകള്‍ നടത്തുന്നതിന് സര്‍ക്കാര്‍ മാര്‍ഗനിര്‍ദേശം പുറപ്പെടുവിച്ചിരുന്നു.

ആദ്യഘട്ടമായി ഐ.സി.എം.ആര്‍ ലഭ്യമാക്കിയ 12,400 കിറ്റുകള്‍ ഗുണനിലവാര പരിശോധനയില്‍ പരാജയപ്പെട്ടു. പിന്നാലെ ഐ.സി.എം.ആര്‍ തന്നെ കിറ്റുകളുടെ ഉപയോഗം വിലക്കി. റാപ്പിഡ് കിറ്റുകളുടെ അഭാവത്തില്‍ ആരോഗ്യപ്രവര്‍ത്തകരടക്കം രോഗപ്പടര്‍ച്ചാ സാധ്യത ഏറെയുള്ള മുന്‍ഗണന വിഭാഗത്തിലുള്ളവരുടെ സാമ്പിളുകള്‍ പി.സി.ആര്‍ പരിശോധനക്കാണ് വിധേയമാക്കുന്നത്. ഒരു സാമ്പിളിലെ പരിശോധനക്ക് ആറ് മണിക്കൂര്‍വരെ സമയമെടുക്കുന്നതിനൊപ്പം ചെലവും കൂടുതലാണ്.

രണ്ടാംഘട്ട വ്യാപനത്തില്‍ രോഗികളുടെ എണ്ണം കുറയുകയും ഭീതി താല്‍ക്കാലികമായെങ്കിലും ഒഴിയുകയും ചെയ്തതോടെ റാപ്പിഡ് ടെസ്റ്റ് വേണ്ടെന്നായിരുന്നു സംസ്ഥാനത്തിന്റെ തീരുമാനം. എന്നാല്‍, മേയ് ഏഴിനുശേഷം കോവിഡ് പോസിറ്റിവ് കേസുകളുടെ ഗ്രാഫ് ഇതുവരെയുണ്ടാകാത്തവിധം വര്‍ധിച്ച സാഹചര്യത്തില്‍ വേഗമേറിയ കൂടുതല്‍ പരിശോധനകള്‍ അനിവാര്യമാണെന്നാണ് ആരോഗ്യവകുപ്പിന്റെ വിലയിരുത്തല്‍. ഈ സാഹചര്യത്തിലാണ് ഉപേക്ഷിച്ച പരിശോധനരീതിയിലേക്ക് തിരികെപ്പോകുന്നത്. 14 ദിവസമാണ് ക്വാറന്റീന്‍ കാലയളവായി നിശ്ചയിച്ചിട്ടുള്ളതെങ്കിലും ഈ സമയം കഴിഞ്ഞശേഷവും കേരളത്തില്‍ രോഗം സ്ഥിരീകരിച്ചിട്ടുണ്ട്. ഈ സാഹചര്യത്തില്‍ പരിശോധന കൂട്ടുക മാത്രമാണ് വൈറസ് തടയാനുള്ള പ്രതിവിധി.