പമ്പാ നദിയില്‍ നിന്നും മണല്‍ കൊണ്ടുപോകുന്നത് വനം വകുപ്പ് വിലക്കി
പമ്പാ നദിയില്‍ നിന്നുള്ള മണല്‍ പുറത്തു കൊണ്ടുപോകാന്‍ കേന്ദ്ര സര്‍ക്കാരിന്റെ അനുമതി വേണമെന്നും അതില്ലാത്തതിനാല്‍ ഇപ്പോള്‍ വാരുന്ന മണല്‍ വനം വകുപ്പ് നിശ്ചയിക്കുന്ന സ്ഥലത്തു നിക്ഷേപിക്കണമെന്നും മന്ത്രി കെ.രാജു വ്യക്തമാക്കി. മണല്‍ നീക്കത്തില്‍ പ്രതിപക്ഷ നേതാവ് രമേശ് ചെന്നിത്തല അഴിമതി ആരോപിച്ചതിനു പിന്നാലെയാണ് മണലെടുത്തു വനത്തിനു പുറത്തു കൊണ്ടുപോകുന്നതു വിലക്കി വനം വകുപ്പ് ഉത്തരവിറക്കിയത്.
ഇതിനിടെ പ്രളയ പ്രതിരോധത്തിനു മണലെടുപ്പ് ആവശ്യമാണെന്നും അതുമായി മുന്നോട്ടു പോകുമെന്നും ചീഫ് സെക്രട്ടറി വിശ്വാസ് മേത്ത അറിയിച്ചു. സര്‍ക്കാരിലെ ഭിന്നത പുറത്തായതിനു പിന്നാലെ മണലെടുപ്പില്‍ നിന്നു പിന്മാറുന്നതായി കരാറെടുത്ത പൊതുമേഖലാ സ്ഥാപനമായ കണ്ണൂരിലെ കേരള ക്ലേയ്‌സ് ആന്‍ഡ് സെറാമിക്‌സ് അറിയിച്ചു. കണ്ണൂരിലെ ബാരാപ്പുഴയിലെ ചെളി നീക്കാനും ഇവര്‍ക്ക് അനുമതി നല്‍കിയിരുന്നു. പണം ഈടാക്കാതെയാണു സര്‍ക്കാര്‍ കരാര്‍ നല്‍കിയത്.
ഇന്നലെ മണല്‍നീക്കം തടഞ്ഞ് വനം സെക്രട്ടറി ആശ തോമസ് ഉത്തരവിറക്കി. നദിയില്‍ അടിഞ്ഞുകിടക്കുന്ന മണല്‍ പ്രളയത്തെ നേരിടാനായി എടുത്തുമാറ്റാം, പക്ഷേ വനം വകുപ്പിന്റെ അധീനതയില്‍ ഇതു സൂക്ഷിക്കണമെന്ന് ഉത്തരവില്‍ പറയുന്നു. തൊട്ടുപിന്നാലെ, മണല്‍ കൊണ്ടുപോകാന്‍ അനുമതിയില്ലെങ്കില്‍ കരാറില്‍ നിന്നു പിന്മാറുമെന്നു ക്ലേയ്‌സ് ആന്‍ഡ് സെറാമിക്‌സ് ചെയര്‍മാന്‍ സി.കെ.ഗോവിന്ദന്‍ അറിയിച്ചു.
കഴിഞ്ഞയാഴ്ച മുന്‍ ചീഫ് സെക്രട്ടറി ടോം ജോസിന്റെയും ഡിജിപി ലോക്‌നാഥ് ബെഹ്‌റയുടെയും നേതൃത്വത്തിലുള്ള ഉദ്യോഗസ്ഥ സംഘം ഹെലികോപ്റ്ററില്‍ പമ്പയിലെത്തി മണലെടുപ്പു വേഗത്തിലാക്കാന്‍ നിര്‍ദേശം നല്‍കിയതു വിവാദമായിരുന്നു. ചട്ടലംഘനം ചൂണ്ടിക്കാട്ടിയ പത്തനംതിട്ട, കണ്ണൂര്‍ കലക്ടര്‍മാരെ ഉന്നത ഉദ്യോഗസ്ഥര്‍ സമ്മര്‍ദം ചെലുത്തി നടപടി എടുപ്പിക്കുകയായിരുന്നുവെന്നും സൂചനയുണ്ട്. ഇതിനു പിന്നാലെയാണു ചെന്നിത്തല അഴിമതി ആരോപണം ഉന്നയിച്ചത്.
പമ്പയില്‍ 2018-ലെ പ്രളയത്തില്‍ അടിഞ്ഞ ഒരു ലക്ഷത്തോളം ടണ്‍ മണല്‍ എല്ലാ ചട്ടങ്ങളും ലംഘിച്ച് വാരുന്നുവെന്ന വാര്‍ത്തകളുടെ അടിസ്ഥാനത്തില്‍ പമ്പയില്‍ സര്‍ക്കാര്‍ അനുവാദത്തോടെ നടക്കുന്ന മണല്‍ വാരലിനെക്കുറിച്ച് അന്വേഷിക്കാന്‍ ദേശീയ ഹരിത ട്രൈബ്യൂണല്‍ നിര്‍ദേശം നല്‍കി. ഇതിനായി പ്രത്യേക സമിതിയെ നിയോഗിച്ചു. ട്രൈബ്യൂണല്‍ സ്വമേധയാ ആണ് കേസെടുത്ത് അന്വേഷണം പ്രഖ്യാപിച്ചത്.
https://www.facebook.com/Malayalivartha
