ഉത്രയുടെ സ്വര്‍ണാഭരണം ലോക്കറില്‍ സൂക്ഷിച്ചിരുന്ന അടൂരിലെ ബാങ്കില്‍ ക്രൈംബ്രാഞ്ച് സംഘം തെളിവെടുത്തു. ഉത്രയുടെയും സൂരജിന്റെയും പേരിലാണ് സ്വര്‍ണാഭരണം ബാങ്ക് ലോക്കറില്‍ സൂക്ഷിച്ചിരുന്നത്. ഇപ്പോള്‍ ലോക്കറില്‍ പത്തുപവന്‍ ആഭരണംമാത്രമേ ശേഷിക്കുന്നുള്ളൂവെന്ന് പരിശോധനയില്‍ കണ്ടെത്തി.

ആറുപവന്‍ ഇതേബാങ്കില്‍ കാര്‍ഷികവായ്പയ്ക്കായി പണയംവെച്ച് ഒരുലക്ഷം രൂപ സൂരജ് എടുത്തെന്നും കണ്ടെത്തി. ഇതിന്റെ പലിശയോ മുതലോ ഇതുവരെ സൂരജ് അടച്ചിട്ടില്ല. പണയത്തിന്റെ കാലാവധി കഴിഞ്ഞെന്നും പോലീസ് പറഞ്ഞു.പ്രതി സൂരജിനെക്കൂടാതെയാണ് അന്വേഷണസംഘം ആദ്യം ബാങ്കിലെത്തിയത്. എന്നാല്‍, ബാങ്കിടപാടുകള്‍ കഴിഞ്ഞ് ആളൊഴിഞ്ഞപ്പോള്‍ സൂരജിനെയും ബാങ്കിലെത്തിച്ചു. ക്രൈംബ്രാഞ്ച് ഡിവൈ.എസ്.പി. എച്ച്.അശോകന്റെ നേതൃത്വത്തില്‍ മൂന്നര മണിക്കൂര്‍ പരിശോധന നടന്നു.

ലോക്കറില്‍ നിന്ന് മാര്‍ച്ച് രണ്ടിനുശേഷം സൂരജ് 38 പവന്‍ എടുത്തെന്ന് അന്വേഷണസംഘത്തിന് വിവരം ലഭിച്ചിരുന്നു. ഈ ആഭരണമാണ് സൂരജിന്റെ അച്ഛന്‍ സുരേന്ദ്രന്‍ കുഴിച്ചിട്ടതും കഴിഞ്ഞദിവസം അന്വേഷണസംഘം കണ്ടെടുത്തതും. ആഭരണത്തിന്റെ കണക്കെടുപ്പ് തുടരുമെന്ന് ഡിവൈ.എസ്.പി. പറഞ്ഞു.ഉത്രയുടെ കൊലപാതകവുമായി ബന്ധപ്പെട്ട് പത്തനംതിട്ട ജില്ലാ പോലീസ് സൂപ്രണ്ട് പ്രാഥമികാന്വേഷണ റിപ്പോര്‍ട്ട് സംസ്ഥാന വനിതാകമ്മിഷനു കൈമാറി.