നെട്ടൂര്‍ മാര്‍ക്കറ്റ് റോഡില്‍ വച്ച് 2013-ല്‍ പ്രമുഖ വ്യവസായിയും കൊച്ചി ബ്രോഡ്വേയിലെ കിങ് ഷൂമാര്‍ട്ട് ഉടമയുമായിരുന്ന എം.എ. ഷംസുദ്ദീനെ കൊലപ്പെടുത്തിയ കേസിലെ പ്രതി ജോഷിക്ക് (കരിപ്പായി ജോഷി) ജീവപര്യന്തം തടവും രണ്ടു ലക്ഷം രൂപ പിഴയും ശിക്ഷ ലഭിച്ചു. പിഴയടച്ചില്ലെങ്കില്‍ ആറു മാസം കൂടി തടവുശിക്ഷ അനുഭവിക്കണമെന്ന് എറണാകുളം അഡീഷണല്‍ സെഷന്‍സ് കോടതി ഉത്തരവിട്ടു.

കൊച്ചി നഗരത്തെ നടുക്കിയ കൊലപാതകം ഭൂമിക്കച്ചവടത്തിലെ കമ്മിഷന്‍ തുകയുടെ പേരിലായിരുന്നു എന്നാണു കേസ്. ദൃക്സാക്ഷികളില്ലാത്ത കേസില്‍ സാഹചര്യത്തെളിവുകളുടെയും ശാസ്ത്രീയ തെളിവുകളുടെയും അടിസ്ഥാനത്തിലാണ് കുറ്റപത്രം സമര്‍പ്പിച്ചത്.

എറണാകുളം പുല്ലേപ്പടി അരങ്ങത്ത് ക്രോസ് റോഡില്‍ സാറാ മന്‍സിലില്‍ താമസിച്ചിരുന്ന 59-വയസുകാരനായ ഷംസുദ്ദീനെ നെട്ടൂരില്‍ സ്ഥലം കാണിക്കാനെന്ന പേരില്‍ വിളിച്ചുവരുത്തിയശേഷം ആക്രമിക്കുകയായിരുന്നു. രാത്രി ഒമ്പതിനുശേഷമായിരുന്നു സംഭവം. കിഴക്കമ്പലത്ത് 1.16 ഏക്കര്‍ സ്ഥലത്തിന്റെ വില്‍പന നടത്തിയതില്‍ ഇടനിലക്കാരനായ ജോഷിക്കു കമ്മിഷന്‍ കുറഞ്ഞതു സംബന്ധിച്ച തര്‍ക്കമാണു കൊലപാതകത്തിലെത്തിയതെന്നു പ്രോസിക്യൂഷന്‍ വ്യക്തമാക്കി.

നെട്ടൂരില്‍ ആളൊഴിഞ്ഞ ഭാഗത്തുവച്ചാണ് ഷംസുദ്ദീനെ കുത്തി പരുക്കേല്‍പ്പിച്ചത്. ഷംസുദീനു പതിനാലോളം കുത്തേറ്റു. കുത്തേറ്റുവീണ ഷംസുദ്ദീന്‍ വഴിയരികില്‍ രക്തംവാര്‍ന്ന് കിടക്കുന്നതു കണ്ട വാര്‍ഡ് കൗണ്‍സിലറാണ് വിവരം പോലീസിനെ അറിയിച്ചത്. പോലീസെത്തുമ്പോഴേക്കും മരണം സംഭവിച്ചിരുന്നു. സംഭവസ്ഥലത്തു നിന്ന് പ്രതി ഉപയോഗിച്ചിരുന്ന മൊബൈല്‍ ഫോണും ഡ്രൈവിങ് ലൈസന്‍സും കണ്ടെത്തിയത് കേസില്‍ നിര്‍ണായകമായി.

കേസില്‍ സ്പെഷല്‍ പബ്ലിക് പ്രോസിക്യൂട്ടറായി എ. മുഹമ്മദും അഡ്വ. ടി.ആര്‍.എസ്. കുമാറും ഹാജരായി. ഡിവൈ.എസ്.പി: ജി. വേണുവിന്റെ നേതൃത്വത്തില്‍ സബ് ഇന്‍സ്പെക്ടര്‍മാരായ പ്രദീപ്കുമാര്‍, വിനോദ് എന്നിവരുള്‍പ്പെട്ട സംഘമാണ് കുറ്റപത്രം തയാറാക്കിയത്.