കോവിഡ് ബാധിച്ചു മരിച്ച വൈദികന്റെ സംസ്‌കാരം നാട്ടുകാരുടെ എതിര്‍പ്പിനെ തുടര്‍ന്ന് വൈകുന്നു
കോവിഡ് ബാധിച്ചു കഴിഞ്ഞ ദിവസം തിരുവനന്തപുരത്ത് മരണമടഞ്ഞ ഫാ.കെ.ജി. വര്‍ഗീസിന്റെ സംസ്‌കാരം നാട്ടുകാരുടെ എതിര്‍പ്പുമൂലം വൈകുന്നു. നെട്ടയം മലമുകളിലെ സെമിത്തേരിയില്‍ മൃതദേഹം സംസ്‌കരിക്കുന്നതു വിലക്കി ഹൈക്കോടതിയുടെ ഉത്തരവുണ്ടെന്നു ചൂണ്ടിക്കാട്ടി മൃതദേഹം സംസ്‌കരിക്കുന്നതു നാട്ടുകാരില്‍ ഒരു വിഭാഗം തടഞ്ഞു. വൈദികന്റെ മൃതദേഹം മറ്റൊരിടത്തു സംസ്‌കരിക്കണമെന്നാണ് ആവശ്യം.
തര്‍ക്കമുണ്ടായതോടെ നഗരസഭാ ആരോഗ്യവിഭാഗം ഉദ്യോഗസ്ഥര്‍ നാട്ടുകാരുമായി ചര്‍ച്ച നടത്തി. കോടതി ഉത്തരവു സംബന്ധിച്ചു ജില്ലാ കലക്ടറുടെ നേതൃത്വത്തില്‍ ഇരു വിഭാഗങ്ങളുമായി ഒരുവട്ടം ചര്‍ച്ച നടത്തിയെങ്കിലും തീരുമാനമുണ്ടായില്ലെന്നു വട്ടിയൂര്‍ക്കാവ് സി.ഐ. പറഞ്ഞു. ഇന്നു വീണ്ടും ചര്‍ച്ച നടക്കും.
കോവിഡ് പ്രോട്ടോകോള്‍ അനുസരിച്ചു സംസ്‌കാരത്തിനു മുന്നൊരുക്കം നടത്താനെത്തിയ ആരോഗ്യവകുപ്പ് ഉദ്യോഗസ്ഥരെ നാട്ടുകാര്‍ തടഞ്ഞു. സംഭവമറിഞ്ഞു വൈദികരും സ്ഥലത്തെത്തിയിരുന്നു.
നാലാഞ്ചിറയില്‍ വൈദികന്റെ ഇടവകയില്‍ സംസ്‌കരിക്കാനായിരുന്നു ആദ്യം ആലോചിച്ചത്. ഇവിടെ ആഴത്തില്‍ കുഴിയെടുക്കാന്‍ സാധിക്കാതെ വന്നതോടെയാണ് പുതിയ സ്ഥലം തേടിയത്. വൈദികന്റെ മൃതദേഹം ഇപ്പോള്‍ തിരുവനന്തപുരം മെഡിക്കല്‍ കോളജ് ആശുപത്രി മോര്‍ച്ചറിയിലാണുള്ളത്.
https://www.facebook.com/Malayalivartha
